काठमाडौँ: परराष्ट्रमन्त्री डा आरजु राणा देउवाले आफ्नो हालै सम्पन्न भारत भ्रमणले दुई देशबीच आपसी सद्भाव अभिवृद्धि गर्नुका साथै सहयोग र सहकार्य प्रवर्द्धन गर्न उल्लेखनीय भूमिका निर्वाह गरेको बताउनुभएको छ ।

संसद्को अन्तर्राष्ट्रिय सम्बन्ध र पर्यटन समितिको आज सिंहदरबारमा भएको बैठकमा भारत भ्रमणका सम्बन्धमा समितिलाई जानकारी दिँदै परराष्ट्रमन्त्री राणाले भ्रमणका माध्यमबाट दुई मुलुकबीच रहिआएको मैत्रीपूर्ण, सहयोगात्मक, बहुआयामिक र घनिष्ठ सम्बन्धलाई आपसी समानता तथा लाभका आधारमा थप मजबुत तुल्याउन योगदान गरेको विश्वास व्यक्त गर्नुभयो ।

त्यसका अतिरिक्त, भ्रमणले आगामी दिनमा उच्चस्तर एवं विभिन्न तहमा सम्पर्क विस्तार गर्न तथा द्विपक्षीय संयन्त्रसमेतका माध्यमबाट आपसी हितका लागि सहयोग र सहकार्य प्रवद्र्धन गर्न मार्गदर्शनसमेत गरेको परराष्ट्रमन्त्रीको भनाइ थियो ।

बैठकमा सांसदहरुले उठाएको जिज्ञासामा परराष्ट्रमन्त्री डा राणाले भारतीय प्रधानमन्त्री नरेन्द्र मोदीले नेपाल भ्रमणका लागि सकारात्मक जवाफ दिएको बताउनुभयो । आफूले भदौ २ गतेदेखि ६ गतेसम्म भारतको औपचारिक भ्रमण गरेको र सो अवसरमा भारतीय प्रधानमन्त्री मोदीसँग पनि शिष्टाचार भेटवार्ता भएको उहाँले जानकारी दिनुभयो ।

“प्रधानमन्त्री केपी शर्मा ओलीका तर्फबाट भारतका प्रधानमन्त्री नरेन्द्र मोदीलाई व्यक्त गर्नुभएको न्यायो अभिवादन तथा शुभकामना प्रवाह गर्नुका साथै नेपालको राजकीय भ्रमणका लागि दिनुभएको निमन्त्रणा पत्र औपचारिक रूपमा उहाँलाई हस्तान्तरण गरेँ”, मन्त्री राणाले भन्नुभयो, “भारतीय प्रधानमन्त्रीले निमन्त्रणा सहर्ष स्वीकार गर्दै नेपाल भ्रमणका लागि सकारात्मक जवाफ दिनुभएको छ ।”

भारतीय विदेशमन्त्री एस जयशङ्करको निमन्त्रणामा परराष्ट्रमन्त्री राणा भारत भ्रमणमा जानुभएको थियो । परराष्ट्रमन्त्री राणाले भ्रमणका दौरान भदौ ३ गते भारतका प्रधानमन्त्री मोदीसँग नयाँ दिल्लीमा शिष्टाचार भेटघाट गर्नुभएको थियो । उक्त भेटमा नेपाल र भारतबीच रहिआएको मैत्रीपूर्ण सम्बन्धलाई थप सुदृढ तुल्याउने तथा आपसी हितका विषयमा विद्यमान सहकार्य विस्तार गर्ने सम्बन्धमा कुराकानी भएको उहाँले उल्लेख गर्नुभयो ।

यसअघि सोही दिन परराष्ट्रमन्त्री राणाले नयाँ दिल्लीस्थित हैदरावाद हाउसमा भारतीय समकक्षीसँग भएको द्विपक्षीय भेटघाट महत्वपूर्ण रहेको बताउनुभयो । सो अवसरमा नेपाल र भारतकाबीच व्यापार तथा पारवहनका क्षेत्रमा सहयोग बढाउने, ऊर्जाको क्षेत्रमा खासगरी नेपालबाट भारतमा निकासी हुने विद्युत्को मात्रा बढाउँदै लैजाने, सीमापार ‘कनेक्टिभिटी’ विस्तार गर्ने, नेपालमा भारतीय लगानी प्रवर्द्धन गर्ने विषयमा छलफल भएको उहाँले बताउनुभयो ।

