गोरखा । राष्ट्रिय स्वतन्त्र पार्टी (रास्वपा) का सभापति रवि लामिछानेले सिंहदरबार पुनः निर्माण गर्न सकिने भए पनि आमाले गुमाएको सन्तानको क्षति कहिल्यै पूर्ति हुन नसक्ने बताएका छन्।

आज रास्वपाले गोरखा सदरमुकाममा आयोजना गरेको चुनावी सभालाई सम्बोधन गर्दै उनले जेनजी आन्दोलनका क्रममा पहिले गोली चलेको र त्यसपछि मात्र सिंहदरबारमा आगजनी भएको दाबी गरे। “यहाँ भ्रम फैलाइएको छ—सिंहदरबार जलायो, विध्वंस गर्‍यो भनेर। तर २३ गते गोली नचलेको भए केही पनि जल्ने थिएन,” उनले भने, “जो ढल्यो, त्यो फेरि कहिल्यै उठ्दैन। रित्तिएको आमाको कोख कहिल्यै भरिँदैन। सिंहदरबार हामी पुनः निर्माण गर्छौँ। सरकारी संरचना जलेकामा हामीले गौरव गरेका छैनौँ।”

उनले आफू वा अन्य कोही पनि प्रश्नभन्दा माथि नरहेको उल्लेख गर्दै उत्तरदायित्व र पारदर्शिताको आवश्यकता औंल्याए। लामिछानेले आजै पालुङटार नगरपालिकामा आयोजित अर्को चुनावी सभालाई पनि सम्बोधन गरेका थिए।

काठमाडौँ । एक समय विवाह नगरी बच्चा जन्माउने अभिव्यक्ति दिएर चर्चामा रहेकी अभिनेत्री नम्रता सापकोटा वैवाहिक जीवनमा बाँधिएकी छन् । उनले बिहीबार ओजस नामक युवकसँग विवाह गरेकी हुन् ।

उनको विवाह समारोह नागार्जुन–सितापाइलास्थित निजी निवासमा आयोजना गरिएको थियो । समारोहमा सीमित पारिवारिक सदस्यहरूको मात्र उपस्थिति रहेको थियो ।

उनले बुधबार साँझ मेहन्दी समारोहको तस्बिर सामाजिक सञ्जालमा सार्वजनिक गर्दै आफू विवाह बन्धनमा बाँधिन लागेको जानकारी दिएकी थिइन् । यद्यपि, उनले श्रीमानबारे विस्तृत जानकारी भने खुलाएकी थिइनन् । पछिल्लो समय उनी ओशो सन्न्यासीका रूपमा समेत देखिएकी थिइन् ।

पछिल्लोपटक फिल्म ‘नम्बरी सुन’मा देखिएकी नम्रताले सन् २०१३ मा प्रदर्शन भएको फिल्म ‘अन्तराल’बाट अभिनय यात्रा सुरु गरेकी थिइन् । उनले हालसम्म एक दर्जनभन्दा बढी फिल्ममा अभिनय गरिसकेकी छन् ।

सर्लाही । सर्लाहीको लालबन्दीमा आयोजित कार्यक्रममा श्रम संस्कृति पार्टीका अध्यक्ष हर्क साम्पाङले आफ्नो पार्टीको मूल विचार श्रम, आत्मनिर्भरता र राष्ट्रिय स्वाभिमानमा आधारित रहेको बताएका छन्।

कार्यक्रमलाई सम्बोधन गर्दै उनले विदेशी सोच र सहयोगमा होइन, आफ्नै पसिना र परिश्रमले देश निर्माण गर्ने अडानसहित श्रम संस्कृति पार्टी अघि बढिरहेको दाबी गरे। देश परिवर्तनको चाहना राख्ने सबैका लागि पार्टी साझा मञ्च भएको उल्लेख गर्दै उनले साथ र समर्थनका लागि अपिल गरे।

मधेश प्रदेशमा पहिलो पटक औपचारिक सम्बोधन गर्न आएको उल्लेख गर्दै साम्पाङले यहाँ अन्य क्षेत्रको तुलनामा बढी चुनौती रहेको संकेत गरे। यद्यपि उनले ती चुनौतीहरूको विस्तृत विवरण नदिए पनि समाधानका लागि श्रम संस्कृति पार्टीलाई सशक्त बनाउन आवश्यक रहेको धारणा राखे।

