दमौली (तनहुँ): व्यास नगरपालिकालाई “पूर्ण खोप सुनिश्चित पालिका” घोषणा गरिएको छ। नगर क्षेत्रभित्रका बालबालिकालाई सबै आवश्यक खोप पूरा गरिएपछि बुधबार आयोजित विशेष समारोहमा उक्त घोषणा गरिएको हो।
१६ महिनादेखि ५९ महिनासम्मका सबै बालबालिकालाई खोप दिइएपछि पालिकाले पूर्ण खोप सुनिश्चितताको मान्यता पाएको हो।
व्यास नगरपालिकाका जनस्वास्थ्य निरीक्षक लक्ष्मी गुरुङका अनुसार १६ देखि २३ महिनासम्मका २,८२८ बालबालिकालाई सबै अनिवार्य खोपको पहुँचमा ल्याइएको छ।
समारोहमा गण्डकी प्रदेशसभा सदस्य अशोककुमार श्रेष्ठ, जिल्ला समन्वय समितिका प्रमुख तथा खोप समन्वय समितिका संयोजक शान्तिरमण वाग्ले, व्यास नगरपालिकाका प्रमुख वैकुण्ठ न्यौपाने, राष्ट्रिय योजना आयोगका पूर्व उपाध्यक्ष डा. जगदीशचन्द्र पोख्रेल लगायतका वक्ताहरूले पालिकालाई पूर्ण खोप सुनिश्चितता र दिगोपनाको प्रतिबद्धता जनाउँदै प्रतिबद्धतापत्रमा हस्ताक्षर गरे।
त्यसैगरी, राजनीतिक दलका प्रतिनिधिहरू, स्वास्थ्यकर्मी, शिक्षक, विद्यार्थी, महिला स्वास्थ्य स्वयंसेविका, आमा समूह र महिला सञ्जालले पनि अभियानको दिगोपना कायम राख्ने दृढता व्यक्त गरेका छन्।
