काठमाडौं । अमेरिकी राष्ट्रपति डोनाल्ड ट्रम्पले इरानका सर्वोच्च नेता अली खामेनी तेहरानमा भएको आक्रमणमा मारिएको दाबी गरेका छन्।
ट्रम्पले आफ्नो सामाजिक सञ्जाल प्लेटफर्ममार्फत जानकारी सार्वजनिक गर्दै अमेरिका र इजरायलले संयुक्त रूपमा गरेको आक्रमणमा खामेनीको मृत्यु भएको उल्लेख गरेका हुन्। उनले उक्त घटनालाई “न्याय” भएको भन्दै इरानका नागरिक, अमेरिकी जनता तथा विश्वका धेरै देशका मानिसका लागि महत्त्वपूर्ण क्षण भएको दाबी गरेका छन्।
यसअघि अन्तर्राष्ट्रिय समाचार संस्था Reuters तथा केही इजरायली सञ्चारमाध्यमहरूले पनि ८६ वर्षीय खामेनी मारिएको दाबी गरेका थिए। अमेरिकी टेलिभिजन च्यानल Fox Newsले समेत इजरायली एक वरिष्ठ अधिकारीलाई उद्धृत गर्दै खामेनीको मृत्यु भएको जनाएको छ।
संयुक्त आक्रमणपछि Tehranस्थित खामेनीको निवास पूर्ण रूपमा ध्वस्त भएको स्याटेलाइट तस्बिरमा देखिएको बताइएको छ। यद्यपि, उक्त दाबीबारे इरान सरकार वा कुनै स्वतन्त्र स्रोतबाट आधिकारिक पुष्टि भने हालसम्म सार्वजनिक भएको छैन।
यस घटनाले मध्यपूर्व क्षेत्रको सुरक्षा अवस्था थप जटिल बन्न सक्ने आकलन गरिएको छ।
