काठमाडौं: प्रधानमन्त्री एवं नेकपा एमालेका अध्यक्ष केपी शर्मा ओलीले आगामी २०८४ को चुनावपछि मात्रै सरकार परिवर्तन हुने स्पष्ट पारेका छन्।
मंगलबार संसद् भवन नयाँ बानेश्वरमा बसेको एमाले संसदीय दलको बैठकलाई सम्बोधन गर्दै प्रधानमन्त्री ओलीले सरकारले चाँडै ढल्ने हल्ला फैलाउनेहरूप्रति टिप्पणी गर्दै २०८४ को चुनावपछि मात्रै परिवर्तन सम्भव हुने स्पष्ट पारे।
उनले सहमति अनुसार एमाले आगामी १७ महिना सरकारमा रहने र त्यसपछि सत्ता कांग्रेसलाई हस्तान्तरण गर्ने जानकारी दिए। प्रधानमन्त्री ओलीले लोकतान्त्रिक अभ्यास र संवैधानिक प्रक्रियाबाहेक अराजक मार्गबाट परिवर्तन सम्भव नभएको धारणा राखे।
प्रधानमन्त्री ओलीले स्वीस बैंकमा आफू र आफ्नो श्रीमतीको नाममा पैसा राखिएको भनी प्रचार गरिएको विषयमा असन्तुष्टि व्यक्त गरे।
उनले सरकारले ल्याएका विभिन्न अध्यादेशप्रति सकारात्मक प्रतिक्रिया प्राप्त भएको र देशलाई उन्नतितर्फ लैजाने प्रयासमा सरकार सक्रिय रहेको उल्लेख गरे। ओलीका अनुसार विभिन्न अध्यादेशमार्फत २९ वटा कानुनमा संशोधन गरिएको छ र छिट्टै प्रतिस्थापन विधेयक ल्याएर स्थायी कानुन बनाइनेछ।
ओलीले सांसदहरूलाई सदनमा तथ्य र तर्कका आधारमा संयमित र जिम्मेवार ढंगले प्रस्तुत हुन आग्रह गर्दै भ्रम फैलाउनेहरूप्रति रचनात्मक तर सशक्त प्रतिवाद गर्न निर्देशन दिए।
बैठकमा उपप्रधानमन्त्री एवं अर्थमन्त्री विष्णुप्रसाद पौडेल र सञ्चार तथा सूचना प्रविधिमन्त्री पृथ्वीसुब्बा गुरुङले सरकारले ल्याएका अध्यादेश र कानुन संशोधनको आवश्यकता र प्रभावबारे जानकारी दिएका थिए।
