कञ्‍चनपुर — बैतडीको दोगडाकेदार गाउँपालिका–७ चडेपानीकी १७ वर्षीया किशोरी भागरथी भट्टको हत्या प्रकरणमा अभियुक्तका रूपमा सार्वजनिक गरिएका किशोर निर्दोष रहेको उनको परिवारले दाबी गरेको छ ।दीपकराज भट्ट आइतबार महेन्द्रनगरमा । तस्बिर: कान्तिपुर

प्रहरीले फागुन ५ मा अभियुक्त सार्वजनिक गरेका सोही गाउँका १६ वर्षीय किशोरका बुबा दीपकराजले छोरालाई धम्क्याएर फसाइएको बताएका हुन् ।

अभियुक्त किशोर अहिले डोटीको सिलगढीस्थित बाल सुधार केन्द्रमा छन् । बुबा र भाइलाई मार्ने धम्की आएपछि प्रहरीसमक्ष अपराध स्विकारेको बताएको दीपकराजले बताए । ‘मैले मारेको हुँ नभने तेरो बुबा र भाइलाई मारिदिन्छौं भन्ने धम्की आएको थियो,’ छोराको भनाइ उद्धृत गर्दै आइतबार महेन्द्रनगरमा आयोजित पत्रकार सम्मेलनमा उनले भने, ‘भागरथीको हत्या हुँदा मैले देखेको हुँ, एउटाले मास्क लगाएको थियो, चिन्न सकिनँ । अर्कोलाई राम्ररी चिन्छु, ती दोगडाकेदार गाउँपालिकाकै प्राविधिक कर्मचारी हुन् ।’

दीपकराजका अनुसार माघ २१ गते विद्यालयबाट घर गइरहेका बेला उनका छोराले बाटोमा उक्त घटना देखे । घटनामा संलग्न दुईमध्ये एकले घाँटीमा चक्कु राखेर उक्त कुरा कतै नखोल्न धम्क्याएका थिए । ‘तेरो बुबा र भाइ अस्पताल गएका छन्, कतै भनिस् भने दुवैलाई मारिदिन्छौं भनेर धम्क्याएका रहेछन्,’ छोरालाई भेटेर फर्केका उनले भने, ‘त्यही भएर अपराध स्विकारेको हुँ भन्छ ।’ उनका कान्छा छोरा विनोद सुस्त मनस्थितिका छन् । घटना हुनुभन्दा केही दिनअघि उनको दायाँ हात पनि भाँचिएको थियो । त्यसकै उपचारका लागि दीपकराज नियमित रूपमा डडेलधुरा आउजाउ गरिरहन्थे ।

पछिल्लोपटक दीपकराज गाउँ छाडेर परिवारसहित महेन्द्रनगर बसाइँ सरेका छन् । उनलाई शुक्रबार बाल सुधार गृहबाट फोन गरेर उनका छोराले केही कुरा गर्न भन्दै बोलाएका थिए । शनिबार सिलगढीमा छोरालाई भेटेर आइतबार महेन्द्रनगर फर्किएका हुन् । ‘अब तपाईंले गाउँ छाड्नु भो, उसले केही गर्न सक्दैन, सत्य कुरा गर्दै छु भन्दै मसँग रुन थाल्यो,’ दीपकराजले भने, ‘त्यतिबेला मेरै सामुन्ने अपराध स्विकारिस्, अहिले मैले गरेको होइन भन्छस् भनेर मैले सोध्दा पनि उसले सत्य कुरा यही हो भन्यो ।’ उनका अनुसार दिनेशले सुधार गृहका सुरक्षाकर्मीकै अगाडि उक्त कुरा भनेका थिए ।

