काठमाडौँ: राष्ट्रिय स्वतन्त्र पार्टीले कार्यवाहक सभापतिको जिम्मेवारी उपसभापति डिपी अर्याललाई दिएको छ। शुक्रबार साँझ पार्टीका सभापति रवि लामिछानेलाई उच्च अदालत तुलसीपुर, बुटवल इजलासको आदेशमा पक्राउ गरेपछि बसेको केन्द्रीय सचिवालयको बैठकले उक्त निर्णय गरेको हो।

बैठकले अदालतको निर्णयप्रति सम्मान प्रकट गर्दै संविधान, कानुन र न्याय प्रणालीमा विश्वास राखी आवश्यक कानुनी प्रक्रियामार्फत न्यायका लागि अगाडि बढ्ने निर्णयसमेत गरेको छ।

त्यसैगरी, आज चैत २३ गते शनिबार अपराह्न २ बजे चितवनको भरतपुरमा आयोजना हुने पार्टीको सार्वजनिक कार्यक्रम शान्तिपूर्ण र मर्यादित ढंगले सम्पन्न होस् भन्ने उद्देश्यले बैठकले संयमित र जिम्मेवार भूमिका निर्वाह गर्न सबैलाई निर्देशन दिएको छ।

काठमाडौं । संसारमै सबैभन्दा सस्तो आइफोन पाइने देशका रूपमा चिनिएको अमेरिका अब यो सूचीबाट हट्न सक्छ। अमेरिकी राष्ट्रपति डोनाल्ड ट्रम्पद्वारा हालै घोषणा गरिएको नयाँ कर संरचनाले आइफोनको मूल्यमा भारी वृद्धि हुने संकेत देखिएको छ।

ट्रम्पले चीन, भियतनाम र भारतबाट आयात हुने सामानमा कर वृद्धि गरेसँगै आइफोन पनि महँगिने भएको हो। चीन एप्पलको मुख्य उत्पादन केन्द्र हो, र त्यहाँ निर्मित आइफोन अमेरिका ल्याउँदा अब थप कर लाग्नेछ।

रोजेनब्लाट सेक्युरिटीजका अनुसार, अमेरिकामा आइफोनको शीर्ष भेरियन्टको मूल्य अब २३०० डलर (झन्डै ३ लाख १३ हजार रुपैयाँ) सम्म पुग्न सक्छ। हाल १ टिबी क्षमताको आइफोन १६ प्रो म्याक्स १५९९ डलरमा उपलब्ध छ।

अमेरिकाले भारतबाट आयात हुने वस्तुमा पनि २७ प्रतिशत कर लगाएको छ। यस्तो अवस्थामा, भारतमा उत्पादन गरिएका आइफोनको मूल्यमा समेत असर पर्न सक्नेछ।

पहिले नै चीनमाथि २० प्रतिशत कर लगाइसकेको अमेरिका अब थप ३४ प्रतिशत कर लगाउने तयारीमा रहेको छ। यस निर्णयको प्रत्यक्ष प्रभाव एप्पलको शेयर मूल्यमा पनि परेको छ, जुन कर घोषणा भएदेखि ९ प्रतिशतभन्दा बढीले घटेको बताइएको छ।

काठमाडौँ: रास्वपाका सभापति रवि लामिछानेलाई थुनामा पठाउने आदेश भएको छ।

उच्च अदालत तुलसीपुरको बुटवल इजलासले सहकारी ठगी प्रकरणमा लामिछानेलाई थुनामा पठाउने आदेश दिएको हो।

जिल्ला अदालत रुपन्देहीको आदेश बदर गर्दै अदालतले शुक्रबार थुनामा पठाउने निर्णय गरेको हो।

काठमाडौं । प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच आज थाइल्याण्डको बैंककमा भेटवार्ता भएको छ।

बिम्स्टेकको छैटौँ शिखर सम्मेलन सम्पन्न भएपछि उनीहरूबीच द्विपक्षीय वार्ता भएको हो।

भेटपछि भारतीय प्रधानमन्त्री मोदीले बैठक फलदायी रहेको बताउँदै नेपाल-भारत सम्बन्धलाई भारतले उच्च प्राथमिकता दिएको उल्लेख गरे।