यस्तै उहाँका अनुसार नेपालका लागि थप हवाई प्रवेश मार्ग उपलब्ध गराउन आवश्यक छलफल अगाडि बढाउने, बाढी तथा डुबान समस्या समाधानका लागि सम्बद्ध संयन्त्र परिचालन गर्ने, पञ्चेश्वर बहुउद्देश्यीय आयोजनालाई प्राथमिकताका साथ अघि बढाउने विषयमा पनि कुराकानी भएको छ ।

खेलकुदका क्षेत्रमा खासगरी नेपालमा क्रिकेटको विकासका लागि खेलाडीको क्षमता अभिवृद्धि तथा धनगढीको फाप्लामा क्रिकेट स्टेडियमको निर्माणका लागि कार्य गर्ने, सीमा पूर्वाधारको निर्माण तथा विस्तारमा सहकार्य गर्नेलगायत नेपाल–भारत सम्बन्धका समग्र पक्षमा छलफल भएमो परराष्ट्रमन्त्रीले समिति समक्ष जानकारी गराउनुभयो ।

त्यसका अलावा विद्यमान द्विपक्षीय संयन्त्रसमेतका माध्यमबाट विभिन्न विषयमा विभिन्न तहमा हुने सम्पर्कलाई निरन्तरता दिनेबारेमा सहमति भएको जनाइएको छ । उहाँले भ्रमणले नेपाल र भारतबीच आपसी सद्भाव अभिवृद्धि गर्न उल्लेखनीय भूमिका निर्वाह गर्नुका साथै दुई मुलुकबीच रहिआएको मैत्रीपूर्ण, सहयोगात्मक, बहुआयामिक र घनिष्ठ सम्बन्धलाई आपसी समानता तथा लाभका आधारमा थप मजबुत तुल्याउन योगदान गरेको विश्वास व्यक्त गर्नुभयो ।

परराष्ट्रमन्त्री राणाले हवाई रुट सम्बन्धमा किटानिका साथ राखेको र यसलाई प्राविधिक टोलीले आवश्यक छलफल गर्ने जानकारी दिनुभयो । उहाँले भन्नुभयो, “नेपाल प्रवेश गर्ने दुई हवाई रुटबारे किटानीका साथ हामीले कुरा राखेका छौँ, यसमा प्राविधिक टोलीले कुरा गर्ने भन्ने सैद्धान्तिक समझदारी भएको छ ।”

सरकारले राष्ट्रिय हितको संरक्षण र प्रवद्र्धनका लागि नेपालको परराष्ट्र नीति अनुरूप अन्तर्राष्ट्रिय सम्बन्ध एवम् कूटनीतिलाई सञ्चालन गर्दै आएको जानकारी दिदै उहाँले नेपालको संविधान र परराष्ट्र नीतिले परिलक्षित गरेअनुसार नेपालको हित सुनिश्चित हुने गरी अन्तर्राष्ट्रिय जगतमा प्रतिनिधित्व गर्ने गरिएको बताउनुभयो ।

परराष्ट्रमन्त्रीमुलुकको सर्वोपरी हितलाई ध्यानमा राखी विदेशस्थित कूटनीतिक नियोग तथा नियोग प्रमुखलाई परिचालन गर्ने विषयमा यो सरकार प्रतिबद्ध रहेको मन्त्री राणाले स्पष्ट पार्नुभयो । नेपालको संविधानको धारा २८२ अनुरुप राजदूत नियुक्ति गर्ने तथा सोका लागि राजदूत नियुक्ति सम्बन्धी निर्देशिका, २०७५ को दफा ८ ९ग० बमोजिम राजदूतहरूको सिफारिश गर्ने व्यवस्था प्रचलनमा रहेको छ ।

संविधानको मर्म र राजदूत नियुक्तिसम्बन्धी निर्देशिकालाई मूल आधार बनाइ राजदूतको नियुक्तिलाई थप व्यवस्थित, मर्यादित, पारदर्शी, दक्षतामा आधारित र कार्यसम्पादनमा आधारित बनाउन यो सरकार अधिकतम रूपमा प्रयासरत रहने उहाँले विश्वास दिलाउनुभयो ।

