काठमाडौं । बेलायतको कार्डिफस्थित अदालतले आफ्नी पत्नीलाई कार पार्कमा घातक रूपमा छुरा प्रहार गरी हत्या गरेको आरोपमा ३७ वर्षीय थिसारा वेरेगललाई आजीवन कारावासको सजाय सुनाएको छ।

सन् २०२५ अगस्ट २१ मा ३२ वर्षीया दोन निरोधा कलपनी रिभरसाइडको साउथ मोर्गन प्लेसमा घटनास्थलमै मृत फेला परेकी थिइन्। वेरेगलले सुरुमा हत्या अस्वीकार गरे पनि जनवरीमा न्यूपोर्ट क्राउन कोर्टमा दोष स्वीकार गरेका थिए। कार्डिफ क्राउन कोर्टका न्यायाधीश ड्यानियल विलियम्सले भने, “उनको निर्दयी स्वार्थले निरोधाको जीवन छोट्यायो।”

अदालतलाई दिइएको जानकारी अनुसार दम्पती महिनौँदेखि अलग बसिरहेका थिए। घटनाको बिहान वेरेगलले कार पार्कमा पुगेर १५ सेन्टिमिटरको भान्साको छुराले अनुहार, घाँटी, छाती, हात र खुट्टामा घातक चोट पुर्‍याएका थिए। निरोधा घटनास्थलमै मृत अवस्थामा फेला परेकी थिइन्।

प्रत्यक्षदर्शीहरूले वेरेगलाई आफ्नो फोर्ड फिएस्टा कारमा तीव्र गतिमा भागिरहेको देखेका थिए। पक्राउको बेला कारभित्र रगतले भिजेका ग्लोभ र खोलिएको छुरा भेटिएको थियो। अनुसन्धान अनुसार हत्या योजनाबद्ध र पूर्वनियोजित थियो।

निरोधा र वेरेगल सन् २०१७ मा श्रीलङ्कामा विवाह गरेका थिए र सन् २०२२ मा कार्डिफ आएका थिए। वैवाहिक समस्या बढेपछि निरोधाले सहकर्मीसँग सम्बन्ध गाँसेकी थिइन्।

दक्षिण वेल्स प्रहरीले निरोधालाई परिवार र साथीहरूले अत्यन्त माया गर्ने व्यक्ति भनेको र उनको जीवन ईर्ष्यालु र कायरपूर्वसाथीले समाप्त गरेको उल्लेख गरेको छ।

काठमाडौं । चीनको परम्परागत स्प्रिङ फेस्टिभल (चन्द्र नववर्ष) यात्राको चाप बढेसँगै छोटो दूरीका ‘एयर ट्याक्सी’ सेवाप्रति आकर्षण उल्लेख्य रूपमा बढेको छ। विशेषगरी साङघाइ र आसपासका तटीय गन्तव्यबीच हेलिकोप्टरमार्फत हुने उडानहरू लोकप्रिय बन्दै गएका छन्।

सडक र फेरीमार्फत घण्टौं लाग्ने यात्रा अब करिब ३० मिनेटमै पूरा हुन थालेपछि यात्रुहरूले समय बचतका लागि हवाई विकल्प रोज्न थालेका हुन्। साङघाइबाट शेङ्सी टापुसम्मको उडानमा पुडोङ, लिङ्गाङ र डोङहाइ पुल हुँदै खुला समुद्रको दृश्य अवलोकन गर्न सकिने बताइएको छ।

साङघाइ न्यूस्काइ हेलिकोप्टरका क्याप्टेन स्यु जियानजुनका अनुसार छोटो र सहज उडानसँगै शहरको स्काइलाइन र समुद्री दृश्यले यात्रालाई विशेष बनाउने गरेको छ। यात्रुहरूका लागि आकर्षण केवल दृश्य मात्र नभई समयको बचत पनि हो। बस र फेरीबाट लामो समय लाग्ने यात्रा हवाईमार्गबाट बिहान गएर दिउँसो फर्किन सकिने गरी छोटिएको यात्रुहरूले बताएका छन्।

कम्पनीका उडान विभाग प्रमुख ली सिनका अनुसार स्प्रिङ फेस्टिभल ट्राभल रशका क्रममा बुकिङ सामान्य समयको तुलनामा करिब डेढ गुणा बढेको छ। यात्रुहरूले मिनी–प्रोग्राममार्फत अग्रिम बुकिङ गर्न सक्ने सुविधा उपलब्ध रहेको उनले जानकारी दिए।

