दमौली (तनहुँ): वैदेशिक रोजगारीका क्रममा ठगीमा परेका तनहुँका २४ जनाले रु ५४ लाख दुई हजार फिर्ता पाएका छन्। जिल्ला प्रशासन कार्यालय अन्तर्गत सञ्चालित सुरक्षित आप्रवासन परियोजना (सामी) को पहलमा उनीहरूलाई रकम फिर्ता दिलाइएको हो।
सामी परियोजनाका अनुसार चालु आर्थिक वर्षको चैत मसान्तसम्म केन्द्रमा १०४ वटा उजुरी दर्ता भएका थिए। तीमध्ये २४ वटा उजुरीको फछ्र्योट गरी पीडितलाई रकम फिर्ता गरिएको सहायक प्रमुख जिल्ला अधिकारी जीतबहादुर भण्डारीले जानकारी दिनुभयो। बाँकी ८० वटा उजुरी वैदेशिक रोजगार विभागमा पठाइएको छ।
परियोजनाले हालसम्म १० हजार २६ जनालाई वैदेशिक रोजगारीसम्बन्धी परामर्श प्रदान गरेको छ। परामर्श लिनेमा ६,४०७ जना पुरुष र ३,६१९ जना महिला रहेका छन्।
साथै, वैदेशिक रोजगारीका क्रममा मृत्यु भएका कामदारका परिवार तथा दुर्घटनामा परेका व्यक्तिहरूलाई बीमा बापत रु ४ करोड २१ लाख १९ हजार २५६ वितरण गरिएको भण्डारीले जानकारी दिनुभयो।
वैदेशिक रोजगारीलाई सुरक्षित, मर्यादित र व्यवस्थित बनाउन सन् २०१९ डिसेम्बर १६ (वि.सं. २०७६ मंसिर १) देखि तनहुँमा सामी परियोजना सञ्चालनमा रहेको छ।