उहाँले राजदूतहरूको नियुक्तिमा राजनीति र व्यवसायिकताको सन्तुलनका लागि कम्तीमा पनि ५० प्रतिशत राजदूत परराष्ट्र सेवाबाट नियुक्त गर्ने नीतिलाई यसपटक निरन्तरता दिइएको बताउनुभयो । सेवा बाहिरबाट नियुक्तिका लागि सिफारिस गर्दा विभिन्न क्षेत्रको दक्षता र अनुभवलाई राष्ट्रहितका निम्ति अधिकतम उपयोग गर्ने गरी सिफारिस गरिएको पनि उहाँको भनाइ छ ।

ओमानसँग पर्यटन, ऊर्जालगायत चार विषयमा सम्झौता हुँदै

परराष्ट्रमन्त्री डा राणाले ओमानसँग महत्वपूर्ण पर्यटन, स्वास्थ्य, श्रम र परराष्ट्र मामिला सम्बन्धी विषयमा सम्झौताको तयारी भइरहेको जानकारी दिनुभयो । उहाँका अनुसार ओमानका विदेशमन्त्रीको हालै सम्पन्न नेपाल भ्रमणका दौरानमा भएको विदेशमन्त्री स्तरिय भेटका क्रममा उक्त विषयलाई प्राथमिकताका साथ समझदारी गर्ने सहमति भएको थियो ।

काठमाडौं: इलन मस्कको एक्स प्लेटफर्म (पुरानो नाम ट्विटर) ब्राजिलमा प्रतिबन्धित छ। अब ब्राजिलियन मानिसहरू यो प्लेटफर्म पहुँच गर्न सक्षम हुनेछैनन्। एक्स प्लेटफर्मको प्रतिबन्धपछि ट्विटरका पूर्व सीईओ र सह-संस्थापक ज्याक डोर्सीको ब्लूस्काई एप लाभान्वित भएको छ। यो एपले ब्राजिलमा तीन दिनमा १० लाख प्रयोगकर्ता पाएको छ ।

टेकक्रन्चको रिपोर्ट अनुसार ब्लुस्काइ एप ब्राजिलमा आइफोन एप चार्टमा शीर्ष नि:शुल्क एपको रूपमा उभिएको छ। एक पोस्टमा सामाजिक मिडिया प्लेटफर्मले तीन दिनमा १० लाख प्रयोगकर्ताहरू थपेको बताएको छ। यसका लागि उसले पोस्ट गरेको छ ‘पछिल्लो तीन दिनमा नयाँ १० लाख प्रयोगकर्ताहरूलाई स्वागत छ।’

ब्राजिलको सर्वोच्च अदालतले आफ्नो फैसलामा इलन मस्कको एक्स प्लेटफर्म प्तिबन्ध लगाउन आदेश दिएको थियो । यसको २४ घण्टा भित्र सेवा बन्द भयो । प्रतिबन्धपछि ब्राजिलमा एक्स प्लेटफर्म अब पहुँच गर्न सकिँदैन। यहाँ एप र वेब संस्करण दुवै प्रतिबन्धित छन्।

ब्राजिलको सर्वोच्च संघीय अदालत (एसटीएफ) का न्यायाधीश अलेक्जान्डर डे मोराइसले प्रतिबन्ध पछि यदि कसैले भीपीएनको मद्दतले एक्स चलाउँछ भने उसलाई जरिवाना हुने फैसला गरे । अदालतको आदेश अनुसार भीपीएनको सहयोगमा एक्स चलाउँदा दैनिक ५० हजार रियास खर्च हुनेछ। नेपाली मुद्रामा यो लगभग १२ लाख रुपैयाँ हो।

ब्राजिलमा एक्सलाई ब्राजिलमा कूको समाचार र लोकतन्त्रलाई कमजोर बनाउने सामग्रीलाई बढावा दिएको आरोप लगाइएको छ। धेरै पटक फेक न्यूजको आरोप पनि लगाइएको छ ।

वीरगञ्ज (पर्सा): यातायात व्यवस्था कार्यालय वीरगञ्जले आर्थिक वर्ष २०८०/८१ मा रु एक अर्ब ५२ करोड ५१ लख ५४ हजार १५ रकम राजस्व सङ्कलन गरेको छ । कार्यालयले आव २०७९/८० को तुलनामा आव २०८०/८१ मा रु १७ करोड १९ लाख ७९ हजार एक सय ५१ रकम बढी राजस्व सङ्कलन गरेको हो ।

