काठमाडौँ महानगरपालिका–१४, कलंकीमा सोमबार भएको झडपमा २२ वर्षीय अभय गोलेको मृत्यु भएको छ। गोलेको हत्यामा संलग्न भएको आरोपमा प्रहरीले १७ जनालाई पक्राउ गरेको छ।
प्रारम्भिक अनुसन्धानअनुसार, मुख्य आरोपी रोहित खड्का सहित १७ जनालाई पक्राउ गरिएको काठमाडौँ जिल्ला प्रहरी परिसरका एसपी अपिल बोहराले रातोपाटीलाई जानकारी दिए। झडपमा घाइते भएका गोलेको उपचारको क्रममा सहिद मेमोरियल अस्पतालमा मृत्यु भएको थियो। यस घटनाको अनुसन्धान उपत्यका अपराध अनुसन्धान कार्यालय र जिल्ला प्रहरी परिसर काठमाडौँका अनुसन्धान अधिकारीहरूले गरिरहेका छन्।
यस घटनामा पुरानो विवादको कारण २१ वर्षीय रोहित खड्का, विनय लामा, र पर्वित श्रेष्ठले रड, खुकुरी र मुक्काले अर्को समूहलाई आक्रमण गरेका थिए। आक्रमणमा परेर गोले समूहका तीनजना घाइते भएका छन्। झडपमा परेर घाइते हुनेमा नागढुंगा निवासी २३ वर्षीय सन्दीप भुजेल, हेटौँडाका पवन तामाङ ‘चक्रे’, र चन्द्रागिरीका २२ वर्षीय पासाङ शेर्पा छन्। उनीहरूको उपचार सहिद मेमोरियल अस्पतालमा भइरहेको छ।