दीपकराजले वास्तविक अपराधीलाई छाडेर निर्दोषलाई फसाउन खोजिएको भन्दै न्यायका लागि हारगुहार गरे । माघ २१ गते बलात्कारपछि हत्या गरिएकी भागरथीको घटनाको मुख्य आरोपितका रूपमा प्रहरीले फागुन ५ गते ती किशोरलाई पक्राउ गरेको थियो । घटनाको अनुसन्धानमा सुदूरपश्चिम प्रदेश प्रहरी प्रमुख डीआईजी उत्तमराज सुवेदी आफैं खटिएका थिए । आरोपित सार्वजनिक गरेपछि मात्रै सुवेदी धनगढी फर्केका हुन् । जिल्ला अदालत बैतडीले ती किशोरलाई बाल सुधार केन्द्र पठाएको हो । छोरासँगैका साथी स्कुल गइरहेको देखेर दुःख लागेपछि गाउँ छाडेर आएको उनले बताए । ‘गहुँ छरेको थिएँ, त्यत्तिकै छाडेर आएँ,’ उनले भने, ‘अब गहुँ पाकेपछि काट्न जान्छु ।’

सुदूरपश्चिम प्रहरी प्रमुख डीआईजी सुवेदीले तथ्य र प्रमाणसहित अनुसन्धान प्रतिवेदन जिल्ला सरकारी वकिलको कार्यालयमा बुझाइएको र सोहीअनुसार अदालतमा मुद्दा दायर भई प्रतिवादी पुर्पक्षका लागि गइसकेकाले थप बोल्न नमिल्ने बताए । प्रहरीका अनुसार आरोपितसँग अभिभावकको रोहबरमा बयान लिइएको थियो ।

मुद्दा दायरपछि थुनछेक बहसका क्रममा अदालतले पनि उनका बाबुको रोहबरमा बयान लिएको थियो । त्यसपछि प्राप्त प्रमाणका आधारमा अदालतले आरोपितलाई पुर्पक्षमा पठाएको थियो ।

प्रहरीले सुरुवाती अनुसन्धानकै क्रममा भागरथीको योनिबाट निकालिएको भजाइनल स्वाब र आरोपितको वीर्य डीएनए परीक्षणका लागि ल्याबमा पठाएको थियो तर रिपोर्ट आउन ढिला भएपछि त्यसबाहेकको प्रतिवेदन प्रहरीले सरकारी वकिलको कार्यालयमा बुझाएको थियो । अदालतमा डीएनए रिपोर्टबाहेककै आरोपपत्र पेस गरिएको थियो । बहसका क्रममा आवश्यक ठानेमा अदालतले रिपोर्ट झिकाउन सक्छ ।

कान्तिपुरबाट साभार

काठमाडौँ — राष्ट्रपति विद्यादेवी भण्डारीले नेपाल र बंगलादेशबीचको द्विपक्षीय र जनस्तरको सम्बन्धलाई थप सुदृढ बनाउन आफ्नो भ्रमण कोसेढुंगा साबित हुने बताएकी छन् । दुईदिने राजकीय भ्रमणका लागि सोमबार ढाका प्रस्थान गर्नुअघि उनले राष्ट्रपति कार्यालयको ट्विटर ह्यान्डलमार्फत ट्विट गर्दै यस्तो बताएकी हुन् ।

राष्ट्रपति भण्डारी बंगलादेशका राष्ट्रपति मोहम्मद अब्दुल हमिदको मैत्रीपूर्ण निमन्त्रणामा त्यहाँका राष्ट्रपिता बंगबन्धुको जन्म शतवार्षिकीको उपलक्ष्यमा आयोजित कार्यक्रममा सहभागी हुँदै छिन् । उनी बिहान ८:४० बजे नेपाल वायुसेवा निगमको विमान चार्टर्ड गरेर ५४ जनाको टोलीसहित बंगलादेश प्रस्थान गरेकी हुन् ।

भ्रमण दौरान नेपाल र बंगलादेशबीच चार क्षेत्रका विषयमा दुईपक्षीय सम्झौता हुने सरकारले जनाएको छ । ती विषयमा पर्यटन, संस्कृति आदान–प्रदान, स्यानिटरी र फाइटो स्यानिटरी तथा रोहनपुरदेखि सिंहबादसम्म ‘ट्रान्जिट रुट’ लगायत छन् ।

