काठमाडौं: एक महिलाले दिनदहाडै अस्पतालबाट नवजात शिशु अपहरण गरेकी छन्। तर धेरै प्रयासपछि प्रहरीले सीसीटीभी फुटेजको आधारमा उनलाई फेला पार्न सफल भएको छ। पक्राउ परेपछि महिलाको बयानले प्रहरीसमेत अचम्मित भएको छ।
भारतको दिल्लीस्थित सफदरजंग अस्पतालबाट हराएको नवजात शिशु अपहरणको चार घण्टा भित्रै फेला पारिएको हो। पक्राउ परेकी महिलाको नाम पूजा हो, जो मालवीय नगरस्थित लेबर चोक निवासी पिंकुकी पत्नी हुन्। प्रहरीले पूजालाई नियन्त्रणमा लिएको छ र अपहरणमा परेकी बालिकालाई सकुशल उद्धार गरेको छ।
प्रारम्भिक अनुसन्धानपछि पूजाले आफू गर्भवती भएको नाटक गरेर पतिलाई धोका दिएको स्वीकारेकी छन्। उनी अप्रिल १४ मा अस्पताल भर्ना हुने बहानामा घरबाट निस्किएकी थिइन् र अप्रिल १५ मा नवजात शिशु लिएर घर फर्केर पतिको आफ्नै बच्चा भएको दाबी गरेकी थिइन्।
सफदरजंग अस्पतालमा अप्रिल १४ मा एक बालिकाको जन्म भएको थियो। त्यसको भोलिपल्ट, अप्रिल १५ मा, बालिकाका आमाबुबाले छोरी हराएको जानकारी प्रहरीलाई दिएका थिए। त्यसपछि सफदरजंग एन्क्लेभ प्रहरी चौकीले अनुसन्धान सुरु गर्यो।
इन्स्पेक्टर रजनीश कुमारको नेतृत्वमा रहेको टोलीले अस्पताल र वरपरका क्षेत्रहरूका सीसीटीभी फुटेज संकलन गरी विश्लेषण गर्दा एक होची, स्कार्फले अनुहार छोपेकी महिला शंकास्पद रूपमा देखा परिन्। उनी शिशु हराएको तलामा अरु महिलासँग गफ गरिरहेको दृश्यमा देखिएकी थिइन्। सोही कोठामा पनि उनी प्रवेश गरेको देखिएको थियो।
सीसीटीभी विश्लेषणबाट महिला एम्स मेट्रो स्टेशनबाट समयपुर बडलीतर्फको रेलमा चढेको देखिएको थियो। तर प्रहरीलाई झुक्याउन उनी बीचैमा आईएनए मेट्रो स्टेशनमा ओर्लेर हुडा सिटी सेन्टरतर्फको अर्को रेल चढिन्। पछि उनी हौज खास मेट्रो स्टेशनमा ओर्लिएर गेट नम्बर १ बाट बाहिरिएकी थिइन् र पंचशील फ्लाईओभरतर्फ गएकी थिइन्।
सो रुटको केही भागमा सीसीटीभी नभएको भए पनि पछि फेरि उनी दिउँसो ४ बजे पंचशील फ्लाईओभरबाट एक विद्युतीय रिक्सा चढेको देखिइन्। फुटेजमा रिक्साको नम्बर अस्पष्ट भएकाले २० भन्दा बढी सम्भावित रिक्साका नम्बरहरू जाँच गरियो।
अन्ततः सही रिक्सा पहिचान गरेर चालकलाई सोधपुछ गर्दा उनले महिलालाई मालवीय नगरको गुलक वली गल्लीको अगाडि बच्चासहित छोडेको जानकारी दिए। त्यसपछि प्रहरीले पूजालाई पहिचान गरी नियन्त्रणमा लियो र बालिकाको उद्धार गर्यो।
अहिले पूजा प्रहरी हिरासतमा छ भने थप अनुसन्धान जारी छ।
