काठमाडौं: सशस्त्र प्रहरी बलमा तीन डिआइजीको पद लामो समयदेखि रिक्त छ। भदौमा दुई डिआइजी सेवानिवृत्त भएपछि पाँच महिनासम्म पदपूर्ति हुन सकेको छैन। केही दिनअघि थप एक डिआइजीको पद रिक्त हुँदा पनि बढुवाको प्रक्रिया अघि बढ्न सकेको छैन।
सशस्त्र प्रहरीका उच्च अधिकारीहरूका अनुसार एसएसपी दीपेन्द्र कुँवरलाई डिआइजी बनाउनकै लागि पदपूर्ति रोकिने परिस्थिति सिर्जना गरिएको छ। सशस्त्र मुख्यालय स्रोतका अनुसार ब्याच मिचेर कुँवरलाई बढुवा गराउन दबाब दिइएको छ। कुँवर नेपाली कांग्रेस सभापति शेरबहादुर देउवाका भतिजी ज्वाइँ (सभापति देउवाका स्वकीय सचिव भानु देउवाका बहिनीज्वाइँ) भएकाले राजनीतिक प्रभावका कारण बढुवा प्रक्रिया रोकिएको स्रोतको दाबी छ।
डिआइजी पदमा अघि बढेमा उनी भावी आईजीपी बन्न सहज हुने भएकाले भानु देउवामार्फत सशस्त्र प्रहरी नेतृत्वमा दबाब दिइएको स्रोतले जनाएको छ। यसबारेमा गृहमन्त्रालयले कुनै स्पष्ट धारणा सार्वजनिक गरेको छैन। मन्त्रालयका प्रवक्ता रामचन्द्र तिवारीले आफूलाई यो विषयमा जानकारी नभएको प्रतिक्रिया दिए।
सशस्त्र प्रहरीमा पद रिक्त, बढुवा अवरुद्ध
सशस्त्र प्रहरीमा १६ भदौदेखि दुई डिआइजीको पद रिक्त रहँदा गत साता थप एक पद खाली भएको थियो। तर, अझैसम्म बढुवा प्रक्रिया सुरु भएको छैन। राजनीतिक हस्तक्षेपकै कारण बढुवा रोकिँदा तल्लो तहसम्मका पदोन्नति प्रक्रियासमेत प्रभावित भएका छन्।
हाल सशस्त्र प्रहरीमा तीन डिआइजी, तीन एसएसपी, १५ एसपी, २५ डिएसपी, र ७४ इन्स्पेक्टर पद रिक्त छन्। डिआइजी बढुवा प्रक्रिया अवरुद्ध हुँदा यी सबै पदमा बढुवा हुन सकेको छैन, जसले संगठनमै असर परेको छ।
अदालतको आदेशको अवहेलना
तीन महिनाभन्दा बढी पद रिक्त राख्नु अदालतको अवहेलना हुने अवस्था छ। सर्वोच्च अदालतले २०७५ मा सुरक्षा निकायमा तीन महिनाभित्र रिक्त पद बढुवाबाट पूर्ति गर्न आदेश दिएको थियो। तर, यो आदेश पालना नभएकाले अदालतको अवहेलना मुद्दा उठ्न सक्ने सशस्त्र प्रहरी अधिकारीहरूले बताएका छन्।
नेपाल प्रहरीका पूर्व एसएसपी यादवराज खनालले दायर गरेको रिटमा सर्वोच्चका न्यायाधीश सपना प्रधान मल्ल र डम्बरबहादुर शाहीको इजलासले समयमै बढुवा प्रक्रिया अघि बढाउन निर्देशनात्मक आदेश दिएको थियो। आदेशमा प्रहरी संगठनका बढुवा समितिहरूले समयमै निर्णय गरेर कार्यतालिका अनुसार प्रक्रिया टुंग्याउनुपर्ने उल्लेख छ।
दीपेन्द्र कुँवरको बढुवामा विशेष दबाब
दीपेन्द्र कुँवर २०५९ सालमा भर्ना भएका सशस्त्र प्रहरीका दोस्रो ब्याचका अधिकृत हुन्। इन्स्पेक्टरका रूपमा प्रवेश गर्दा उनको ७४औं स्थान थियो। तर, डिएसपीबाट एसपी हुँदा १०औं स्थानमा, र एसपीबाट एसएसपी बढुवामा पहिलो स्थानमा तानिएका थिए।
सशस्त्र प्रहरी स्रोतका अनुसार कुँवर कार्यसम्पादनमा कमजोर भए पनि राजनीतिक आडका कारण उनी निरन्तर अघि बढिरहेका छन्। बढुवा भएदेखि उनी सशस्त्र प्रहरीको आकर्षक प्रबन्धक महाशाखामा कार्यरत छन्।
बढुवा प्रक्रिया लामो समयदेखि अवरुद्ध हुँदा संगठनमा असन्तुष्टि बढ्दै गएको छ। प्रहरी अधिकृतहरू पदोन्नतिबाट बञ्चित हुँदा सशस्त्र प्रहरीको कार्यक्षमतामा समेत असर परेको विश्लेषकहरू बताउँछन्।