यस्तो छ दुई दिनको कार्यक्रम

– सोमबार बिहान राष्ट्रपति भण्डारीलाई ढाका विमानस्थलमा बंगलादेशका राष्ट्रपति अब्दुल हमिदले स्वागत गर्ने– विमानस्थलबाट राष्ट्रपति भण्डारी बंगलादेशका सहिदहरूलाई श्रद्धाञ्जली दिन र माल्यार्पण गर्न जाने

– त्यसपछि होटलमा फर्कने र आराम गर्ने

– होटलमा पहिला बंगलादेशका विदेशमन्त्री शिष्टाचार भेटका लागि आउने

– त्यसपछि प्रधानमन्त्री सेख हसिनाले राष्ट्रपति भण्डारीसँग होटलमै शिष्टाचार भेट गर्ने

– बेलुकी राष्ट्रपति भवन बंगमा राष्ट्रपति हमिदसँग भेटवार्ता

– सोही भेटमा दुई पक्षीय सम्झौताहरू हुने

– त्यसपछि राष्ट्रपति होटलमा फर्कने

– मंगलबार बिहान ढाकास्थित नेपाली राजदूतावासमा आयोजित कार्यक्रम र दिवाभोजमा सहभागी हुने

– त्यसपछि मंगलबार दिउँसो काठमाडौं आउने

कान्तिपुरबाट साभार

अध्यक्ष ओलीसँग नझुक्ने अभिव्यक्ति र एमाले छोड्न नसक्ने मनस्थितिको विरोधाभासमा नेपालले अब के गर्लान् ?

काठमाडौँ — एमाले खनाल–नेपाल समूहको चैत ५ गतेको राष्ट्रिय भेलामा प्रदेश २ की सांसद मञ्जु यादवले सोधिन्, ‘फागुन २८ गतेको निर्णय फिर्ता लिएर ओली पक्ष २०७५ जेठ २ कै अवस्थामा पार्टीलाई पुनःस्थापित गर्न तयार भए त ठीकै छ, नभए के गर्ने ? लत्रिने ?’

कान्तिपुरबाट साभार

शे–फोक्सुण्डो गाउँपालिका–८ मा पर्ने शे–फोक्सुण्डो ताल क्षेत्रमा निशुल्क इन्टरनेट सेवा जडान गरिएको छ ।

निजी इन्टरनेट सेवा प्रदायक कम्पनी वल्र्ड लिङ्कले निःशुल्क इन्टरनेट सेवा जडान गरेको हो ।

सुन्दर पर्यटकीय गन्तव्य भएर पनि फोक्सुण्डो ताल ओझेलमा परेकाले थोरै भए पनि प्रसार–प्रसार होस् भन्ने हेतुले ताल नजिकै निःशुल्क इन्टरनेट सेवा जडान गरिएको वल्र्ड लिङ्कले जनाएको छ ।

इन्टरनेट प्रयोग गर्ने व्यक्तिले एक दिनमा निःशुल्क ५०० एमबी प्रयोग गर्नसक्ने कम्पनीका प्राविधिक उमाकान्त क्षेत्रीले जानकारी दिनुभयो । निःशुल्क इन्टरनेट जडानसँगै फोक्सुण्डो ताल घुम्न आउने पर्यटकका लागि सञ्चार सम्पर्कमा रहन सहज हुनाका साथै पर्यटकले मनोरञ्जन लिनसक्ने क्षेत्रीको भनाइ छ ।

सर्लाहीको लालबन्दी नगरपालिकास्थित अटोबाट १५ किलो लागुऔषध गाँजासहित तीनजना पक्राउ परेका छन् ।

विशेष सुराकीको आधारमा खटिएको प्रहरी टोलीले लालबन्दी नगरपालिका १७ स्थित रानीगन्जबाट ज १ ह ४६०९ नं को अटोमा सवार तीन जनालाई गाँजासहित पक्राउ गरिएको प्रहरीले जनाएको छ ।

पक्राउ पर्नेमा स्थानीय अटो चालक ४५ वर्षीय पुस्पबहादुर फुयाँल, ४० वर्षीय सुन्कुमार बल र वडानम्बर १४ निवासी ४१ वर्षीय पाल्साङ पाख्रिङ छन् ।

