काठमाडौं: नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले बदलिएको राजनीतिक प्रणालीअनुसार जनताको अवस्था रूपान्तरण गर्न सबै एकताबद्ध भएर अघि बढ्न आवश्यक रहेको बताउनुभएको छ।
राष्ट्रिय प्रजातन्त्र दिवसका अवसरमा शुभकामना सन्देश दिँदै अध्यक्ष दाहालले जनताको संघर्षबाट हासिल उपलब्धिको रक्षा गर्दै संविधानको प्रभावकारी कार्यान्वयनमार्फत समाजवादोन्मुख राज्यको आधारशिला निर्माण गर्नु राष्ट्रिय कार्यभार रहेको उल्लेख गर्नुभएको छ।
“नेपाली जनताको बलिदानको जगमा स्थापित प्रजातन्त्रले निरन्तर सुधार र परिमार्जन गर्दै सङ्घीय लोकतान्त्रिक गणतन्त्रको गौरवपूर्ण अवस्थासम्मको यात्रा तय गरेको छ,” उहाँले भन्नुभयो, “यी उपलब्धिहरू २००७ सालको क्रान्ति, २०४६ सालको जनआन्दोलन, जनयुद्ध, २०६२/६३ को ऐतिहासिक जनआन्दोलन तथा उत्पीडित वर्ग, जाति, क्षेत्र, लिङ्ग र समुदायका न्यायपूर्ण संघर्षहरूको योगदानबाट सम्भव भएका हुन्।”
पूर्वप्रधानमन्त्री दाहालले सुशासन, सामाजिक न्याय र समृद्धिको मुख्य एजेन्डा अघि बढाउँदै बदलिएको प्रजातन्त्र दिवसले देशका चुनौती पार गर्न प्रेरणा मिलोस् भन्ने कामना गर्नुभएको छ। साथै, प्रजातन्त्र स्थापनाका लागि अमूल्य बलिदान दिने सहिदहरूप्रति श्रद्धासुमन अर्पण गर्दै प्रजातान्त्रिक आन्दोलनका सबै योद्धाहरूलाई उच्च सम्मान प्रकट गर्नुभएको छ।