यातायात व्यवस्था कार्यालय वीरगञ्जका प्रमुख कमलराज गौतमले अघिल्लो आवको तुलनामा गत आवमा राजस्व सङ्कलन उत्साहप्रद रहेको बताउनुभयो । कार्यालयले आव २०७९/८० मा भने रु एक अर्ब ३५ करोड ३१ लाख ७४ हजार आठ सय ६४ रकम राजस्व सङ्कलन गरेको थियो । सो आवमा सवारीतर्फ रु एक अर्ब १९ करोड ४८ लाख १४ हजार आठ सय राजस्व सङ्कलन भएको थियो ।

सवारीचालक अनुमतिपत्रतर्फ भने रु १५ करोड ८३ लाख ६० हजार ६४ रकम राजस्व सङ्कलन भएको थियो । कार्यालयका अनुसार आव २०८०÷८१ मा बस, ट्रक, मिनीबस, मिनीट्रक, मेसिनरी औजार गरेर कुल दुई हजार दुई सय २९ सवारीसाधन दर्ता भएका छन् । त्यस्तै सोही अवधिमा कार, जिप भ्यान, माइक्रोबस, एम्बुलेन्ससहितका सवारीसाधन भने छ सय ४५ वटा दर्ता भएका छन् ।

गत आवमा टेप्पो, अटो इ–रिक्सा भने दुई हजार नौ सय ७२ वटा दर्ता भएका छन् । मोटरसाइकल र स्कुटर भने ३९ हजार सात सय ४७ वटा दर्ता भएका छन् । त्यस्तै ट्रयाक्टरलगायत सवारीसाधन भने चार सय १३ वटा दर्ता भएका छन् । गत आवमा सबैखाले नयाँ सवारीसाधन गरेर ३८ हजार चार सय ५६ वटा दर्ता भएका छन् ।

सिमकोट (हुम्ला): गुणस्तरीय सडक निर्माण नभएको हिमाली दुर्गम जिल्ला हुम्लामा तीन वर्षमा यहाँका विभिन्न क्षेत्रमा ३३ ओटा दुर्घटना भएका छन् । उक्त दुर्घटनामा परी सात जनाको मृत्यु भएको जिल्ला प्रहरी कार्यालयले जनाएको छ ।

आर्थिक वर्ष २०७८/७९ मा जिप, ट्र्याक्टर, डोजर (स्काभेटर) गरी छ वटा दुर्घटनामा एक जनाको मृत्यु भएको जिल्ला प्रहरी कार्यालयका प्रहरी निरीक्षक नरेन्द्र चन्दले बताउनुभयो । उक्त वर्षमा एकजना बालकको जिप दुर्घटनामा परी मृत्यु भएको थियो । दुर्घटनामा परी छजना घाइते भएका थिए ।

आव २०७९/८० मा विभिन्न स्थानमा १० वटा दुर्घटना भएको थियो । सोही समयमा दुर्घटनामा परी दुई जनाको ज्यान भएको प्रहरी निरीक्षक चन्दले जानकारी दिनुभयो । उक्त वर्ष महिला र पुरुषगरी २४ जना घाइते भएका थिए । घाइते सबै विभिन्न अस्पताल तथा स्वास्थ्य संस्थामा उपचारपछि घर फिर्ता भएका उहाँले बताउनुभयो ।

यस्तै गतमा जिल्लाका विभिन्न स्थानमा १८ वटा दुर्घटना भएका छन् । दुर्घटनामा परी महिला र बालक एक/एक र पुरुष दुई जनाले ज्यान गुमाएका प्रहरी निरीक्षक चन्दले जानकारी दिनुभयो । यो तीन वर्षमा गत आवमा बढी दुर्घटना हुनुका साथै दुर्घटनामा परी मृत्यु हुनेको सङ्ऋया पनि बढी रहेको उहाँले बताउनुभयो । यो आर्थिक वर्षमा ३५ जना घाइते भएका थिए ।

