काठमाडौं: विद्यालय शिक्षा विधेयक, २०८० सम्बन्धमा गठित संसदीय उपसमितिको कार्यकाल १० दिन थप गरिएको छ।
सिंहदरबारमा सोमबार बसेको शिक्षा, स्वास्थ्य तथा सूचना प्रविधि समितिको बैठकले उपसमितिका संयोजक छविलाल विश्वकर्माको प्रस्ताव अनुसार म्याद थप गर्ने निर्णय गरेको हो।
संयोजक विश्वकर्माले विधेयकको १५ वटा परिच्छेद र १६३ वटा दफामाथि दफावार छलफल सकिएको जानकारी गराउँदै, प्रतिवेदन लेखन र मस्यौदा तयार पार्ने काम बाँकी रहेकाले थप समय आवश्यक भएको बताएका थिए।
उपसमितिले चैत १८ गतेदेखि कार्य प्रारम्भ गरी वैशाख २१ गतेसम्म ३९ वटा बैठक गरेको जनाएको छ। समितिले बाँकी कार्य पूर्ण गर्नका लागि म्याद थप गरेको हो।
