काठमाडौं: नेपाली चलचित्र के घर के डेरा : घर नं २ को ट्रेलर युट्युबको मुभी सेक्सनमा पाँचौं स्थानमा ट्रेन्डिङमा आएको छ। सँगै, चलचित्रले पनि रिलिजपछि दर्शकबाट सकारात्मक प्रतिक्रिया पाइरहेको छ।
शुक्रबारदेखि प्रदर्शनमा आएको यो चलचित्रले “वर्ड अफ माउथ” मार्फत सकारात्मक चर्चा बटुल्दै अफ टाइम शोहरूमा पनि उल्लेखनीय दर्शक उपस्थिति कायम राखेको वितरक करण श्रेष्ठले जानकारी दिए। “दिनप्रतिदिन अकुपेन्सी बढिरहेको छ,” श्रेष्ठले बताए, “हाम्रो जनरा र विषयवस्तु अनुसार दर्शकको राम्रो साथ पाएका छौं।”
चलचित्रको कथा प्रसिद्ध साहित्यकार बुद्धिसागरले लेखेका हुन् भने निर्देशन दीपेन्द्र के. खनालले गरेका छन्। प्रमुख भूमिकामा खगेन्द्र लामिछाने, निश्चल बस्नेत, आर्यन सिग्देल, केकी अधिकारी, उपासना सिंह ठकुरी, प्रकाश घिमिरे, श्रृजना नापित, संजोग रसाइली, रुविना घिमिरे र सुरज विष्टलगायत कलाकारहरू छन्।
के घर के डेरा : घर नं २ एप्पल इन्टरटेन्मेन्ट, ए प्लस इन्टरटेन्मेन्ट र नटराज क्रिएसनको संयुक्त प्रस्तुति हो। सिनेमाका कार्यकारी निर्माता युवराज कार्की हुन् भने निर्माता नकिम उद्दिन, शरद श्रेष्ठ र किरण महर्जन रहेका छन्।
चलचित्रको छायांकन कृष्णबहादुर थापाले गरेका हुन्। निर्माण टोलिले दर्शकले चलचित्रको कथा र कलाकारहरूको अभिनयलाई रुचाएको दाबी गरेको छ।