यो सेवा याङ्त्से नदी डेल्टा क्षेत्रमा विकसित हुँदै गएको व्यापक यातायात प्रणालीको हिस्सा बन्दै गएको छ। चीनले प्रवर्द्धन गरिरहेको ‘लो–अल्टिच्युड इकोनोमी’ अवधारणाअन्तर्गत हेलिकोप्टर र साना हवाई साधनमार्फत छोटो दूरीका नियमित मार्ग विस्तार भइरहेका छन्, जसले क्षेत्रीय आवागमनलाई छिटो र प्रभावकारी बनाउने अपेक्षा गरिएको छ।

विशेषज्ञहरूका अनुसार चीनको न्यून उचाइको हवाई अर्थतन्त्र सन् २०३५ सम्म पाँच गुणाभन्दा बढी विस्तार हुने प्रक्षेपण गरिएको छ। हाल करिब ९३ अर्ब अमेरिकी डलर बराबरको बजार सन् २०३५ सम्म ४८३ अर्ब डलर पुग्ने अनुमान छ। यस वृद्धि यात्रु ढुवानीसँगै आपत्कालीन उद्धार, पर्यटन, व्यापारिक उडान तथा स्मार्ट सहर अवधारणासँग पनि जोडिएको बताइएको छ।

यद्यपि हवाई सुरक्षा, उडान मार्ग व्यवस्थापन र मूल्य निर्धारणजस्ता विषयमा नीतिगत बहस जारी रहे पनि स्प्रिङ फेस्टिभलजस्तो भीडभाडको समयमा छोटो दूरीको हवाई सेवा प्रभावकारी विकल्पका रूपमा स्थापित हुँदै गएको छ।

काठमाडौं । पाकिस्तानी सेनाले आइतबार बिहान अफगानिस्तानको सीमावर्ती क्षेत्रमा हवाई आक्रमण गरेको जनाएको छ। अल जजीराका अनुसार सेनाले तेहरिक-ए-तालिबान पाकिस्तान (टीटीपी) र इस्लामिक स्टेटसँग सम्बन्धित सात शिविर तथा लुक्ने स्थानलाई लक्षित गरेको दाबी गरेको छ।

पाकिस्तानी सरकारले हालै भएका आत्मघाती हमलापछि उक्त कारबाही प्रतिशोधात्मक भएको बताएको छ। सूचना तथा प्रसारण मन्त्रालयले जारी गरेको विज्ञप्तिमा यो गुप्तचर सूचनाका आधारमा गरिएको अपरेसन भएको उल्लेख छ। पाकिस्तानको भनाइअनुसार ती आक्रमणहरू अफगान भूमिबाट सञ्चालन भइरहेको नेटवर्कद्वारा योजनाबद्ध गरिएको बलियो प्रमाण आफूहरूसँग रहेको छ।

यता अफगान मिडिया आउटलेट टोलो न्यूजका अनुसार आक्रमण नान्गारहार प्रान्तको एक घरमा परेको थियो, जहाँ एकै परिवारका २३ जना सदस्य भग्नावशेषमुनि पुरिएको जनाइएको छ। हालसम्म चार जनालाई मात्र उद्धार गरिएको र आक्रमण हुँदा परिवार सुतिरहेको अवस्थामा रहेको उल्लेख गरिएको छ।

अमेरिकास्थित मानव अधिकार संस्था इन्टरनेशनल ह्युमन राइट्स फाउन्डेसनले महिला र बालबालिकासहित १६ जनाको मृत्यु भएको दाबी गरेको छ। यद्यपि, घटनाबारे आधिकारिक तथ्यांक भने अझै सार्वजनिक गरिएको छैन।

चितवन । चितवन क्षेत्र नं. ३ मा यसपटक नेपाली कांग्रेस र नेकपा (एमाले)का मतदाताले आफ्नै चुनाव चिह्नमा मतदान गर्न पाउने भएका छन्। विगतका निर्वाचनमा तालमेल र गठबन्धनका कारण दुवै दलले आफ्नो चुनाव चिह्न प्रयोग गर्न पाएका थिएनन्।

कांग्रेसले विसं २०७४ मा राष्ट्रिय प्रजातन्त्र पार्टीका विक्रम पाण्डे र विसं २०७९ मा नेपाल कम्युनिष्ट पार्टी (माओवादी केन्द्र)का डा. भोजराज अधिकारीलाई सघाएको थियो। त्यसैले ती निर्वाचनमा मतपत्रमा कांग्रेसको ‘रुख’ चिह्न थिएन।

त्यस्तै एमालेले विसं २०७४ मा माओवादी केन्द्रका अध्यक्ष पुष्पकमल दाहाल ‘प्रचण्ड’ र विसं २०७९ मा स्वतन्त्र उम्मेदवार दिनेश कोइरालालाई समर्थन गरेको थियो। २०७९ मा एमालेले आफ्ना मतदातालाई ‘माछा’ चिह्नमा मतदान गर्न निर्देशन दिएको थियो।

