काठमाडौँ: सशस्त्र प्रहरी बल (एपीएफ)की इन्स्पेक्टर सन्तोषी महतको मृत्यु प्रकरणमा अनुसन्धान गर्दै जाँदा सशस्त्रकै इन्स्पेक्टर विवेक जोशी पक्राउ परेका छन्। जिल्ला प्रहरी कार्यालय कास्कीका अनुसार, आत्महत्या दुरुत्साहन मुद्दा दायर भएपछि जोशीलाई नियन्त्रणमा लिइएको हो।
गत शनिबार राति पोखरास्थित हुल तथा दङ्गा व्यवस्थापन तालिम शिक्षालय, लामापाटन मा इन्स्पेक्टर महत झुन्डिएको अवस्थामा मृत फेला परेकी थिइन्। पीडित परिवारले जोशीविरुद्ध जिल्ला प्रहरी कार्यालय कास्कीमा जाहेरी दिएपछि अनुसन्धान अघि बढाइएको हो। परिवारले जोशीले महतलाई आत्महत्या गर्न बाध्य पारेको आरोप लगाएका छन्।
सशस्त्र प्रहरी स्रोतका अनुसार, महत र जोशी प्रेम सम्बन्धमा रहेको खुलेको छ। घटनाको विस्तृत छानबिन गर्न सशस्त्र प्रहरी बल प्रधान कार्यालयले डीआईजी लक्ष्मण सिंहको नेतृत्वमा छानबिन समिति गठन गरेको छ।
सिन्धुपाल्चोककी महत शौचालयको ढोकाको बलोमा डोरीमा झुन्डिएको अवस्थामा फेला परेकी थिइन्। सशस्त्र प्रहरी जवान र असई हुँदै उनले यसै वर्ष इन्स्पेक्टरमा पदोन्नति हासिल गरेकी थिइन्।
