सिन्धुली: नेपाली कांग्रेसका महामन्त्री गगन थापाले ऊर्जामन्त्री दीपक खड्कालाई अनावश्यक विषयमा नअल्मलिन सुझाव दिएका छन् । नेपाल विद्युत् प्राधिकरणका कार्यकारी निर्देशक कुलमान घिसिङप्रति संकेत गर्दै उनले सरकारले एक व्यक्तिप्रति आवश्यकता भन्दा बढी ध्यान दिएको टिप्पणी गरे ।
सिन्धुलीमा आयोजित कार्यक्रममा बोल्दै महामन्त्री थापाले भने, ‘ऊर्जा मन्त्रालयलाई लिएर अहिले विभिन्न चर्चाहरू चलिरहेका छन् । मन्त्रालय अन्तर्गत विद्युत् प्राधिकरण पर्छ । मलाई यो कुरा बुझ्न गाह्रो भएको छ कि यो बदनियत हो कि व्यवस्थापनको असक्षमता । तीन–चार महिनामा अवकाश पाउने व्यक्तिप्रति सरकार अनावश्यक रूपमा केन्द्रित हुनु ठीक होइन । यस्तो नचाहिने कुरामा मन्त्रीहरू लाग्नु हुँदैन । सेवा निवृत्त भएपछि योग्य व्यक्तिलाई नेतृत्व दिने परिपाटी बसाल्नुपर्छ ।’
उनले मन्त्रीहरू अनावश्यक विषयमा लागेमा त्यसलाई रोक्ने जिम्मेवारी प्रधानमन्त्रीको रहेको स्पष्ट पारे । प्रधानमन्त्री सरकार र क्याबिनेटको मुख्य नेतृत्वकर्ता भएकाले राम्रो कामको श्रेय र नराम्रो कामको अपजस दुवै उनैले लिनुपर्ने बताए ।
‘प्रधानमन्त्रीले राम्रो काम गरे श्रेय पाउनुहुन्छ, तर नराम्रो काम गरे त्यसको दोष पनि उहाँकै हुन्छ । हामी सरकारलाई सफल होस् भन्ने चाहन्छौँ । प्रदेश सरकारको सन्दर्भमा पनि यही कुरा लागू हुन्छ,’ उनले भने ।
थापाले सरकारलाई राम्रो काम गर्न र यदि राम्रो गर्न नसके कम्तीमा नराम्रो काम नगर्न सुझाव दिए । उनले भने, ‘५० वटा राम्रो काम गरे पनि एउटा मात्र नराम्रो काम गरियो भने त्यसकै हल्लाले सबै राम्रो काम छोपिन्छ । त्यसैले सरकारको ध्यान नीतिगत सुधार र प्रभावकारी कार्यान्वयनमा केन्द्रित हुनुपर्छ ।’
