काठमाडौं: नेपाल विद्युत प्राधिकरणका कार्यकारी निर्देशक कुलमान घिसिङले आइतबार सरकारद्वारा मागिएको स्पष्टीकरणको जवाफ पेश गरेका छन्।
घिसिङले आफ्नो जवाफमा उर्जामन्त्री दीपक खड्काले व्यक्तिगत प्रतिशोध साँध्दै मन्त्रिपरिषद्मा प्रस्ताव लगी स्पष्टीकरण सोधिएको दाबी गरेका छन्। साथै, भारतसँग विद्युत् खरिदबिक्री सम्झौताका लागि उनले उर्जामन्त्री दीपक खड्का र ऊर्जा सचिव सुरेश आचार्यबाट पूर्वस्वीकृति लिएको दाबी गरेका छन्।
डेडिकेटेड तथा ट्रंकलाइनको बक्यौता उठाउन लाइन काट्दा ऊर्जा मन्त्रालय र विद्युत् नियमन आयोगले पुनः लाइन जोड्न निर्देशन दिएको कारण महसुल असुली प्रभावित भएको उल्लेख गर्दै, आफूलाई यसबारे प्रश्न गर्नु विरोधाभाषपूर्ण भएको उनले बताएका छन्।
घिसिङले कर्मचारीहरूमाथि गरिने विभागीय कारबाही निष्पक्ष र विधिसम्मत हुनुपर्ने उल्लेख गर्दै, आफूसँगको सम्झौतापत्र र नियुक्ति रद्द गर्न सक्ने प्रक्रिया प्रस्ट भए तापनि आवश्यक विधि पूरा नगरी कारबाही अघि बढाइनु गम्भीर कानूनी त्रुटि भएको दाबी गरेका छन्।
उनले यसअघि पनि सेवाबाट हटाउने विषयमा स्पष्टीकरण दिइसकेको अवस्थामा पुनः सोही प्रकारको कारबाही अघि बढाउन मिल्दैन भन्दै असन्तुष्टि व्यक्त गरेका छन्।
‘एउटै व्यक्ति उपर एउटै विषयमा विभिन्न राज्य निकायबाट पटक–पटक कारबाही प्रक्रिया अघि बढाइनु न्यायिक सिद्धान्त र नेपालको संविधानको धारा २० को प्रतिकूल छ,’ घिसिङले आफ्नो स्पष्टीकरणमा उल्लेख गरेका छन्।
nea-md-clearification-