जानकी (बाँके) शरीरमा पानीको कमीले भएकाले एकैपरिवारका तीनसहित एकजना बालकको चार मृत्यु भएको पुष्टि भएको छ । स्वास्थ्य कार्यालय बाँकेका सूचना अधिकारी एवं महामारी रोगका ‘फोकल पर्सन’ नरेन्द्र श्रेष्ठले नरैनापुर गाउँपालिका–३ स्थित गेग्ली गाउँमा एकै परिवारका एक बालकसहित चार जनाको शरीरमा पानीको कमी भएकाले मृत्यु भएको जानकारी दिनुभयो ।

“मृतकका परिवारले स्वास्थ्यकर्मीलाई दिएको रोगको लक्षणका आधारमा जिल्ला स्वास्थ्य कार्यालयले सार्वजनिक गरेको प्रतिवेदनका अनुसार झाडापखालाका कारण शरीरमा पानीको मात्रा कमी हुनाले ७२ घण्टामा चार जनाको मृत्यु भएको हो”, फोकल पर्सन श्रेष्ठले भन्नुभयो ।

नरैनापुर गाउँपालिका स्वास्थ्य शाखाका प्रमुख नागेन्द्र शाहले भन्नुभयो, “हामीले मृतकको उपचार गर्न समय पाएनौँ । मृतकका आफन्तका अनुसार मृतक चारैजनालाई झाडापखाला भएको समयमा जीवनजललगायत अन्य झोलिलो पिउने पदार्थको अभाव भएको थियो ।” स्वास्थ्य कार्यालयले सार्वजनिक गरेको प्रतिवेदनमा झाडापखाला भई शरीरमा पानीको मात्रा कमी भएकाले निजहरुको मृत्यु भएको पुष्टि गरेको उहाँले बताउनुभयो ।

यही भदौ १४ गतेदेखि फैलिएको झाडापखाला महामारीका रुपमा भने नरहेको स्वास्थ्य शाखाका प्रमुख शाहले जानकारी दिनुभयो । नरैनापुर–३ स्थित गेग्लीका श्यामलाल पासीको घरमा पहिलोपटक झाडापखालाको सङ्क्रमण देखिएको थियो । उहाँका अनुसार ज्वरो आउने, पेट दुख्ने, टाउको दुख्ने र एकदिनमा तीनदेखि चार पटकसम्म पातलो दिसा भएकाले शरीरमा पानी अपुग हुन गई पासीको एकैघरका तीन जनाको मृत्यु भएको हो ।

स्वास्थ्य शाखा प्रमुख शाहले मृतकलाई आफन्तले बिरामी हुँदा भारतीय क्लिनिकमा उपचार गराएको र सोही क्रममा मृत्यु भएको जानकारी दिनुभयो । मृत्यु भएपछि मात्रै जिल्ला स्वास्थ्य कार्यालयलाई जानकारी प्राप्त भएको उहाँले बताउनुभयो ।

शाहले गेग्लीमा एकैदिनमा झाडापखालाबाट कसैको पनि मृत्यु नभएको जानकारी दिँदै भन्नुभयो, “एकै परिवारका ७५ वर्षीय शान्ति पासी, उहाँकी २६ वर्षीया बुहारी उषा पासी र सोही परिवारकी एक वर्षकी नाबालिकाको क्रमशः भदौ १४, १५ र १६ गते मृत्यु भएको हो ।” उहाँले एकैदिन तीन जनाको मृत्यु नभएको जानकारी दिनुभयो ।

स्वास्थ्य शाखा प्रमुख शाहले मृतकका आफन्तले समयमा उपचार नगराएका भन्दै परिवारको लापरबाहीका कारण चार जनाको ज्यान गएको बताउनुभयो । “समयमै जाँच गरेको भए रोग पहिचान भइएर उपचार हुन्थ्यो”, उहाँले भन्नुभयो, “परिवारको लापरबाहीले गर्दा अकालमा ज्यान गएको छ । चेतनाको कमीले गर्दा यस्तो घटना भएको हो ।”

नरैनापुर–३ कालाफाँटा स्वास्थ्य संस्थाका प्रमुख मो तैयब राइनले गेग्लीमा झाडापखाला फैलिएको जानकारी पाउनेबित्तिकै आवश्यक औषधिसहितको टोली परिचालित गरिएको बताउनुभयो । गाउँमा अहिले दुई बालबालिकामा पखाला पुष्टि भएको बताउँदै एकको स्थानीयस्तरमा र एकजनाको भेरी अस्पताल नेपालगञ्जमा उपचार भइरहेको उहाँले जानकारी दिनुभयो ।