विसं २०७० को दोस्रो संविधानसभा निर्वाचनमा तत्कालीन कांग्रेस सभापति सुशील कोइराला निर्वाचित भएका थिए। पछि उनी प्रधानमन्त्री बने। क्षेत्र पुनःसंरचनापछि यो क्षेत्र नं. ३ मा समेटिएको हो।

विसं २०७४ मा एमाले र माओवादीबीच एकता भई नेकपा बनेपछि सो दलबाट उम्मेदवार बनेका प्रचण्ड निर्वाचित भएका थिए। उनले राप्रपाका विक्रम पाण्डेलाई ९ हजार ३४१ मतान्तरले पराजित गरेका थिए।

विसं २०७९ को निर्वाचनमा राप्रपाका विक्रम पाण्डे विजयी भएका थिए। उनले ३५ हजार ५५ मत प्राप्त गर्दा गठबन्धनका उम्मेदवार भोजराज अधिकारीले २५ हजार ८२२ मत ल्याएका थिए। स्वतन्त्र उम्मेदवार दिनेश कोइरालाले १२ हजार ५७ मत प्राप्त गरेका थिए भने राष्ट्रिय स्वतन्त्र पार्टीकी जिता बरालले १४ हजार ८४२ मतसहित तेस्रो स्थान हासिल गरेकी थिइन्।

आसन्न प्रतिनिधिसभा निर्वाचनमा कांग्रेसबाट टेकप्रसाद गुरुङ र एमालेबाट शंकरराज थपलिया उम्मेदवार छन्। माओवादी केन्द्रबाट रेनु दाहाल, राष्ट्रिय स्वतन्त्र पार्टीबाट सोविता गौतम र राप्रपाबाट दीपक थापामगर उम्मेदवार बनेका छन्। यस क्षेत्रमा दल र स्वतन्त्र गरी २३ जना उम्मेदवार चुनावी प्रतिस्पर्धामा छन्।

चितवन–३ मा भरतपुर महानगरपालिकाका १९ वडा र माडी नगरपालिका पर्छन्। यहाँ १ लाख ५५ हजार ३०९ मतदाता रहेका छन्, जसमध्ये ७५ हजार ६९६ पुरुष, ७९ हजार ६१२ महिला र एक जना तेस्रोलिङ्गी मतदाता छन्। ६३ मतदान स्थलका १७४ केन्द्रबाट मतदान हुने व्यवस्था गरिएको छ।

मुगु । फागुन २१ गते हुने प्रतिनिधिसभा निर्वाचनका लागि आवश्यक मतपत्रसहित ११ प्रकारका निर्वाचन सामग्री आइतबार बिहान मुगु आइपुगेको छ। निर्वाचन आयोगले सुर्खेतदेखि नेपाली सेनाको हेलिकप्टरमार्फत सामग्री ढुवानी गरेको हो।

जिल्ला निर्वाचन कार्यालयका अनुसार ४० हजार समानुपातिकतर्फ र ३९ हजार प्रत्यक्षतर्फका मतपत्रसहित सुई, धागो, स्वस्तिक छाप, स्टाम्प्याडलगायत ११ प्रकारका आवश्यक सामग्री जिल्लामा पुर्‍याइएको छ।

एक निर्वाचन क्षेत्र रहेको मुगुमा ३६ हजार ३१ मतदाता रहेका छन्। जिल्लाभर ६७ मतदान स्थल र ६९ मतदान केन्द्र तोकिएका छन्।

जिल्ला निर्वाचन कार्यालयका प्रमुख कमलप्रसाद उपाध्यायका अनुसार १४ गते मतदान अधिकृत र सहायक मतदान अधिकृतलाई तालिम सञ्चालन गरिनेछ। १५ गतेदेखि मतदान केन्द्रमा लैजाने सामग्री प्याकेजिङ गरिने र भूगोलका आधारमा १७ गतेदेखि मतदान अधिकृतसहितको टोली आ–आफ्ना स्थलतर्फ प्रस्थान गर्ने तयारी छ।

निर्वाचन सम्पन्न गराउन ७० मतदान अधिकृत, ७० सहायक मतदान अधिकृत, २१० सहायक कर्मचारी, १७९ स्वयंसेवक र ७० सहयोगीसहित कुल ५९९ कर्मचारी परिचालन गरिने छन्। सुरक्षाका लागि निर्वाचन प्रहरी, नेपाल प्रहरी, सशस्त्र प्रहरी र नेपाली सेनाका गरी १,५०० भन्दा बढी सुरक्षाकर्मी परिचालन गरिने जनाइएको छ।

