भिजिट भिसा प्रकरणको असर: संसद् आज पनि अवरुद्ध, बजेटमाथि सामान्य छलफलको कार्यसूची
काठमाडौं, २३ जेठ — संघीय संसद् अन्तर्गत प्रतिनिधिसभा र राष्ट्रियसभा दुबै सदनको बैठक आज बस्दैछ। तर, भिजिट भिसा प्रकरणमा गृहमन्त्री रमेश लेखकको राजीनामाको माग गर्दै विपक्षी दलले संसद् अवरुद्ध गरिरहेकाले आजको बैठकमा पनि गतिरोध कायम रहने अनुमान गरिएको छ।
प्रतिनिधिसभाको बैठक दिउँसो १ः०० बजेका लागि बोलाइएको छ। बैठकमा उपप्रधानमन्त्री तथा अर्थमन्त्री विष्णुप्रसाद पौडेलले “आर्थिक वर्ष २०८२/८३ को राजस्व र व्ययको वार्षिक अनुमानमाथि सामान्य छलफल गरियोस्” भन्ने प्रस्ताव पेस गर्ने कार्यसूची तय गरिएको छ। साथै, संघीय निजामती सेवा विधेयकसम्बन्धी प्रतिवेदन पनि राज्य व्यवस्था तथा सुशासन समितिका सभापति रामहरि खतिवडाले पेस गर्नेछन्।
त्यस्तै, राष्ट्रियसभाको बैठक दिउँसो १ः१५ बजे बस्ने छ, जसमा बजेट अनुमानमाथिको छलफल जारी रहने कार्यक्रम छ।
विपक्षीको लगातार संसद् अवरोध
विपक्षी दलहरू भिजिट भिसा प्रकरणमा गृहमन्त्री लेखकको संलग्नतामाथि आशंका व्यक्त गर्दै १० दिनदेखि संसद् अवरुद्ध गर्दै आएका छन्। त्रिभुवन अन्तर्राष्ट्रिय विमानस्थलमा भएको भिजिट भिसा प्रकरणमा अध्यागमन विभागका महानिर्देशक एवं गृह मन्त्रालयका सहसचिव तीर्थराज भट्टराई पक्राउ परेपछि गृहमन्त्रीमाथि समेत दबाब बढेको हो।
यद्यपि, गृहमन्त्रीमाथि प्रत्यक्ष उजुरी दर्ता नभएको र अख्तियारको छानविन दायरामा नपरेको अवस्थामा विपक्षीहरूले राजीनामा र छानविन समिति गठनको माग गरिरहेका छन्। सत्तापक्ष भने गृहमन्त्रीको राजीनामा कुनै हालतमा नहुने अडानमा उभिएको छ।
अख्तियारको अनुसन्धान जारी
अख्तियार दुरुपयोग अनुसन्धान आयोगले जेठ ७ गते भट्टराईलाई नियन्त्रणमा लिएर सोही दिन छाडेको थियो। प्रारम्भिक बयानपछि अख्तियारले मोबाइल, ल्यापटप लगायतका उपकरणहरूबाट थप प्रमाण संकलन गरिरहेको छ। भट्टराईको अर्को बयान जेठ २५ गते तय गरिएको छ।
संवैधानिक बाध्यता र बजेट
जेठ १५ को बजेट भाषण संविधानतः अनिवार्य भएकाले त्यस दिन विपक्षीले संसद् अवरुद्ध गरेनन्। तर त्यसपछिका सबै बैठक अवरुद्ध भइरहेका छन्। विपक्षी गृहमन्त्रीको राजीनामा र छानविन समिति गठन गराएरै छाड्ने रणनीतिमा छन्, तर सत्तापक्षले अडान नछाड्ने संकेत दिइरहेको छ।
