काठमाडौं: फोर नेशन्स महिला अन्तर्राष्ट्रिय च्याम्पियनसिपको उपाधि म्यानमारले जितेको छ। त्रिपुरेश्वरस्थित दशरथ रंगशालामा मंगलबार सम्पन्न फाइनलमा नेपाल म्यानमारसँग २–० ले पराजित भयो।
खेलको पहिलो हाफ गोलरहित बराबरीमा सकिएको थियो। तर, दोस्रो हाफमा म्यानमारले खेलको नियन्त्रण लिँदै दुई मिनेटको अन्तरमा लगातार दुई गोल गर्दै उपाधि आफ्नो पक्षमा पार्यो। नेपालले उत्कृष्ट सुरुवात गरे पनि पहिलो हाफमा सिर्जना भएका अवसरलाई सदुपयोग गर्न सकेन।
म्यानमारका लागि यु पेर खियाङ र कप्तान विन थेङ्यी तुनले गोल गरे। खेलको २४औँ मिनेटमा म्यानमारकी सान थाउ थाउको प्रहारलाई नेपाली गोलकिपर बिमला विकले उत्कृष्ट बचाउ गर्दै नेपाललाई खेलमा राखेकी थिइन्। ३५औँ मिनेटमा सावित्रा भण्डारी ‘साम्बा’ को प्रहारलाई म्यानमारकी गोलकिपरले रोकेपछि नेपालले गोल गर्ने मौका गुमायो।
४४औँ मिनेटमा रेणुका नगरकोटीको क्रसलाई म्यानमारकी गोलकिपरले फुत्काए पनि साम्बा र रेखाले बल जाली चुमाउन सकेनन्। नेपालले यसअघि कीर्गिस्तान र लेबनानलाई हराउँदै फाइनल यात्रा तय गरेको थियो। तर, उपाधि जित्ने नेपालको सपना फेरि अधुरो रह्यो।
नेपालका लागि यो हार निराशाजनक रह्यो, किनकि पछिल्लो १५ वर्षमा खेलेका १३ फाइनलमध्ये नेपालले कुनै पनि उपाधि जित्न सकेको छैन। यसअघि साफ च्याम्पियनसिपका ६ फाइनल (२०१०, २०१२, २०१४, २०१९, २०२२, २०२४) मा नेपाल उपविजेता बनेको थियो। त्यस्तै, २०१०, २०१६, र २०१९ को साग गेम्सको स्वर्ण पदक खेलमा नेपाल भारतसँग पराजित भएको थियो।
२०१९ मा नाडेज्दा कपको फाइनलमा उज्वेकिस्तानसँग, हिरो वुमन्स गोल्डकपमा म्यानमारसँग तथा २०२४ मा वाफ वुमन्स च्याम्पियनसिपको फाइनलमा जोर्डनसँग नेपाल पराजित भएको थियो। यस पटक इन्टरनेसनल वुमन्स च्याम्पियनसिपमा पनि म्यानमारसँग हार बेहोरेसँगै नेपालको उपाधि जित्ने संघर्ष जारी रह्यो।
काठमाडौं। अमेरिकी पूर्वराष्ट्रपति डोनाल्ड ट्रम्पले युक्रेनी राष्ट्रपति भोलोडिमिर जेलेन्स्की शुक्रबार अमेरिका आउन सक्ने र दुई देशबीच खनिज सम्झौतामा हस्ताक्षर हुने आशा व्यक्त गरेका छन्।
ट्रम्पले भनेका छन्, “अमेरिका, अमेरिकी आर्थिक सहयोग र सैन्य उपकरण बिना, यो युद्ध (रूस-युक्रेन युद्ध) धेरै चाँडै समाप्त हुने थियो। हामी युक्रेनलाई ठूलो संकटमा मद्दत गरिरहेका छौं, तर अब अमेरिकी करदाताहरूले आफ्नो पैसा फिर्ता लिनेछन्।”
उनले अमेरिकी सैन्य सहयोगको बदलामा युक्रेनलाई उसको खनिज स्रोतहरूमाथि दबाब दिइरहेको संकेत गरेका छन्।
यसअघि युक्रेनको राजधानी कीभका एक वरिष्ठ अधिकारीले बीबीसीलाई बताएअनुसार युक्रेन र अमेरिका खनिज सम्झौताका सर्तहरूमा सहमत भएका छन्।
अधिकारीले विस्तृत विवरण नदिए पनि सम्झौतामा केही महत्वपूर्ण संशोधन गरिएको जानकारी दिएका छन्।
अमेरिकी अधिकारीहरूका अनुसार सम्झौता अमेरिकी प्रविधि प्रयोग गरी युक्रेनका खनिज उत्खननका लागि अमेरिकी कम्पनीहरूलाई पहुँच दिने दिशामा केन्द्रित हुनेछ। युक्रेनमा लिथियम, निकेल, कोबाल्ट, र अन्य दुर्लभ खनिज भण्डारहरू छन्, जसले विद्युतीय गाडी उत्पादनका लागि महत्वपूर्ण भूमिका खेल्न सक्छ।
युक्रेन र अमेरिकाबीचको यो सम्भावित सम्झौताले अन्तर्राष्ट्रिय व्यापारमा नयाँ सम्भावनाहरू ल्याउने विश्वास गरिएको छ।
काठमाडौं। क्यानडाका प्रधानमन्त्री जस्टिन ट्रुडोले रुसी तेल ट्याङ्कर र जहाजहरूमा प्रतिबन्ध लगाउने घोषणा गरेका छन्।
ट्रुडोले सामाजिक सञ्जाल प्लेटफर्म एक्समा लेखे, “रूसले तेलबाट कमाएको पैसाले युक्रेनमा आफ्नो युद्धलाई आर्थिक सहयोग गरिरहेको छ। अन्तर्राष्ट्रिय प्रतिबन्धहरूबाट बच्न रूसले अवैध रूपमा जहाजहरू मार्फत विश्वभर आफ्नो तेल ढुवानी गरिरहेको छ।”
उनले भने, “मैले किभबाट १०९ रूसी तेल ट्याङ्कर र जहाजहरूमा नयाँ प्रतिबन्धहरूको घोषणा गरेको छु।”
यसअघि प्रधानमन्त्री ट्रुडोले भनेका थिए, “स्थायी शान्तिको लडाई एक्लै जित्न सकिँदैन। त्यसैले हामी यहाँ (युक्रेन) छौं। मैले कीभमा राष्ट्रपति जेलेन्स्कीसँग कुरा गरें र भनें – क्यानडा सधैं युक्रेनको साथमा उभिनेछ।”
ट्रुडोले युक्रेनलाई थप सैन्य सहायता प्रदान गर्ने घोषणा गर्दै भनेका थिए, “युक्रेनमा शान्ति स्थापना गर्न र सार्वभौमसत्ता कायम राख्न क्यानडाबाट नयाँ सैन्य सहयोग प्रदान गर्नेछौं।”
क्यानडाले यसअघि पनि युक्रेनलाई सैन्य तथा आर्थिक सहायता प्रदान गर्दै आएको छ। नयाँ प्रतिबन्धले रूसी तेल ढुवानीलाई प्रभावित पार्ने अनुमान गरिएको छ, जसले रूसको युद्ध बजेटमा दबाब बढाउनेछ।
