वीरगञ्ज (पर्सा): चालु आर्थिक वर्षको सात महिनामा वीरगञ्ज नाका हुँदै रु ८ अर्ब ६८ करोड मूल्य बराबरको २२ करोड ६४ लाख ८ हजार २९ किलोग्राम धान आयात भएको छ। यो गत वर्षको सोही अवधिको तुलनामा ७२ प्रतिशतले वृद्धि भएको हो।
गत आवको पहिलो सात महिनामा वीरगञ्ज नाका हुँदै रु ४ अर्ब ९१ करोड मूल्य बराबरको १३ करोड १८ लाख ५९ हजार ४१६ किलोग्राम धान आयात भएको थियो। वीरगञ्ज भन्सार कार्यालयका सूचना अधिकारी अमित तिवारीका अनुसार यस वर्ष धान र चामल दुवैको आयातमा वृद्धि देखिएको छ। “गत आवको तुलनामा चालु आवमा धान–चामलको आयात उल्लेख्य रूपमा बढेको छ,” उनले बताए।
नेपाल कृषिप्रधान मुलुक भए पनि धान मात्र नभई चामलसमेत विदेशी मुलुकबाट आयात हुँदै आएको छ। चालु आर्थिक वर्षको सात महिनामा वीरगञ्ज नाका हुँदै रु १ अर्ब ३५ करोड मूल्य बराबरको १ करोड ३३ लाख ७४ हजार ८२६ किलोग्राम चामल आयात भएको छ।
गत आवको सोही अवधिमा रु १ अर्ब ६ करोड मूल्य बराबरको ८१ लाख १७ हजार १३० किलोग्राम चामल आयात भएको थियो, जसअनुसार चालु आवमा चामल आयातमा पनि उल्लेखनीय वृद्धि भएको देखिन्छ।
त्यस्तै, चालु आवको सात महिनामा रु २ अर्ब ९६ करोड मूल्य बराबरको ५ करोड ७७ लाख १४ हजार ५८३ किलोग्राम मकै आयात भएको छ। तर, यो गत आवको सोही अवधिको तुलनामा केही घटेको छ। गत वर्षको सोही अवधिमा रु २ अर्ब ९७ करोड मूल्य बराबरको ६ करोड ६० लाख ४९ हजार ९७२ किलोग्राम मकै आयात भएको थियो।
धान र चामलको आयात बढिरहे पनि मकैको आयातमा भने सामान्य गिरावट देखिएको छ।
(रासस)
