मकवानपुर, २० जेठ: बागमती प्रदेशसभाको आज बसेको बैठकले दुई वटा विधेयक सर्वसम्मतिले पारित गरेको छ। पारित भएका विधेयकहरूमा:
मदन भण्डारी स्वास्थ्य विज्ञान प्रतिष्ठान ऐन, २०७६ लाई संशोधन गर्न बनेको विधेयक, २०८२, र
प्रदेश कृषि विकास सम्बन्धमा व्यवस्था गर्न बनेको विधेयक, २०८२ रहेका छन्।
प्रदेशसभाका सभामुख भुवनकुमार पाठकले दुवै विधेयकलाई बैठकमा निर्णयार्थ प्रस्तुत गर्नुभएको थियो।
स्वास्थ्य मन्त्री किरण थापा मगरले स्वास्थ्य विज्ञान प्रतिष्ठानसम्बन्धी संशोधन विधेयक पारित गरियोस् भन्ने प्रस्ताव पेश गर्नुभएको थियो।
त्यसैगरी, कृषि तथा पशुपंक्षी विकासमन्त्री प्रकाश श्रेष्ठले कृषि विकाससम्बन्धी विधेयक पारित गरियोस् भन्ने प्रस्ताव बैठकमा राख्नुभएको थियो।
बैठकमा आन्तरिक मामिला तथा कानुनमन्त्री सुरजचन्द्र लामिछानेले प्रदेश चलचित्र सम्बन्धमा व्यवस्था गर्न बनेको विधेयक, २०८१ माथि विचार गरियोस् भन्ने प्रस्ताव पेश गर्नुभयो।
साथै, उहाँले प्रदेशस्तरको चिठ्ठा व्यवस्थापन तथा नियन्त्रणसम्बन्धी विधेयकलाई दफावार छलफलका लागि प्रदेश मामिला समितिमा पठाइयोस् भन्ने प्रस्ताव पनि राख्नुभएको थियो।
