झापा: नेपाल सरकारले मिर्गौला रोगीका लागि निःशुल्क हेमोडायलायसिस सेवा सञ्चालनमा ल्याएपछि धेरै बिरामी लाभान्वित भएका छन्। झापाको भद्रपुरस्थित ओमसाई पाथिभरा अस्पतालमा मात्र दैनिक ६० जना बिरामीले निःशुल्क सेवा प्राप्त गरिरहेको अस्पतालका प्रशासन प्रमुख मनोज दाहालले जानकारी दिनुभयो।
सरकारले सञ्चालन गरेको विपन्न नागरिक उपचार कोषमार्फत मिर्गौला रोगीलाई निःशुल्क हेमोडायलायसिस सेवा दिइँदै आएको छ। “बिरामीले कुनै शुल्क तिर्नुपर्दैन। प्रत्येक डायलायसिसका लागि नेपाल सरकारले अस्पताललाई कोषमार्फत रु २,५०० प्रदान गर्छ, जसले विशेष गरी विपन्न नागरिकलाई ठूलो राहत मिलेको छ,” दाहालले बताउनुभयो।
दुवै मिर्गौलाले काम नगरेको अवस्थामा चिकित्सकको सिफारिसमा बिरामीको हेमोडायलायसिस गराउनुपर्ने हुन्छ। झापामा यो सेवा उपलब्ध गराउने ओमसाई पाथिभरा अस्पताल पहिलो तथा सबैभन्दा बढी क्षमताको अस्पताल हो। हाल थप पाँचवटा स्वास्थ्य संस्थाले पनि डायलायसिस सेवा प्रदान गरिरहेका छन्।
अस्पतालमा २१ वटा हेमोडायलायसिस मेसिन सञ्चालनमा छन्। एक जना बिरामीको डायलायसिसमा चार घण्टा लाग्ने हुँदा दैनिक तीन सिफ्टमा गरी औसत ६० जनाले सेवा लिइरहेका छन्। हाल एक सय ६७ जनाले नियमित रूपमा यहाँ डायलायसिस गराइरहेका छन्। सरकारको स्वास्थ्य बीमामा आबद्ध नभएका बिरामीले समेत स्थानीय तहको सिफारिसमा सेवा प्राप्त गर्न सक्ने व्यवस्था गरिएको छ।
बिरामी तथा परिवारको अनुभव
भद्रपुर नगरपालिका–७, लेखनाथ चोकका ७० वर्षीय मनोरञ्जन न्यौपानेले सरकारले दिएको निःशुल्क सेवा नागरिकको जीवन बचाउन महत्त्वपूर्ण भूमिका खेलिरहेको बताउनुभयो। उहाँले १० वर्षदेखि नियमित हेमोडायलायसिस गराइरहनुभएको छ। “हप्ताको तीन पटक डायलायसिस गर्नुपर्छ,” उहाँले भन्नुभयो, “अस्पताल र सरकारले दिएको सेवा सुविधाप्रति आभारी छु।”
मेचीनगर–७ की सीता निरौलाले आफ्ना पति विष्णुप्रसाद निरौलाको डायलायसिस गराउन हप्तामा दुई पटक अस्पताल धाउनुपर्ने बताउनुभयो। सरकारले डायलायसिस निःशुल्क गरिदिए पनि बिरामीलाई अस्पताल ओहोरदोहोर गर्न एम्बुलेन्स सुविधा नहुँदा समस्या भइरहेको उहाँको भनाइ छ। “संघीय सरकारले निःशुल्क डायलायसिस सेवा दिएको छ, तर स्थानीय सरकारले एम्बुलेन्स सुविधा पनि उपलब्ध गराए बिरामीलाई झनै सहज हुन्थ्यो,” उहाँले बताउनुभयो।
कोशी प्रदेशकै सबैभन्दा ठूलो डायलायसिस सेवा केन्द्रका रूपमा परिचित ओमसाई पाथिभरा अस्पतालमा १८ देखि ८२ वर्ष उमेर समूहका बिरामीले नियमित रूपमा सेवा लिइरहेका छन्। फिस्टुला राख्ने सेवा समेत स्वास्थ्य बीमामार्फत उपलब्ध गराइएकाले बिरामीको चाप दिनानुदिन बढ्दै गएको अस्पतालले जनाएको छ।