प्रमुख राइनले भन्नुभयो, “महामारीका रुपमा फैलिएको हो कि भनेर पालिकाले स्वास्थ्य शिविर आयोजना गरी परीक्षण गरेको छ । शिविरमा आएकामध्ये अधिकांशमा अधिकांश ज्वरो आउने, पेट दुख्ने, टाउको दुख्नेलगायत समस्या देखिए पनि यो समस्या मौसम परिवर्तनका कारण भएको हो ।” सोमबारको शिविरमा दुईजनामा झाडापखाला पुष्टि भएको उहाँले जानकारी दिनुभयो ।

नरैनापुरमा भेटिएका झाडापखालामा हैजाजन्य किटाणु नभएको भेरीमा उपचाररत बिरामीको जाँचबाट खुलेको स्वास्थ्य शाखा प्रमुख अङ्गत शाहीले जानकारी दिनुभयो । गाउँपालिकाले गाउँमा स्वास्थ्य शिविर सञ्चालन गरी पानी शुद्धीकरणका लागि आवश्यक औषधि वितरण गरेको छ । भेरी अस्पतालमा दैनिक झाडापखालाका पाँच/छ जना बिरामी आउने गरेका अस्पतालका मेसु डा प्रकाशबहादुर थापाले जानकारी दिनुभयो ।

काठमाडौं: बंगलादेशमा कोटा सुधार आन्दोलनका क्रममा दुई बीएनपी कार्यकर्ता सहित तीन जनाको हत्या गरेको आरोपमा बंगलादेशकी अपदस्थ प्रधानमन्त्री शेख हसिना र उनका पूर्व क्याबिनेट मन्त्रीहरू विरुद्ध दुई नयाँ हत्याको मुद्दा दर्ता गरिएको छ।

यी दुवै मुद्दा शुक्रबार ढाका अदालतमा दर्ता भएका थिए। हसिनाविरुद्ध दर्ता भएका विभिन्न मुद्दामा यी नयाँ मुद्दा हुन्। सरकारी जागिरमा आरक्षण प्रणालीको विरोधमा विद्यार्थीहरूले गरेको व्यापक विरोधपछि हसिना अगस्ट ५ मा आफ्नो पद छोडेर भारत गएकी थिइन् ।

‘डेली स्टार’ अखबारले जनाएअनुसार यी दुई मुद्दासँगै हसिनामाथि हत्याको आरोपमा ७०, मानवताविरुद्धको अपराध र नरसंहारको आरोपमा आठ र अपहरणका तीन मुद्दासहित ८४ मुद्दा दर्ता भएको छ ।

बंगलादेश नेसनलिस्ट पार्टी (बीएनपी) का मतिउर रहमानले अगस्ट ४ मा पार्टी कार्यकर्ता जुल्कार हुसेन (३८) र अञ्जना (२८) को मृत्युको विषयमा किशोरगञ्जमा मुद्दा दायर गरेका थिए।

मुद्दाको विवरण अनुसार विरोध प्रदर्शनका क्रममा अवामी लिगका नेताहरूले विद्यार्थी र बिएनपी कार्यकर्ताको जुलुसमा लाठी र धारिलो हतियारले आक्रमण गरेका थिए ।

बिएनपीका केही कार्यकर्ताले नजिकैको खोरमापटारी क्षेत्रमा रहेको जिल्ला अवामी लिग नेताको घरमा शरण लिएका थिए जहाँ उनीहरूलाई हसिना नेतृत्वको पार्टीका कार्यकर्ताहरूले बन्धक बनाएर आगो लगाइदिएपछि हुसेन र अञ्जनाको मृत्यु भएको थियो ।

यस मुद्दामा हसिना, पूर्व सडक यातायात तथा पुल मन्त्री ओबैदुल कादेरसहित ८८ जनालाई आरोपी बनाइएको छ । मुन्शीगञ्जमा २२ वर्षीय युवकको मृत्युको दोस्रो नयाँ मुद्दा दर्ता भएको छ । अगस्ट ४ मा सहरको सुपरमार्केट क्षेत्रमा विद्यार्थीको नेतृत्वमा भएको विरोध प्रदर्शनका क्रममा उनको गोली हानी हत्या गरिएको थियो ।

