चितवन: राष्ट्रिय स्वतन्त्र पार्टी (रास्वपा)ले ‘जनयात्रा अभियान’को औपचारिक सुरुवात चितवनबाट गरेको छ। शनिबार रास्वपाका शीर्ष नेताहरूले कार्यक्रमस्थलमा अभियानको घण्टी बजाएर शुभारम्भ गरेका हुन्।
पार्टी सभापति रवि लामिछानेले जनयात्रा शुभारम्भमा विशेष सम्बोधन गर्ने कार्यक्रम तय गरिएको भए पनि उनलाई शुक्रबार राति प्रहरीले पक्राउ गरेपछि अन्य नेताहरूले सम्बोधन गर्दै अभियान अघि बढाएका थिए।
रास्वपा उपसभापति डा. स्वर्णिम वाग्लेले सरकारले नियोजित रूपमा अन्याय गरेको आरोप लगाउँदै भने, “उच्च अदालतको आदेश जिल्ला अदालतमा नपु¥याई बदला लिने उद्देश्यले रविजीलाई रातारात पक्राउ गरिएको छ।”
पक्राउअघि सभापति लामिछानेले आफू उपस्थित नहुने भए पनि जनयात्रा अभियान नरोकिने निर्देशन पार्टी नेताहरुलाई दिएका थिए।
‘जनताको कुरा जनतासँगै गएर सुन्ने’ उद्देश्यका साथ रास्वपाले जनयात्रा अभियान सुरु गरेको हो। पार्टीले विभिन्न जिल्लामा जनसंवाद गर्दै जनताका मुद्दा सुन्ने बताएको छ।
