काठमाडौं: इङ्ग्ल्याण्डको ऐतिहासिक ब्लेनहाइम दरबारबाट चोरहरूले ४८ लाख पाउण्ड मूल्य बराबरको सुनको शौचालय चोरेको खुलासा भएको छ। अदालतमा भएको सुनुवाइका क्रममा यो चोरी चोरहरूले मात्र पाँच मिनेटमै सम्पन्न गरेको जानकारी प्राप्त भएको छ।
यो अनौठो चोरी सेप्टेम्बर १४, २०१९ मा भएको थियो। अक्सफोर्डशायरस्थित ब्लेनहाइम दरबारमा कला प्रदर्शनीको एक भागको रूपमा सुनको शौचालय जडान गरिएको थियो, जुन पूर्ण रूपमा प्रयोगयोग्य थियो। उक्त दरबार बेलायतका पूर्व प्रधानमन्त्री विन्स्टन चर्चिलको जन्मस्थानसमेत हो।
यस घटनामा संलग्न भएको आरोपमा अक्सफोर्डका ३९ वर्षीय माइकल जोन्सले चोरीमा संलग्न रहेको आरोप अस्वीकार गरेका छन्। यस्तै, विन्डसरका ३६ वर्षीय फ्रेड डो र पश्चिम लन्डनकी ४१ वर्षीया बोरा गुकुकले चोरीपछिको आपराधिक सम्पत्ति हस्तान्तरण गर्ने षड्यन्त्रको आरोप अस्वीकार गरेका छन्।
अक्सफोर्ड क्राउन कोर्टमा सुनुवाइको क्रममा अभियोजन पक्षका वकिल जुलियन क्रिस्टोफर केसीले अदालतलाई जानकारी गराएअनुसार, चोरीका लागि दुईवटा गाडीमा आएका पाँच जनाको गिरोहले दरबारभित्र प्रवेश गरेर शौचालय उखेल्न सफल भएको थियो। चोरीपछि उनीहरू केही मिनेटमै भाग्न सफल भए।
शौचालय चोरी भएयता अहिलेसम्म फेला परेको छैन। अनुसन्धानकर्ताहरूका अनुसार, चोरहरूले शौचालयलाई पगालेर सुनको रूपमा बेचिसकेको हुनसक्ने अनुमान गरिएको छ।
यस घटनाले बेलायतमा व्यापक चर्चा पाएको थियो, किनभने उक्त सुनको शौचालय इटालियन कलाकार मौरिजियो कात्तेलनद्वारा डिजाइन गरिएको थियो। यसलाई ‘अमेरिका’ नाम दिइएको थियो र यसअघि न्युयोर्कको गुगेनहाइम संग्रहालयमा प्रदर्शन गरिएको थियो।
चोरीपछि ब्लेनहाइम दरबारका अधिकारीहरूले गह्रौं सुरक्षाका बाबजुद चोरहरूले शौचालय कसरी चोरे भन्नेबारे छानबिन गरिरहेको बताएका थिए। दरबारमा पानीको मुख्य पाइपलाइनमा जडान गरिएको शौचालय चोरी भएपछि ठूलो क्षति भएको थियो, जसका कारण दरबारका केही भागहरू डुबानमा परेका थिए।
अहिले अदालतमा मुद्दाको कारबाही जारी छ, र अभियोजन पक्षले यो योजनाबद्ध चोरी भएको दाबी गरेको छ। अभियुक्तहरूले भने आरोप अस्वीकार गर्दै आएका छन्।
