काभ्रेपलाञ्चोक: धुलिखेल नगरपालिका–६ स्थित धुलिखेल अस्पतालमा आधुनिक ट्रमा तथा आपतकालीन सेवा केन्द्र (ट्रमा एण्ड इमर्जेन्सी सेन्टर) निर्माण गरिने भएको छ। नेपाल सरकारको पहलमा धुलिखेल अस्पताल र जापान अन्तरराष्ट्रिय सहयोग एजेन्सी (जाइका)बीचको समझदारीअनुसार जापान सरकारले यो केन्द्र निर्माणका लागि सहयोग प्रदान गर्नेछ।
जापान सरकारले यस परियोजनाका लागि अतिरिक्त ५७ करोड ३० लाख येन (लगभग ५१ करोड नेपाली रुपैयाँ) अनुदान उपलब्ध गराउनेछ। यो सहयोगबारे सम्झौता जेठ २ गते अर्थ मन्त्रालयमा उपप्रधानमन्त्री एवं अर्थमन्त्री विष्णुप्रसाद पौडेल र जापानका संसदीय उपविदेशमन्त्री इकुइना अकिकोबीच सम्पन्न भएको हो।
यसअघि नै जापानले सन् २०२३ मा यस परियोजनाका लागि तीन अर्ब २९६ करोड येन बराबरको अनुदानमा हस्ताक्षर गरिसकेको थियो। तर निर्माण लागतमा वृद्धि तथा अन्य कारणले देखिएको आर्थिक अभावका कारण हाल थप अनुदान दिइएको जापानस्थित नेपाली दूतावासले जनाएको छ।
दूतावासका अनुसार नेपालमा सडक सञ्जाल विस्तार, यातायातको बढ्दो प्रयोग, ट्रमाका बिरामीको संख्या र नसर्ने रोगहरू (जस्तै: स्ट्रोक, मुटु) का कारण अस्पतालहरूमा श्यया र उपकरणको अभाव देखिन थालेकोले यो सहायता प्रदान गरिएको हो।
सहयोगबाट धुलिखेलमा १०० श्ययाको आधुनिक ट्रमा सेन्टर स्थापना हुनेछ। उक्त केन्द्रमा पार्किङ, आइसियु, एचडियु, तीनवटा अपरेशन थिएटर, ल्याब, फार्मेसी, फोहोर व्यवस्थापनलगायत सबै आवश्यक सेवा उपलब्ध हुनेछन्। भवन तीन तला बेसमेन्टसहित पाँच तल्ले हुनेछ, जसमा भूकम्प प्रतिरोधात्मक प्रविधि तथा आपतकालीन संरचना समेत रहनेछ।
निर्माण सम्झौता अनुसार जापानले भवन निर्माण लागतमा ६० प्रतिशत तथा सबै प्रकारका चिकित्सकीय उपकरणमा ४० प्रतिशत योगदान दिनेछ।
धुलिखेल ट्रमा सेन्टरको स्थापना अरनिको र विपी राजमार्ग हुँदै काठमाडौँ आउनुपर्ने बाध्यता अन्त्य गर्ने लक्ष्यसहित गरिएको हो। अरनिको राजमार्गले धुलिखेललाई चीनको तिब्बतसँग र विपी राजमार्गले पूर्वी नेपाल हुँदै भारतसँग जोड्दछ।
चिकित्सकहरूका अनुसार दुर्घटनापछि ‘गोल्डेन आवर’ अर्थात् छ घण्टाभित्र उपचार गरेमा बिरामीको ज्यान बच्ने सम्भावना उच्च हुन्छ। यो समयावधि गुमाउँदा मृत्यु वा गम्भीर अङ्गभङ्ग हुने जोखिम अत्यधिक हुने भएकाले, ट्रमा सेन्टर स्थापनालाई जीवनरक्षासँग प्रत्यक्ष जोडिएको मानिएको छ।
