काठमाडौं। अमेरिकी पूर्वराष्ट्रपति डोनाल्ड ट्रम्पले युक्रेन युद्धमा ज्यान गुमाएका लाखौं मानिसको मृत्युको जिम्मेवारी युक्रेनी राष्ट्रपति भोलोदिमिर जेलेन्स्की, रुसी राष्ट्रपति भ्लादिमिर पुटिन र अमेरिकी राष्ट्रपति जो बाइडेन तीनै जनामाथि रहेको टिप्पणी गरेका छन्।
मंगलबार ह्वाइट हाउसमा आयोजित पत्रकार सम्मेलनमा बोल्दै ट्रम्पले युद्धको सुरुवात र त्यसका परिणामबारे गम्भीर चेतावनी दिए। एल साल्भाडोरका नेताहरूको उपस्थितिमा आयोजित उक्त कार्यक्रममा ट्रम्पले भने, “जब तपाईं युद्ध सुरु गर्नुहुन्छ, तपाईंले त्यसलाई कसरी जित्ने हो भन्ने स्पष्ट योजना हुनु आवश्यक छ।”
उनले राष्ट्रपति जो बाइडेनमाथि समेत आरोप लगाउँदै भने, “यदि म राष्ट्रपति भएको भए, यो युद्ध नै सुरु हुने थिएन।” ट्रम्पको भनाइ अनुसार, बाइडेन प्रशासनको कमजोरीका कारण नै यो द्वन्द्व चर्किएको हो।
ट्रम्पको यो टिप्पणी रुसले आइतबार युक्रेनको उत्तरपूर्वी शहर सुमीमा गरेको घातक आक्रमणपछि आएको हो, जहाँ थुप्रै नागरिक मारिएका थिए। उक्त आक्रमणपछि विश्वभर आक्रोश चर्किएको थियो।
ट्रम्पले आफ्नो अभिव्यक्तिमा युद्धको सुरुवात गर्नेहरूलाई नै अन्ततः यसको मूल्य चुकाउनु पर्ने कुरा दोहोर्याए। उनले दुवै पक्षका नेताहरूले संवेदनशीलताका साथ कूटनीतिक पहल गर्नुपर्ने आवश्यकता पनि औंल्याए।
