काठमाडौँ:राष्ट्रिय स्वतन्त्र पार्टी (रास्वपा) का सभापति रवि लामिछानेको बन्दी प्रत्यक्षीकरण रिट हेर्दाहेर्दैमा राखिएको छ।
छ पटकसम्म सुनुवाइ हुन नसकेको उक्त रिटको सुनुवाइ मंगलबारदेखि सर्वोच्च अदालतका न्यायाधीशद्वय नहकुल सुवेदी र बालकृष्ण ढकालको इजलासमा सुरु भएको हो। मंगलबार लामिछानेको तर्फबाट सुदीज्ञ पन्त, सुशील पन्त, सुरेन्द्र थापा, दिपेन्द्र झालगायत कानुन व्यवसायीहरूले बहस गरेका थिए। तर सुनुवाइ नसकिएकाले रिटलाई हेर्दाहेर्दैमा राखिएको हो।
न्यायाधीशहरूले आजै सक्नेगरी बहस छोट्याउन आग्रह गरे पनि मंगलबार लामिछानेका तर्फबाट मात्र बहस सकिएको थियो।
बुधबार पूर्वडीआईजी छविलाल जोशी, पीडित पक्षका कानुन व्यवसायीहरू र सरकारी वकिलले बहस गर्ने कार्यक्रम छ। त्यसपछि जवाफी बहस हुनेछ।
उक्त बन्दी प्रत्यक्षीकरण निवेदनसँगै लामिछाने र पूर्वडीआईजी जोशीको तर्फबाट उजुरी दिएका नारायणबहादुर पहराईसहित ४४ जनाविरुद्ध दायर दुई वटा रिट पनि एउटै इजलासमा लगाउमा राखेर सुनुवाइ भइरहेको छ।