काठमाडौं । नर्वेकी राजकुमारी मार्था लुइसले अमेरिकी जादूगर ड्युरिक भेरिटसँग विवाह गरेकी छिन् । यो विवाहको खबर मिडियामा आएसँगै यो नर्वेदेखि विश्वस्तरमा चर्चाको विषय बनेको छ ।

राजकुमारी मार्था लुइस र डुरिक भेरेटको विवाहको योजना पूर्ण रूपमा गोप्य राखिएको थियो। बिहे गेराङ्गरको एक होटलमा भएको थियो, जहाँ परिवार र नजिकका साथीहरुको सहभागिता थियो । शाही परम्पराबाट अलग भएको समारोहमा न त ठूलो भीड थियो न सार्वजनिक उत्सवहरू।

नेटफ्लिक्सको एक वृत्तचित्र टोली पनि यस अवसरको लागि उपस्थित थियो। यी ठूला मिडिया कम्पनीहरूको उपस्थितिले स्थानीय सञ्चारमाध्यमहरूमा असन्तुष्टि सिर्जना गर्यो, किनकि उनीहरूलाई यो विशेष अवसरबाट बाहिर राखिएको थियो।

राजकुमारी मार्था लुइसका आमाबाबु राजा हाराल्ड र रानी सोन्जा यस अवसरमा उपस्थित थिए। यसबाहेक, स्वीडेन र नेदरल्याण्ड्सका शाही परिवारका सदस्यहरू पनि समारोहमा उपस्थित थिए। मार्थाको पहिलो विवाहबाट जन्मिएका तीन छोरीहरू पनि समारोहमा उपस्थित थिए।

राजकुमारी मार्था लुइस र ड्यूरिक भेरिटले २०२२ मा आफ्नो इंगेजमेन्टको घोषणा गरेका थिए । पछि, नर्वेली दरबारले मार्था लुइसले आफ्नो व्यक्तिगत र शाही कर्तव्यहरू बीचको स्पष्ट भिन्नता स्थापित गर्नको लागि आफ्नो शाही भूमिका त्याग्ने घोषणा गरेको थियो ।

गत वर्ष मार्था लुइसले एक मिडिया अन्तरवार्तामा आफ्नो “परम्परागत शाही” जिम्मेवारी छोडेर नयाँ बाटो पछ्याउने निर्णयको बारेमा बोलेकी थिइन् । मार्थाले पहिले आफू भविष्यवक्ता भएको दाबी गरिन् र २०१८ सम्म एक विद्यालय चलाएको बताइन् जहाँ विद्यार्थीहरूलाई कसरी “चमत्कार गर्ने” र स्वर्गदूतहरूसँग कुरा गर्ने भनेर सिकाइन्थ्यो । उनका प्रेमी भेरिटले पनि आफू शमनको छ पुस्ताको सबैभन्दा नयाँ कडी भएको र एक पटक आफू चार मिनेट २५ सेकेन्डको लागि मरेको दाबी गरेका थिए ।

गण्डकी। गण्डकी प्रदेश सरकारका वन तथा वातावरणमन्त्री राजीव गुरूङ अर्थात दीपक मनाङेले पदबाट राजीनामा दिएका छन्। आज मन्त्रिपरिषद् हेरफेरका क्रममा भौतिक पूर्वाधार तथा यातायात व्यवस्था मन्त्रालयको जिम्मेवारी सम्हालीरहेका उनलाई वन तथा वातावरण मन्त्रालयको जिम्मेवारी दिइएको थियो।

मनाङेले परिवर्तित राजनीतिक घटनाक्रममा कारण राजीनामा दिएको राजीनामा पत्रमा उल्लेख गरेको छ। मुख्यमन्त्री सुरेन्द्रराज पाण्डेले उनको राजीनामा स्वीकृत गरेको मुख्यमन्त्री तथा मन्त्रिपरिषद्को कार्यालयले जनाएको छ।

मनाङे मनाङबाट स्वतन्त्र उम्मेदवारी दिएर प्रदेशसभा सदस्यमा निर्वाचित भएका थिए। मुख्यमन्त्री पाण्डेले आजै नेकपा (एमाले) का चार जना मन्त्री नियुक्त गरेका थिए।