भक्तपुर: प्रधानमन्त्री केपी शर्मा ओलीले सत्ताको खिचातानीको प्रवृत्तिबाट देशलाई मुक्त गर्दै दुई ठूला दलको सहकार्यले विकास र स्थिरताको आधार तयार गरेको बताएका छन्।
भक्तपुरको सूर्यविनायक नगरपालिकास्थित कटुञ्जेको नवनिर्मित प्रशासकीय भवन उद्घाटन गर्दै प्रधानमन्त्री ओलीले राजतन्त्रकालमा शासन टिकाउन मरिमेट्दा विकास रोकिएको र लोकतन्त्रपछिको विकासको गति फरक रहेको बताए।
उनले भने, “अब विकासको नयाँ चरण सुरु भएको छ। तर, राम्रो प्रणाली र काम गर्ने सरकारबिना विकास सम्भव छैन। अहिलेको सरकारले देशलाई एकताबद्ध गर्दै विकासको नेतृत्व गर्नेछ। सरकार ढल्ने हल्लामा समय खर्च गर्नुको कुनै अर्थ छैन। नेपाली कांग्रेस र नेकपा (एमाले) मिलेर स्थिरता र विकासमा प्रतिबद्ध छन्। यसमा ढुक्क रहनुपर्छ।”
प्रधानमन्त्री ओलीले कांग्रेससँगको सहकार्यलाई पूर्ण समर्थन प्राप्त भएको उल्लेख गर्दै, भोलि कांग्रेस नेतृत्वको सरकारलाई पनि एमालेले पूर्ण समर्थन दिने बताए। साथै, संसद्को हिउँदे अधिवेशनमा कानुन निर्माणमा तीव्रता आउने र सहमति भए संविधान संशोधन पनि चाँडै अघि बढ्ने बताए।
प्रधानमन्त्री ओलीले आफ्नो स्वास्थ्यलाई लिएर भ्रम फैलाएको विषयमा प्रतिक्रिया दिँदै भने, “रूघाखोकीले कमजोर बनाएको भए पनि आइसियुमा बसेको झुटो प्रचार भयो। खोक्न पाएको छैन, फोटो सार्वजनिक हुन्छ। यस्ता भ्रमबाट मुक्त हुनु जरूरी छ।”
प्रधानमन्त्री ओलीले नयाँ भवनको सदुपयोग गर्दै जनतालाई सहज सेवा दिन र आगामी योजनाबद्ध विकास सुनिश्चित गर्न निर्देशन दिए। साथै, उनले आतंकको छायाँमा चुनाव जित्ने जमाना सकिएको भन्दै लोकतान्त्रिक अभ्यासबाट अघि बढ्न आह्वान गरे।
कार्यक्रममा प्रतिनिधिसभाका सदस्य दुर्लभ थापा, पूर्वमन्त्री महेश बस्नेत, र नगरप्रमुख वासुदेव थापालगायतले राजनीतिमा प्रतिस्पर्धा र विकासका लागि ऐक्यबद्धता आवश्यक भएकोमा जोड दिए।
