काठमाडौं । इस्लामिक रिभोलुसनरी गार्ड कोर्प्स (आइआरजीसी) को गुप्तचर शाखाका प्रमुख माजिद खादेमी अमेरिका र इजरायलको आक्रमणमा मारिएका छन्।
आइआरजीसीले विज्ञप्ति जारी गर्दै खादेमीको सोमबार बिहान मृत्यु भएको पुष्टि गरेको हो।
इजरायलका रक्षामन्त्री इजरायल काट्ज र इजरायल रक्षा बल (आइडीएफ) ले उक्त कारबाहीको जिम्मेवारी लिएका छन्। आइडीएफले सामाजिक सञ्जालमार्फत यसलाई आइआरजीसीका लागि “अर्को ठूलो धक्का” भएको जनाएको छ।
यसअघि १५ जुन २०२५ मा इजरायली आक्रमणमा मोहम्मद काजेमी मारिएपछि चार दिनमै खादेमीलाई आइआरजीसी गुप्तचर संगठनको प्रमुख नियुक्त गरिएको थियो।
गत वर्ष अगस्टमा खादेमीले इरानको साइबर क्षेत्रको सार्वभौमसत्ता जोगाउन घरेलु इन्ट्रानेट प्रणाली विकासलाई प्राथमिकता दिनुपर्ने बताएका थिए।
