काठमाडौँ, २१ जेठ: सङ्घीय संसदका दुवै सदन—प्रतिनिधिसभा र राष्ट्रियसभा—को बैठक आज बस्दैछ।
प्रतिनिधिसभाको बैठक आज अपराह्न १ः०० बजेका लागि बोलाइएको छ। बैठकमा उपप्रधान तथा अर्थमन्त्री विष्णुप्रसाद पौडेलले आर्थिक वर्ष २०८२/८३ को राजस्व र व्ययको वार्षिक अनुमानमाथि सामान्य छलफल गरियोस् भन्ने प्रस्ताव वक्तव्यसहित पेस गर्नुहुनेछ। सो प्रस्तावमाथि प्रतिनिधिसभामा छलफल हुने कार्यसूची रहेको छ।
त्यसैगरी, राज्य व्यवस्था तथा सुशासन समितिका सभापति रामहरि खतिवडाले ‘सङ्घीय निजामति सेवा विधेयकसम्बन्धी समितिको प्रतिवेदन, २०८२’ पेस गर्नुहुने कार्यक्रम पनि बैठकको कार्यसूचीमा समावेश छ।
राष्ट्रियसभाको बैठक भने अपराह्न १ः१५ बजेका लागि तय गरिएको छ। सो बैठकमा पनि अर्थमन्त्री पौडेलले राजस्व र व्ययको वार्षिक अनुमानमाथि छलफल सुरु गरियोस् भन्ने प्रस्ताव पेस गर्नुहुनेछ, र त्यसैका आधारमा छलफल प्रारम्भ हुनेछ।
