पोखरा: पूर्वप्रधानमन्त्री एवं नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले प्रत्यक्ष निर्वाचित कार्यकारी प्रमुख प्रणालीले मात्रै राजनीतिक स्थायित्व र सुशासन कायम गर्न सक्ने बताएका छन्।
शुक्रबार पोखरामा तमु राष्ट्रिय मुक्ति मोर्चा नेपालको राष्ट्रिय भेलाको उद्घाटन गर्दै उनले संविधान संशोधनको सम्भावनाबारे संकेत गर्दै भने, “संविधान निर्माणका बेला केही आशंका राखेका थियौं। यदि संशोधन गर्ने हो भने हामी तयार छौं, तर कसका लागि र कसको पक्षमा? यो मुख्य प्रश्न हो। हामी प्रत्यक्ष निर्वाचित कार्यकारी प्रमुख र समानुपातिक निर्वाचन प्रणालीको पक्षमा छौं।”
साथै, उनले २०८४ को चुनावमा नेपाली कांग्रेस र नेकपा एमालेबीच गठबन्धनको सम्भावना उल्लेख गर्दै चुनौतीको रूपमा भने, “उनीहरू मिल्न चाहन्छन् भने मिलून्। हामी जनताको विश्वासमा एक्लै चुनावमा जानेछौं।”
प्रचण्डले उत्पीडित वर्ग, जाति, र समुदायको हकमा पार्टीको प्रतिबद्धता दोहोर्याउँदै भने, “बीचमा हाम्रो वर्गपक्षधरता कमजोर भएको थियो, अब फेरि वर्गसंघर्षको आन्दोलनलाई बल दिने समय आएको छ।”