कार्यक्रममा उनले सर्लाही निर्वाचन क्षेत्र नम्बर १ का प्रतिनिधिसभा सदस्य उम्मेदवार सुमन अधिकारीलाई इमानदार र योग्य व्यक्तिको रूपमा प्रस्तुत गर्दै विजयी गराउन आग्रह गरे। ठट्यौली शैलीमा उनले भने, “उहाँ असल हुनुहुन्छ भने भोट दिनुहोस्, नराम्रो लागे नदिनुहोस्।” उक्त अभिव्यक्तिले कार्यक्रममा उपस्थित कार्यकर्तामाझ हाँसो र उत्साह पैदा गरेको थियो।

आफ्नो कार्यकालको अनुभव सुनाउँदै उनले धरानका बासिन्दाका लागि मेयर हुँदा साढे तीन वर्षसम्म व्यक्तिगत रूपमा श्रममा संलग्न भई विकास निर्माणमा लागेको बताए। शनिबारसमेत काम गर्दै श्रम संस्कृतिको अभ्यास गरेको उनको भनाइ थियो। पार्टीभित्र नेता–कार्यकर्ताबीच भेदभाव नहुने र सबै श्रमिकको भूमिकामा रहने उनले स्पष्ट पारे।

आफ्नो स्वभावबारे टिप्पणी गर्दै उनले आफू बाहिरबाट कठोर देखिए पनि भित्री रूपमा सरल र सकारात्मक रहेको बताए। साथै उनले विदेशी शक्तिसँग नझुक्ने तर समान हैसियतमा मित्रता कायम गर्ने नीति रहेको उल्लेख गरे। “हामी कसैको टाउकोमा टेक्न दिँदैनौँ, नेपाल आमाको छातीमाथि विदेशी बुट बजार्न दिँदैनौँ,” उनले जोड दिए।

विकासभन्दा पनि देशको अस्तित्व र स्वाभिमान महत्वपूर्ण हुने उल्लेख गर्दै उनले राष्ट्रिय स्वाभिमान जोगाउन श्रम संस्कृति पार्टीलाई मत दिन आग्रह गरे। “देश बनाउने अभियानमा दुई अञ्जुली माटो जोगाउन हामीलाई साथ दिनुहोस्,” भन्दै उनले भावुक अपिल गरे।

धनगढी । बैतडीमा नेकपा एमाले र राष्ट्रिय स्वतन्त्र पार्टी (रास्वपा) का कार्यकर्ताबीच झडप हुँदा एमालेका दुई जना कार्यकर्ता घाइते भएका छन्।

प्रहरीका अनुसार निर्वाचन प्रचारप्रसारका क्रममा घरदैलो कार्यक्रम सञ्चालन भइरहेका बेला डिलासैनी गाउँपालिका–७ अन्तर्गत लेक टोलमा दुवै पक्षका कार्यकर्ताबीच विवाद बढ्दै झडप भएको हो।

जिल्ला प्रहरी कार्यालय बैतडीका प्रवक्ता प्रहरी निरीक्षक सुरज सिंहका अनुसार झडपमा परी डिलासैनी–७ निवासी एमाले निकट युवा संघका जिल्ला सदस्य जनक धामी र सोही ठाउँका माधव धामी घाइते भएका छन्।

प्रहरीका अनुसार जनक धामीको टाउको र निधारमा चोट लागेको छ भने माधव धामीको ढाड र दाहिने खुट्टामा चोट लागेको छ। दुवै जनाको गोकुलेश्वर अस्पताल, दार्चुलामा उपचार भइरहेको छ।

घटनापछि प्रहरीले रास्वपाका पाँच जना कार्यकर्तालाई नियन्त्रणमा लिएको जनाएको छ। घटनाबारे थप अनुसन्धान भइरहेको प्रहरीले जनाएको छ।

काठमाडौं । हाल देशमा पश्चिमी न्यूनचापीय प्रणालीको आंशिक प्रभाव देखिएको छ। यसको प्रभावका कारण देशका पहाडी तथा हिमाली भूभागमा सामान्यदेखि आंशिक बदली रहेको छ। विशेषगरी कोशी, बागमती र गण्डकी प्रदेशका पहाडी तथा हिमाली क्षेत्रका एक–दुई स्थानमा मेघगर्जन र चट्याङसहित हल्का वर्षा भइरहेको छ। तराई भूभागमा भने मौसम मुख्यतः सफा रहेको छ।

