काठमाडौं: सर्वोच्च अदालतको आदेशमा राप्रपाका वरिष्ठ उपाध्यक्ष रविन्द्र मिश्र रिहा भएका छन्। शुक्रबार सर्वोच्चले थुनामुक्त गर्न आदेश दिएपछि सञ्चारकर्मीहरूसँग कुरा गर्दै मिश्रले आफूले कुनै पनि अपराध नगरेको स्पष्ट पारेका छन्।
उनले भने, “राज्यविरुद्धको कसुर, संगठित अपराध र अपराधिक उपद्रव मबाट केही पनि भएको छैन। मैले आज त्यति मात्र टिप्पणी गरे। म हाजिरी जमानीमा छुटेको हुँ। त्यसमा म धेरै खुसी हुने पक्षमा छैन, किनभने राज्य मविरुद्ध लागेको छ भनेर सम्मानित अधिवक्ताहरूले पनि भन्नु भइसकेको छ।”
मिश्रले चैत १५ गतेको घटनामा ज्यान गुमाउनेप्रति श्रद्धाञ्जली व्यक्त गर्दै जनधनको क्षतिप्रति पनि दुःख प्रकट गरे। उनले भने, “सबैभन्दा पहिले चैत १५ गतेको घटनामा ज्यान गुमाउनेप्रति हार्दिक श्रद्धाञ्जली व्यक्त गर्न चाहन्छु। जति जनधनको क्षति भयो, त्यसमा पनि दुःख व्यक्त गर्न चाहन्छु।”
गत चैत १५ गते काठमाडौंको तीनकुनेमा राजावादीहरूले गरेको प्रदर्शन हिंसात्मक बनेपछि मिश्रलाई प्रहरीले सोही साँझ पक्राउ गरेको थियो। उनलाई राज्यविरुद्धको कसुर, संगठित अपराध र अपराधिक उपद्रवको आरोपमा हिरासतमा राखेर अनुसन्धान गरिँदै आएको थियो। प्रहरीले आठ पटकसम्म म्याद थप गरी उनलाई थुनामा राखेको थियो।
अदालतको आदेशपछि उनी हाजिरी जमानीमा रिहा भएका हुन्।
