काठमाडौँ : गोरखाको बारपाक सुलिकोट गाउँपालिका–१ की १८ वर्षिया सुचिना घलेले बलात्कारीको प्रतिकार गर्दा ज्यान गुमाउनु परेको छ। स्थानीय ४२ वर्षीय मन शम्शेर गुरुङले बलात्कार प्रयास गर्दा सुचिनाले प्रतिकार गर्न खोज्दा बलात्कारीले हत्या गरेको प्रहरीले जनाएको छ।
सुचिना घलेको हत्यामा संलग्न आरोपी गुरुङलाई प्रहरीले सार्वजनिक गरेको छ भने सुचिनाको शव मंसिर १८ मा जंगलमा गाडेको अवस्थामा भेटिएको थियो ।
मंसिर १५ मा घाँस काट्न जाँदा मैखर्क जंगलमा सुचिनालाई भेटेपछि मन शम्शेरले बलात्कार प्रयास गरेको र सुचिनाले प्रतिकार गर्दा हत्या गरेको प्रहरी अनुसन्धानबाट खुल्न आएको छ।
हत्या गरेपछि खुर्पाले १ फिट गहिरो खाल्डो खनेर शव पुरेको आरोपीले स्वीकार गरेका छन् । उनी २२ मंसिरमा पक्राउ परेका थिए।
२०८१ वैशाखमा बारपाक घर भएका धन बहादुर गुरुङसँग विवाह गरेकी सुचिना र मन शम्शेरको बिचमा पूर्व चिनजान थिएन । दुवैजना घाँस काट्न गएको बेला जंगलमा भेट भएको एसपी पाठकले बताए । उनले भने, ‘बलात्कार प्रतिकार गर्दा दुई जनाको बीच हानाहान र कपाल तानातान भएको देखिन्छ ।’
सुचिना चिच्याएपछि घटनास्थलमा भेटिएको गोबर र माटो मुखमा कोचेर आरोपीले सुचिनाको हत्या गरे । एसपी पाठक भन्छन्, ‘मुखमा गोबर र माटो कोचेपछि थिचेर हत्या गरेको देखिन्छ ।’
हत्यापछि घर फर्केर मन शम्शेरले दुई पटक आत्महत्या गर्ने प्रयास गरे । झुण्डिएर र विष सेवन गरेर आत्महत्या प्रयास गर्दा उनलाई छोरी र पत्नीले रोकेका थिए । त्यसपछि ‘मेरो बयान’ शीर्षकमा उनले लामो नोट लेखे औँठाछाप लगाएर घरमा राखे । सो नोट बरामद गरिएको एसपी पाठकले बताए । नोटमा उनले आफूले हत्या गरेको स्वीकारेका छन् । एसपी पाठक भन्छन्, ‘मैले गल्ती गरेँ भनेर ल्याप्चे लगाएको नोट हामीले बरामद गरेका छौँ ।’