काठमाडौँ । निर्वाचन आयोगका आयुक्त सगुन शमशेर जबराको परिवार ठगीको शिकार भएको छ। राम्रो जग्गा सस्तो मूल्यमा उपलब्ध गराइदिने प्रलोभनमा पर्दा आयुक्तकी श्रीमती सीमा राणा ठगिएकी हुन्।

सीमा राणालाई सस्तोमा जग्गा मिलाइदिने आश्वासन दिई १८ लाख ५० हजार रुपैयाँ ठगी गरेको आरोपमा सिन्धुली निवासी ४० वर्षीय मधु कार्कीविरुद्ध काठमाडौँ जिल्ला अदालतमा मुद्दा दायर गरिएको छ।

अभियोगपत्रअनुसार प्रतिवादी कार्कीले सीमा राणाका श्रीमान् (निर्वाचन आयुक्त) विदेश गएको मौकामा आफूलाई ‘दिदी’ नाता लगाई विश्वासमा पारेका थिए। उनले ‘एक स्थानमा अत्यन्त राम्रो र सस्तो जग्गा छ, तुरुन्त बैना नगरे अरूले लैजान्छन्’ भन्दै प्रलोभन देखाएका थिए। कार्कीको कुरामा विश्वास गरी राणाले जग्गाको बैनाबापत पटक–पटक गरी जम्मा २५ लाख रुपैयाँ तथा आफ्नो नागरिकताको प्रतिलिपि बुझाएकी थिइन्। तर रकम बुझेपछि कार्कीले न त जग्गा पास गरिदिए, न बैना कागज नै उपलब्ध गराए।

ठगिएको आशंका भएपछि राणाले रकम फिर्ता माग्दा कार्कीले ६ लाख ५० हजार रुपैयाँ मात्र फिर्ता गरेका थिए। बाँकी १८ लाख ५० हजार रुपैयाँ नफिर्ता गरी उनी लामो समयदेखि सम्पर्कविहीन रहेको अभियोगमा उल्लेख छ।

यस घटनामा निर्वाचन आयुक्तका सवारी चालक बलराम भुजेल र स्वकीय सचिव समीर भट्टराईले साक्षीका रूपमा बयान दिएका छन्। उनीहरूका अनुसार प्रतिवादी कार्कीले ‘दिदी’ नाता लगाएर घनिष्ठता बढाउँदै विश्वासघात गरेका थिए।

सप्तरी । जनता समाजवादी पार्टी, नेपालका अध्यक्ष उपेन्द्र यादवले मुलुकमा सङ्घीय प्रणालीको संरक्षण मधेसको बलियो उपस्थिति र निरन्तर खबरदारीमा निर्भर रहेको बताएका छन्।

सप्तरीमा आयोजित चुनावी सभालाई आइतबार सम्बोधन गर्दै उनले सङ्घीयताको स्थापना मधेसको सङ्घर्ष, बलिदान र आन्दोलनकै परिणाम भएको स्मरण गराए। “सङ्घीयतालाई असफल देखाउने, अधिकार कटौती गर्ने र पुनः केन्द्रीकृत शासनतर्फ फर्काउने प्रयास भइरहेका छन्,” उनले भने, “तर मधेस जागरूक रहँदा त्यस्ता कुनै पनि षड्यन्त्र सफल हुँदैनन्।”

सप्तरी निर्वाचन क्षेत्र नं. ३ बाट प्रतिनिधि सभा सदस्यका उम्मेदवारसमेत रहेका यादवले सङ्घीय व्यवस्थामाथि भइरहेको प्रहारप्रति गम्भीर चिन्ता व्यक्त गरे। उनले केही शक्तिहरू सङ्घीयतालाई कमजोर पार्दै अन्ततः समाप्त गर्ने दिशामा लागेको आरोप लगाए।

“मधेस प्रदेशको दृढ अडानकै कारण मुलुकमा सङ्घीयता धानिएको छ। मधेसले आवाज उठाउन छाड्यो भने सङ्घीयता कागजमा मात्र सीमित हुनेछ,” उनले बताए। अधिकारको संरक्षणका लागि मधेस सधैँ अग्रपंक्तिमा उभिएको दाबी गर्दै उनले मधेसलाई राजनीतिक, आर्थिक र प्रशासनिक रूपमा सुदृढ बनाउनु अपरिहार्य रहेको उल्लेख गरे।

सभामा उनले सङ्घीयताको रक्षा, अधिकार सुनिश्चितता र स्वाभिमानको संरक्षणका लागि मतदानमार्फत जसपा नेपाललाई बलियो बनाउन मतदातासँग अपिल गरेका छन्।