आज दिउँसो तराईका केही स्थानमा बिहानको समयमा हुस्सु देखिन सक्ने सम्भावना छ। कोशी, बागमती र गण्डकी प्रदेशका पहाडी तथा हिमाली भूभागमा सामान्य बदली रहनेछ भने अन्य पहाडी तथा हिमाली क्षेत्रमा आंशिक बदली रहने मौसम पूर्वानुमान छ। ती प्रदेशका थोरै स्थान तथा बाँकी प्रदेशका एक–दुई स्थानमा मेघगर्जन र चट्याङसहित हल्का वर्षा तथा हिमपातको सम्भावना रहेको छ।

आज राति तराईका केही स्थानमा तुवाँलो लाग्ने अनुमान गरिएको छ। देशका हिमाली भूभागमा सामान्य बदली रहनेछ भने पहाडी क्षेत्रमा आंशिक बदली रहनेछ। तराई भूभागमा मौसम मुख्यतः सफा रहनेछ। कोशी, गण्डकी र कर्णाली प्रदेशका हिमाली क्षेत्रका एक–दुई स्थानमा मेघगर्जन, चट्याङसहित हल्का वर्षा तथा हिमपातको सम्भावना रहेको मौसमविद्ले बताएका छन्।

मकवानपुर । पूर्व–पश्चिम राजमार्गअन्तर्गत मकवानपुरको हेटौँडा उपमहानगरपालिका–१९ बस्तीपुरमा बुधबार बिहान भएको सवारी दुर्घटनामा दुई जनाको ज्यान गएको छ।

ना.४३ प २२१ नम्बरको मोटरसाइकललाई हाल नम्बर खुल्न नसकेको सवारी साधनले ठक्कर दिँदा मोटरसाइकलमा सवार दुवै जनाको मृत्यु भएको प्रहरीले जनाएको छ।

दुर्घटनामा मकवानपुरको राक्सिराङ गाउँपालिका–१ का २२ वर्षीय संजित स्याङ्तान र सोही स्थानका १८ वर्षीय अमोश थिङको मृत्यु भएको हो। ठक्करबाट गम्भीर घाइते भएका उनीहरूलाई तत्काल उपचारका लागि हेटौँडास्थित चुरेहिल अस्पताल पुर्‍याइएको थियो। उपचारकै क्रममा उनीहरूको ज्यान गएको प्रहरीले जानकारी दिएको छ।

दुर्घटनापछि ठक्कर दिने सवारी साधन र चालक फरार रहेका छन्। प्रहरीले घटनास्थल आसपासका सीसीटीभी फुटेज अध्ययन गर्नुका साथै प्रत्यक्षदर्शीसँग सोधपुछ गरी फरार सवारी र चालकको खोजी तीव्र पारेको जनाएको छ।

घटनाबारे आवश्यक कानुनी अनुसन्धान भइरहेको जिल्ला प्रहरी कार्यालयले जनाएको छ।

काठमाडौँ । मेडिकल व्यवसायी दुर्गा प्रसाईंले नेपाली कांग्रेसकी नेतृ आरजु राणा देउवा र नेता पूर्णबहादुर खड्का सँगको आफ्नो सार्वजनिक तस्बिरबारे स्पष्टीकरण दिएका छन्। सामाजिक सञ्जालमा उक्त तस्बिर भाइरल भएपछि प्रसाईंले तस्बिर सक्कली नै भएको स्वीकार्दै, आफ्नो हातमा सत्ता आए सबैभन्दा पहिले ती नेताहरूलाई जेल हाल्ने दाबी गरेका छन्।

प्रसाईंले तस्बिर आर्टिफिसियल इन्टेलिजेन्स (एआई) ले बनाएको होइन भनी स्पष्ट पारेका छन्। उनका अनुसार करिब अढाई वर्षअघि कुनै नेताको घरमा भेट हुँदा उक्त तस्बिर खिचिएको थियो। उनी आरजुसँग आफ्नो स्कुल सम्बन्धी विषय बुझ्न गएका बेला फोटो खिचिएको दाबी गर्छन्। प्रसाईंले फोटो खिच्नु कुनै ठूलो विषय नभएको र मानिसको नियतमाथि मात्र ध्यान दिनुपर्ने बताए।

