काठमाडौं । कप्तान किलियन एमबाप्पे र उस्मान डेम्बेलेको उत्कृष्ट प्रदर्शनमा फ्रान्सले मोरक्कोलाई २–० गोलअन्तरले पराजित गर्दै फिफा विश्वकप २०२६ को सेमिफाइनलमा स्थान सुरक्षित गरेको छ।
अमेरिकाको बोस्टनस्थित जिलेट स्टेडियममा सम्पन्न पहिलो क्वाटरफाइनल खेलमा फ्रान्सले दोस्रो हाफमा दुई गोल गर्दै सहज जित दर्ता गरेको हो। यससँगै फ्रान्स लगातार तेस्रो संस्करणमा विश्वकपको सेमिफाइनल पुग्न सफल भएको छ। फ्रान्स सन् २०१८ को विश्वविजेता तथा २०२२ को विश्वकप उपविजेता टोली हो।
पहिलो हाफ निकै प्रतिस्पर्धात्मक भए पनि दुवै टोलीले गोल गर्न सकेनन्। फ्रान्सका कप्तान एमबाप्पेले पाएको पेनाल्टी अवसर सदुपयोग गर्न नसक्दा मोरक्कोले खेलमा सन्तुलन कायम राखेको थियो। बलियो रक्षात्मक प्रदर्शन गरेको मोरक्कोले फ्रान्सलाई सहज अवसर सिर्जना गर्न दिएको थिएन।
दोस्रो हाफमा भने फ्रान्सले खेलमाथि पूर्ण नियन्त्रण जमायो। ६०औँ मिनेटमा एमबाप्पेले शानदार गोल गर्दै टोलीलाई अग्रता दिलाए। त्यसको मात्र छ मिनेटपछि उनले मिलाएको पासमा उस्मान डेम्बेलेले गोल गर्दै फ्रान्सको अग्रता २–० मा पुर्याए।
दुई गोलले पछि परेको मोरक्कोले खेलमा फर्किने प्रयास गरे पनि फ्रान्सको सुदृढ रक्षापंक्ति तोड्न सकेन। निर्धारित समयसम्म थप गोल नहुँदा फ्रान्स २–० को जितसहित अन्तिम चारमा पुग्यो।
यसअघि सन् २०२२ को विश्वकपमा ऐतिहासिक रूपमा सेमिफाइनलसम्म पुगेको मोरक्कोको यात्रा भने यसपटक क्वाटरफाइनलमै टुंगिएको छ।
अब फाइनल प्रवेशका लागि फ्रान्सले सेमिफाइनलमा बेल्जियम र स्पेनबीच हुने अर्को क्वाटरफाइनल खेलको विजेता टोलीसँग प्रतिस्पर्धा गर्नेछ।
