काठमाडौं: संघीय संसद्अन्तर्गत आज चारवटा संसदीय समितिका बैठकहरू बस्दैछन्। संसद् सचिवालयका अनुसार अर्थ समिति, सार्वजनिक लेखा समिति, विकास, आर्थिक मामिला तथा सुशासन समिति र संघीयता सबलीकरण तथा राष्ट्रिय सरोकार समितिका बैठकहरू आज तय भएका छन्।
प्रतिनिधिसभाअन्तर्गतको अर्थ समितिको बैठक सिंहदरबारमा बिहान ११ बजे बस्नेछ। बैठकमा आगामी आर्थिक वर्षको बजेटमा समावेश हुनुपर्ने विषयमा छलफल हुनेछ। सो बैठकमा समिति सदस्यहरूका साथै राष्ट्रिय योजना आयोग, नेपाल उद्योग वाणिज्य महासंघ (FNCCI) र नेपाल उद्योग परिसंघ (CNI) का प्रतिनिधिहरू सहभागी हुनेछन्।
सार्वजनिक लेखा समितिको बैठक पनि बिहान ११ बजे सिंहदरबारमा बस्नेछ। उक्त बैठकमा समितिमा प्राप्त उजुरीहरूमाथि छलफल गरिनेछ।
राष्ट्रिय सभाअन्तर्गतको विकास, आर्थिक मामिला तथा सुशासन समितिको बैठक बिहान ११ः३० बजे बस्नेछ। बैठकमा विनियोजन विधेयक, २०८२ का सिद्धान्त तथा प्राथमिकताका विषयमा छलफल हुनेछ। सो अवसरमा अर्थ मन्त्रालय, राष्ट्रिय योजना आयोग तथा राष्ट्रिय प्राकृतिक स्रोत तथा वित्त आयोगका प्रतिनिधिहरूबीच छलफल हुने कार्यक्रम छ।
त्यसैगरी, संघीयता सबलीकरण तथा राष्ट्रिय सरोकार समितिको बैठक बिहान ११ बजे बस्नेछ। बैठकमा विपद् व्यवस्थापन (जसमा विपद् न्यूनीकरण, प्रतिकार्य र पुनर्लाभ) सम्बन्धी कामकारबाहीबारे समीक्षा गरिनेछ। साथै, विपद् जोखिम न्यूनीकरणका लागि तयारी तथा भविष्यका कार्ययोजना र विविध विषयमा समेत छलफल गरिनेछ।