उनले आफ्नो हातमा देशको नेतृत्व आए, आरजु देउवा र केपी शर्मा ओली समेतलाई पहिलो चरणमा जेल हाल्ने योजना रहेको बताए। प्रसाईंले आफू हिरासतमा रहेको बेला पुरानो फोटोलाई नयाँ मितिसहित सार्वजनिक गरिएको आरोप समेत लगाए।

उनले सर्वहारा, सीमान्तकृत वर्ग, निजामती कर्मचारी, प्रहरी र सेनाको तलब वृद्धि गर्ने विषय आफूको मुख्य एजेन्डा रहेको र भुइँमान्छेको पक्षमा लडिरहेको जिकिर गरे।

काठमाडौं । रूसले युक्रेन माथि आक्रमण सुरु गरेको चौथो वर्षगाँठका अवसरमा मंगलबार संयुक्त राष्ट्रसंघको महासभा ले युक्रेनको समर्थनमा प्रस्ताव पारित गरेको छ। तर यस मतदानमा संयुक्त राज्य अमेरिका तटस्थ बसेको छ।

महासभाले पारित गरेको प्रस्तावमा युक्रेनको सार्वभौमिकता, स्वतन्त्रता, एकता तथा अन्तर्राष्ट्रिय रूपमा मान्यता प्राप्त सीमाभित्रको भौगोलिक अखण्डताप्रति प्रतिबद्धता दोहोर्याइएको छ। प्रस्ताव १०७ देशको समर्थनमा, १२ देशको विरोधमा र ५१ देशको तटस्थतामा पारित भएको हो।

प्रस्तावमा तत्काल र बिना शर्त युद्धविरामसहित समग्र, न्यायपूर्ण र दीर्घकालीन शान्ति स्थापना गर्न आग्रह गरिएको छ। मतदानअघि अमेरिकाले युक्रेनको भौगोलिक अखण्डता र अन्तर्राष्ट्रिय कानुनसम्बन्धी विषय छुट्टै मतदानमा राख्न प्रस्ताव गरे पनि उक्त प्रस्ताव अस्वीकार गरिएको थियो।

जो बाइडेन बाट डोनाल्ड ट्रम्प मा सत्ता हस्तान्तरणपछि अमेरिकाको युक्रेनप्रतिको अडान कमजोर भएको विश्लेषण गरिएको छ। ट्रम्प प्रशासनले भ्लादिमिर पुटिन सँग कूटनीतिक सक्रियता बढाएको छ भने २०२२ को रूसी आक्रमणप्रति पहिलाजस्तो कडा अभिव्यक्ति नदिएको उल्लेख गरिएको छ।

काठमाडौं । इरान को इस्फहान प्रान्तस्थित एक फलफूल तथा तरकारी बजार क्षेत्रमा मंगलबार सैन्य हेलिकप्टर दुर्घटनाग्रस्त हुँदा पाइलट र सह–पाइलटसहित चार जनाको मृत्यु भएको छ।

इरानी सरकारी टेलिभिजनका अनुसार उक्त हेलिकप्टर प्रशिक्षण मिसनमा रहेको बेला दुर्घटना भएको हो। दुर्घटनापछि बजार क्षेत्रबाट बाक्लो धुवाँ निस्किएको र घटनास्थल वरिपरि भग्नावशेष छरिएको देखिएको थियो।

Fars News Agency का अनुसार दुर्घटनामा बजारमा रहेका दुई सर्वसाधारण नागरिकको पनि ज्यान गएको छ। यससँगै मृतकको संख्या चार पुगेको पुष्टि गरिएको छ।

यो एक साताभित्र इरानमा भएको दोस्रो सैन्य हवाई दुर्घटना हो। यसअघि पश्चिमी शहर हमेदान नजिकै एफ–४ लडाकु विमान दुर्घटना हुँदा एक पाइलटको मृत्यु भएको थियो।

इरानको सैन्य तथा व्यावसायिक उड्डयन बेडा पुरानो हुँदै गएको छ। पश्चिमा प्रतिबन्धका कारण स्पेयर पार्ट्स आपूर्तिमा अवरोध आएको र त्यसले मर्मतसम्भार तथा सञ्चालन प्रक्रियामा चुनौती थपिएको बताइएको छ।