‘हामीले ऊर्जा, कनेक्टिभिटी, संस्कृति, डिजिटल प्रविधिजस्ता विषयमा छलफल गर्यौं। साथै, विपद् व्यवस्थापन र समुद्री यातायातका क्षेत्रमा बिम्स्टेक शिखर सम्मेलनले ल्याएका सकारात्मक उपलब्धिहरूबारे पनि कुराकानी गर्‍यौं,’ मोदीले सामाजिक सञ्जालमार्फत प्रतिक्रिया दिएका छन्।

बैंकक: प्रधानमन्त्री केपी शर्मा ओलीले थाइल्याण्डको आफ्नो पहिलो औपचारिक भ्रमण ऐतिहासिक रहेको बताउँदै बिम्स्टेकको छैटौँ शिखर सम्मेलन सफल भएको उल्लेख गरेका छन्।

बैंककमा रहेका प्रधानमन्त्री ओलीले स्वदेश फर्कनु एक दिनअघि, प्रिदीबानोमयाङस्थित नेपाली राजदूतावासको अवलोकन गर्दै भ्रमण फलदायी भएको बताए।

नेपाल र थाइल्याण्डबीच कूटनीतिक सम्बन्ध स्थापना भएको ६६ वर्षमा नेपालका प्रधानमन्त्रीले गरेको यो पहिलो भ्रमण हो। ओलीले द्विपक्षीय भेटवार्ताले दुई मुलुकबीचको सम्बन्ध थप मजबुत बनाएको बताए।

भ्रमणका क्रममा प्रधानमन्त्री ओलीले थाइल्याण्डका प्रधानमन्त्री पेथोङथान शिनावात्रालाई नेपालको औपचारिक भ्रमणको निमन्त्रणा दिए। साथै, संस्कृति, पर्यटनसहित आठ विषयमा सम्झौतामा हस्ताक्षर भएको जानकारी गराए।

प्रधानमन्त्री ओलीले आफ्नै जग्गामा नेपाली राजदूतावास सञ्चालन भएकामा खुसी व्यक्त गर्दै थप पूर्वाधार विकास आवश्यक रहेको औँल्याए। भ्रमण दलका सदस्यहरूले पनि दूतावास अवलोकन गरे।

थाइल्याण्डका लागि नेपाली राजदूत धनबहादुर वलीले दूतावासको नयाँ भवन निर्माण आवश्यक रहेको र थप जग्गा विस्तार गर्नुपर्ने जानकारी गराएका थिए।

आज साँझ दूतावासले प्रधानमन्त्री ओलीको सम्मानमा स्वागत समारोह आयोजना गर्‍यो, जहाँ भ्रमण दलका सदस्यहरू तथा नेपाली समुदायका प्रतिनिधिहरू सहभागी भए।

शिखर सम्मेलनले व्यापार विस्तार, सम्पर्क सञ्जाल र मानवीय सुरक्षालाई प्राथमिकता दिँदै **”बिम्स्टेक बैंकक भिजन”**सहित छबुँदे प्रस्ताव पारित गरेको थियो।

काठमाडौं: नेपाल विद्युत् प्राधिकरणका पूर्व कार्यकारी निर्देशक कुलमान घिसिङले विद्युत् महसुल बक्यौता उठाएकै कारण आफूलाई सरकारले पदबाट हटाएको स्पष्टीकरण दिएका छन्।

शुक्रबार पत्रकार सम्मेलन गर्दै घिसिङले आफूले विद्युत् महसुल बक्यौता अदालतको आदेशअनुसार उठाएको तर सरकारले बक्यौता उठाएकै कारण आफूलाई हटाएको बताएका हुन्। उनले आफूले बक्यौता नउठाउन आएका दबाब र प्रभाव अस्वीकार गरेको पनि बताए।

‘बक्यौता उठाउने मेरो प्रयास नै म पदबाट हट्नुपर्ने मुख्य कारण बनेको छ,’ घिसिङले पत्रकार सम्मेलनमा भने, ‘सार्वजनिक संस्थाको बक्यौता उठाउन खोज्ने मेरो प्रयास राज्यविरुद्धको अपराध हो ? यसको जवाफ इतिहास र नेपाली जनताले अवश्य माग्नेछ।’

उनले संस्था र राष्ट्रप्रति घात गर्न नसकेको भन्दै कानुनअनुसार नै काम गर्दा समेत दबाब र प्रभाव थेग्नुपरेको बताए।