मलङ्गवा (सर्लाही): विवादास्पद धर्मगुरु रामबहादुर बम्जन, जसलाई ‘रामलाल बम्जन’ र ‘लिटिल बुद्ध’ का नामले समेत चिनिन्छ, सम्पत्ति शुद्धिकरण (मनी लाउन्डरिङ) मुद्दामा पुर्पक्षका लागि कारागार चलान भएका छन्। सर्लाही जिल्ला अदालतका न्यायाधीश जीवनकुमार भण्डारीको इजलासले उनलाई थुनामा राख्ने आदेश दिएपछि मलङ्गवा कारागार पठाइएको हो।
बम्जनविरुद्ध २०८१ साल फागुन ५ गते सर्लाही जिल्ला अदालतमा सम्पत्ति शुद्धिकरण सम्बन्धी मुद्दा दर्ता भएको थियो। मुद्दाको सुनुवाइका क्रममा उनी अदालतमा उपस्थित हुँदा ठूलो सङ्ख्यामा उनका समर्थक तथा अनुयायीहरू अदालत परिसरमा भेला भएका थिए।
यसअघि पनि बम्जनलाई सर्लाही जिल्ला अदालतले एक नाबालिका अनुयायी ‘आनी’ माथि यौन दुर्व्यवहार गरेको ठहर गर्दै २०८१ असारमा १० वर्ष कैद र पाँच लाख रुपैयाँ क्षतिपूर्तिको सजाय सुनाएको थियो। तर उनले उक्त फैसलाविरुद्ध उच्च अदालत जनकपुरमा पुनरावेदन गरेका थिए।
उच्च अदालत जनकपुरले जिल्ला अदालतको फैसला उल्ट्याउँदै बम्जनलाई गत चैत ६ गते सफाइ दिएको थियो, जसपछि उनी जेलमुक्त भएका थिए। तर हाल पुनः सम्पत्ति शुद्धिकरण मुद्दामा थुनामै राखिने भएपछि उनी पुनः जेल चलान भएका छन्।
