काठमाडौँ: नेपाल कम्युनिष्ट पार्टी (एकीकृत समाजवादी) का अध्यक्ष माधवकुमार नेपालले पार्टी सङ्गठन र विभिन्न विभागीय कार्यलाई थप व्यवस्थित बनाउन केन्द्रीय कमिटीका सदस्यहरूलाई जिम्मेवारी तोकेको जानकारी दिनुभएको छ।
अध्यक्ष नेपालले जारी गरेको विज्ञप्तिमा किसान, मजदुर, महिला, युवा, विद्यार्थी, पेसागत बुद्धिजीवी, र उद्योग व्यवसाय जस्ता जनसङ्गठनलाई व्यवस्थित गर्न प्रदेशस्तरमा नेताहरूलाई खटाइएको उल्लेख छ। यस क्रममा सम्बन्धित प्रदेशका पोलिटब्यूरो सदस्यलाई प्रदेश सहइन्चार्जको भूमिका दिइएको छ।
प्रदेश इञ्चार्जको नेतृत्वमा पोलिटब्यूरो सदस्यहरूसँगको परामर्शमा केही विभागीय इञ्चार्जहरूको जिम्मेवारी बाँडफाँड गर्ने कुरा पनि उहाँले स्पष्ट पार्नुभएको छ। साथै, केन्द्रीय कमिटीका सदस्यहरूले तोकिएका विभागीय जिम्मेवारीलाई प्रभावकारी बनाउनेतर्फ जोड दिँदै जनसङ्गठनका अध्यक्षहरूले यथाशीघ्र आफ्नो जिम्मेवारी हस्तान्तरण गर्न निर्देशन दिनुभएको छ।
पूर्वप्रधानमन्त्रीसमेत रहनुभएका अध्यक्ष नेपालले एउटा मात्र सङ्घीय निर्वाचन क्षेत्र भएको जिल्लामा एकभन्दा बढी सहइन्चार्ज भएमा, उनीहरूलाई जिल्ला इञ्चार्जको संयोजनमा प्रदेश निर्वाचन क्षेत्र अनुसार जिम्मेवारी तोक्न सकिने बताउनुभएको छ।
यदि केन्द्रीय कमिटी सदस्यको जिम्मेवारी परिमार्जन गर्नुपर्ने अवस्था आएमा, सम्बन्धित इञ्चार्जले नेताहरूको सहमति लिएर निर्णय गर्न सक्ने अधिकार दिइएको छ। यस्ता परिमार्जनहरूको जानकारी तुरुन्तै केन्द्रीय कार्यालयलाई दिनुपर्ने व्यवस्था गरिएको छ।
पार्टी कार्यालयका अनुसार, कामको आवश्यकता अनुसार केन्द्रीय आयोगका सदस्यहरूलाई पनि कतिपय स्थानमा जिम्मेवारी दिइएको छ।
