काठमाडौं: राष्ट्रिय प्रजातन्त्र पार्टी (राप्रपा) ले चैत १५ गते काठमाडौंको तीनकुनेमा भएको प्रदर्शनमा दमन भएको भन्दै छानबिनको माग गरेको छ। राप्रपा कार्यवाहक प्रधानमन्त्री प्रकाशमान सिंहलाई एक ज्ञापनपत्र बुझाउँदै गृह मन्त्री रमेश लेखकको राजिनामा पनि माग गरेको छ।
राप्रपाका अध्यक्ष राजेन्द्र लिङदेन, वरिष्ठ नेता पशुपति शमशेर राणा र अन्य नेताहरूले सिंहदरबारमा राजावादीहरूको प्रदर्शनमा भएको हिंसात्मक झडपको छानबिनका लागि सर्वोच्च अदालतको पूर्व न्यायाधीशको नेतृत्वमा स्वतन्त्र छानबिन आयोग गठन गर्नुपर्ने माग गरेका छन्।
राप्रपाले पाँच प्रमुख माग राखेको छ, जसमा ‘सर्वोच्च अदालतको पूर्व न्यायधीशको अध्यक्षतामा मानवअधिकार आयोग र नागरिक समाजको सहभागितामा स्वतन्त्र छानबिन आयोग गठन’, ‘गृह मन्त्रीको राजिनामा’, ‘चैत १५ गते दमनमा संलग्न प्रहरी प्रमुख र प्रशासकीय नेतृत्वको निलम्बन’, ‘मृतक सबिन महर्जन र सुरेश रजकलाई सहिद घोषणा र क्षतिपुर्तिको व्यवस्था’, र ‘राप्रपा नेताहरू रबिन्द्र मिश्र र डा. धवल शमशेर राणालगायत अन्य माथि लगाइएको झुटा मुद्दा खारेजी र निर्दोषहरूको रिहाइ’ लगायतका मागहरू समावेश छन्।
यसका साथै राप्रपाले घाइतेहरूको निःशुल्क र प्रभावकारी उपचारको व्यवस्था पनि गर्नुपर्ने माग गरेको छ।
