काठमाडौं: आर्थिक बाध्यताका कारण चीनमा एक युवती आफ्नो कार्यस्थलको बाथरूममा बस्दै आएकी छन्। १८ वर्षीया याङ (नाम परिवर्तन) एक फर्निचर पसलमा काम गर्छिन् र त्यही पसलको बाथरूम मासिक ५० युआन (झण्डै ९०० रुपैयाँ) तिरेर भाडामा लिएकी हुन्। उनले बिजुली र पानीको बिल मात्र तिर्नुपर्छ।
पहिले उनी आफ्नो हाकिमको घरमा बस्थिन्, तर ढोका नभएकोले सुत्न असहज भएपछि बाथरूम रोजेकी हुन्। याङले मासिक करिब २७०० युआन कमाउँछिन् र अधिकांश पैसा बचत गर्छिन्।
उनले आफ्नो बाथरूम जीवनका गतिविधिहरू चिनियाँ सामाजिक सञ्जाल डुयिनमा पोस्ट गर्छिन्, जहाँ उनका करिब १६ हजार फलोअर्स छन्। उनी बाथरूममै खाना पकाउने, खाने र सुत्ने गर्छिन्। सधैं सफा राखेर गन्ध नआओस् भन्नेमा सतर्क रहन्छिन्।
पसल सञ्चालनमा हुँदा ग्राहक तथा कर्मचारीलाई शौचालय प्रयोग गर्न मिलोस् भनेर याङ आफ्ना सबै सामान प्याक गरेर राख्छिन्। उनले भनिन्, “मलाई थाहा छ, बाथरूममा मेरा व्यक्तिगत सामानहरू देख्दा केही ग्राहकलाई असहज लाग्न सक्छ, तर उनीहरूले अहिलेसम्म केही भनेका छैनन्।”
याङको सपना छ— भविष्यमा पर्याप्त पैसा बचत गरेर घर वा कार किन्नु।