अटोमा राखिएको तीनवटा जेब्रा झोलाभित्र १५ किलो गाँजा बरामद भएको सर्लाहीका प्रहरी प्रवक्ता मदन कुँवरले जानकारी दिए । उनका अनुसार पक्राउ परेका बलको साथबाट नगद २५ हजारसमेत बरामद भएको छ ।

अटो, गाँजासहित तीनैजनालाई नियन्त्रणमा लिई थप अनुसन्धान थालिएको प्रहरीले जनाएको छ ।

कैलालीको टीकापुर नगरपालिका १ मुनुवा रोडको खाद्य गोदाम नजिक आइतबार बम फेला परेको छ ।

बाटोको किनारमा जेसिबीले नाली खन्ने क्रममा खाद्य गोदाम नजिकै बम फेला परेको हो । त्यहाँ फेला परेको बम नै भएकाले र निस्क्रिय पार्नका लागि नेपाली सेनाको गोराँगे ब्यारेकलाई खबर गरिसकिएको इलाका प्रहरी कार्यालय टीकापुरले जनाएको छ ।

फेला परेको बम सशस्त्र द्वन्द्वका बेला राखिएको हुनसक्ने आशंका गरिएको छ । प्रहरीले घटनास्थललाई नियन्त्रणमा लिइसकेको छ । आज बिहान सेनाको बम डिस्पोजल टोली टीकापुर आउन थालेको इलाका प्रहरी कार्यालय टीकापुरका प्रहरी निरीक्षक अरुण बमले जानकारी दिए

पर्सा राष्ट्रिय निकुञ्जको प्रतापपुरबाट गैँडा गणना शुरु गरिएको छ । वन तथा वातावरणमन्त्री प्रेमबहादुर आलेले आज बिहान सिटी फुकेर गैँडा गणनाको शुभारम्भ गर्नुभएको हो ।

चितवन राष्ट्रिय निकुञ्ज र पर्सा राष्ट्रिय निकुञ्जलाई एउटा ब्लक बनाएर आजदेखि गणना शुरु गरिएको हो ।

सो अवसरमा राष्ट्रिय योजना आयोगका सदस्य कृष्णप्रसाद ओली, वन मन्त्रालयका सचिव डा विश्वनाथ ओली, राष्ट्रिय निकुञ्ज तथा वन्यजन्तुु संरक्षण विभागका महानिर्देशक दीपक खराल, वन विभागका महानिर्देशक मनबहादुर खड्का, वन मन्त्रालयका महाशाखा प्रमुख, विभिन्न दातृ निकायका प्रमुखको सहभागिता रहेको थियो ।

गणना शुरु भएसँगै सौराहामा औपचारिक उद्घाटन कार्यक्रम गरिँदै छ ।

चितवन राष्ट्रिय निकुञ्जका प्रमुख संरक्षण अधिकृत अणनाथ बरालका अनुसार गणनामा ४० वटा हात्ती र २०० जनशक्ति परिचालन गरिएको छ । दुई निकुञ्ज र राष्ट्रिय प्रकृति संरक्षण कोषका हात्ती गणनामा प्रयोग गरिएका छन् । कोशीमा दरबन्दी रहेर यहाँ रहेका हात्ती र मध्यवर्ती क्षेत्रमा केही निजी हात्तीलाई पनि गणनामा प्रयोग गरिने छ । बरालका अनुसार ४० मुख्य गणक र वैकल्पिक २० लाई गणनामा खटाइँदै छ ।

यसका अतिरिक्त हात्तीको दरबन्दीमा रहेका कर्मचारी खटिएका छन् । गणनामा खटिएकालाई यही चैत ६ र ७ गते सौराहामा तालीम दिइएको थियो । राष्ट्रिय प्रकृति संरक्षण कोष सौराहाका प्रमुख डा बाबुराम लामिछानेका अनुसार दुई निकुञ्जमा गैँडा गणना गर्न २० दिन हाराहारी लाग्ने छ ।