प्रयागराज: उत्तर प्रदेशको प्रयागराजमा एक भीषण सवारी दुर्घटनामा १० जनाको मृत्यु भएको छ भने १९ जना घाइते भएका छन्। महाकुम्भमा स्नान गर्न आएका श्रद्धालु सवार बोलेरो र बस आपसमा ठोक्किँदा उक्त दुर्घटना भएको भारतीय सञ्चारमाध्यमले जनाएका छन्।
प्रारम्भिक जानकारीअनुसार, बस र बोलेरोमा रहेका सबै श्रद्धालु मध्यप्रदेश र छत्तीसगढका बासिन्दा थिए। दुर्घटनामा परेका घाइतेहरूको अहिले अस्पतालमा उपचार भइरहेको छ।
घटना शुक्रबार राति मेजाको प्रयागराज-मिर्जापुर राजमार्गमा भएको हो। संगम स्नान गर्न जाँदै गरेका छत्तीसगढको कोरबा जिल्लाका १० भक्तजन सवार बोलेरो बससँग ठोक्किँदा घटनास्थलमै ज्यान गएको बताइएको छ।
यसैगरी, बसमा रहेका १९ जना घाइते भएका छन्। उनीहरू संगम स्नान गरेर वाराणसी फर्किंदै थिए। घाइतेहरूलाई तत्कालै सीएचसी रामनगर अस्पतालमा भर्ना गरिएको छ। बसमा सवार सबै मध्यप्रदेशको राजगढ जिल्लाका बासिन्दा भएको खुलेको छ।
प्रहरीले घटनाबारे अनुसन्धान जारी राखेको जनाएको छ।
