काठमाडौं: नेकपा (एकीकृत समाजवादी) अहिले कुनै पनि पार्टीसँग एकीकरणमा जाने सम्भावना नरहेको स्पष्ट पारेको छ। शुक्रबारदेखि सुरू भएको केन्द्रीय कमिटी बैठकमा अध्यक्ष माधवकुमार नेपालले प्रस्तुत गरेको राजनीतिक प्रतिवेदनमा पार्टी समाजवादी विचारधारा र लक्ष्यमा स्पष्ट रहेको भन्दै एमाले, माओवादी लगायत दलसँग तत्काल एकीकरण नहुने उल्लेख छ।
प्रतिवेदनअनुसार, तत्कालीन विद्रोहको औचित्य पुष्टि भइसकेको र अब पार्टीलाई थप सशक्त बनाउनुपर्ने आवश्यकतामा पार्टी केन्द्रित रहनेछ। वर्तमान सरकारले दुई दलीय शासन प्रणालीलाई अघि बढाउने प्रयास गरिरहेको आरोप लगाउँदै समाजवादी धारका शक्तिहरूलाई एकताबद्ध गर्ने पहल भइरहेको जनाइएको छ।
बैठकमा अध्यक्ष नेपालले निजी स्वार्थ त्यागी राष्ट्र, जनता र श्रमजीवी वर्गको सेवामा समर्पित हुनुपर्ने भन्दै १३ बुँदे आचारसंहिता पेस गरे। त्यस्तै, महासचिव घनश्याम भुसालले मुलुकको आर्थिक तथा राजनीतिक संकटको समाधानका लागि प्रस्तावसहित तालिका प्रस्तुत गरे।
पार्टीले जिल्ला अधिवेशनका लागि सबै जनसङ्गठन, विभाग र अन्य सम्बद्ध संस्थाहरूबाट चैत १५ गतेसम्म केन्द्रीय तहमा सुझाव सङ्कलन गर्ने कार्यक्रम अघि बढाएको छ। बैठकमा केन्द्रीय सदस्यहरू आफ्नो धारणा राख्ने क्रम जारी छ, भने बैठक भोलि बिहान ११ बजे पुनः बस्ने गरी स्थगित गरिएको छ।
