काठमाडौं। भारतीय तटरक्षक गार्डको एक हेलिकप्टर आइतबार गुजरातको पोरबन्दर विमानस्थलमा अवतरणका क्रममा दुर्घटनाग्रस्त हुँदा चालक दलका तीन सदस्यको ज्यान गएको छ।

पोरबन्दरका प्रहरी उपरीक्षक भगीरथ सिंह जडेजाले बीबीसी संवाददाता गोपाल कटेशियालाई घटनाको पुष्टि गरेका छन्। उनका अनुसार, हेलिकप्टर नियमित उडान सकेर दिउँसो करिब १२:१० बजे विमानस्थलमा अवतरण गर्दै थियो। अवतरणको क्रममा दुर्घटना हुँदा हेलिकप्टरमा सवार तीनै सदस्य गम्भीर घाइते भएका थिए।

घटनापछि तुरुन्तै तीनै जनालाई पोरबन्दर अस्पताल लगिएको थियो। अस्पतालमा चिकित्सकले उनीहरूलाई मृत घोषित गरेका छन्।

प्रहरी उपरीक्षक जडेजाले दुर्घटनाको कारण हाल स्पष्ट नभएको बताए। “हेलिकप्टर दुर्घटनाको विषयमा अनुसन्धान भइरहेको छ। घटनाको छानबिन प्रहरी र भारतीय तटरक्षकले संयुक्त रूपमा गर्नेछन्,” उनले भने।

यो घटना भारतीय तटरक्षकका हेलिकप्टरहरूको सुरक्षा मापदण्डप्रति प्रश्न खडा गरेको छ। नियमित उडानपछि पनि यस्तो दुर्घटना हुनुले प्राविधिक समस्या वा मानवीय त्रुटिको सम्भावनालाई इंगित गर्न सक्ने विशेषज्ञहरूको भनाइ छ।

भारतमा पछिल्ला वर्षहरूमा सैन्य र अर्धसैन्य एयरक्राफ्ट दुर्घटनाका केही घटनाहरूले सुरक्षाका उपायहरूमाथि समीक्षा आवश्यक रहेको देखाएको छ। हालैका वर्षहरूमा भारतीय सेनाको हेलिकप्टर तथा एयरक्राफ्टमा प्राविधिक समस्या र दुर्घटनाका केही घटनाहरू रिपोर्ट भएका छन्।

भारतीय तटरक्षक र रक्षा मन्त्रालयले घटना प्रति दुःख व्यक्त गर्दै अनुसन्धान प्रतिवेदन छिटो सार्वजनिक गर्ने प्रतिबद्धता जनाएका छन्। यो दुर्घटनाले तटरक्षक गार्डका हेलिकप्टरहरूको प्राविधिक अवस्थाको पुनरावलोकन गर्ने आवश्यकतालाई पुनः प्राथमिकतामा राखेको छ।

काठमाडौं। कालिमाटीस्थित स्वर्णलक्ष्मी सहकारी ठगी प्रकरण अदालत प्रवेश गरेको छ। आइतबार जिल्ला सरकारी वकिलको कार्यालय काठमाडौंले राष्ट्रिय स्वतन्त्र पार्टी (रास्वपा) का सभापति रवि लामिछाने, गोर्खा मिडिया नेटवर्कका अध्यक्ष जिबी राई, तत्कालीन सञ्चालक छविलाल जोशीसहित ३९ जनालाई प्रतिवादी बनाउँदै मुद्दा दायर गरेको हो।

जिल्ला अदालत काठमाडौंका श्रेस्तेदार रामु शर्माका अनुसार प्रतिवादीमा गोर्खा मिडिया प्रालिका तत्कालीन सञ्चालक रवि लामिछाने र छविलाल जोशी, स्वर्णलक्ष्मी सहकारीका अध्यक्ष गितेन्द्रबाबु (जीबी) राई, उपाध्यक्ष देवेन्द्रबाबु राई, कोषाध्यक्ष कुमार रम्तेल, सचिव इरान लामा, सहसचिव कविता तामाङ, सदस्यहरू हेमन्त अधिकारी र रविना रिमाल, तथा पूर्वअध्यक्ष दीपक लामालगायत व्यक्तिहरू समावेश छन्।

यस्तै सविना आले मगर, भक्तबहादुर भोलन, सविता लामा, प्रदीप लामा, गणेशराज श्रेष्ठ, सुनिता नेवा, शान्तिकुमारी सुवेदी, रोमन काफ्ले, कमल लामा, नविन अछामी, कल्पना कुमारी श्रेष्ठ, र राजु बरालसमेत प्रतिवादी सूचीमा छन्।

पोखरामा हिरासतमा रहेका अभियुक्तहरू

पोखराको सूर्यदर्शन सहकारी ठगी प्रकरणमा पक्राउ परेका लामिछाने र जोशी कास्की जिल्ला अदालतमा थुनछेक बहस भइरहेका बेला काठमाडौंमा पनि मुद्दा दर्ता भएको हो।

कृपया तलको लिंक खोल्नुहोला।
रवि लामिछाने समेत…स्वर्णलक्ष्मी सहकारी_1736073087

काठमाडौँ: नेपाल प्रहरीका पूर्वप्रमुख सर्वेन्द्र खनालले नेकपा एमाले परित्याग गरेको घोषणा गरेका छन् । आज सामाजिक सञ्जाल फेसबुकमार्फत आफू कुनै पनि राजनैतिक पार्टीसँग आबद्ध नरहेको भन्दै सो घोषणा गरेका हुन् ।

उनले लेखेका छन्– ‘हजुरहरू मेरो राजनीतिक स्थितिबारे अन्योलमा परेको महसुस गरेर म यसै माध्यमबाट यसलाई स्पष्ट पार्न चाहन्छु, कि म अहिले कुनै पनि राजनैतिक पार्टीसँग आबद्ध छैन। म स्वतन्त्र रूपमा स्थानीय र राष्ट्रिय समस्याहरूको समाधानका लागि काम गरिरहेको छु। ‘

उनले आगामी दिनमा देश र समाजको हितका लागि आफ्नो समय व्यतीत गर्ने पनि उल्लेख गरेका छन् । खनाल औपचारिक रूपमा ६ असोज २०७९ मा उनी एमाले प्रवेश गरेका थिए ।

गत आम निर्वाचनमा काठमाडौँ क्षेत्र नं. ६ बाट प्रतिनिधिसभा सदस्यमा पराजित भएका उनी उपनिर्वाचनमा तनहुँबाट समेत पराजय बेहोरेका थिए ।

काठमाडौँ: देशभरका साना तथा मझौला उद्योगी व्यवसायीको छाता संस्था नेपाल राष्ट्रिय व्यवसायी महासङ्घको अध्यक्षमा मनोजबाबु श्रेष्ठ निर्वाचित हुनुभएको छ ।महासङ्घको सातौँ वार्षिक साधारणसभा एवं तेस्रो महाधिवेशनबाट श्रेष्ठको नेतृत्वमा ९२ सदस्यीय कार्यसमिति निर्विरोध चयन भएको हो । अध्यक्ष श्रेष्ठ खिचापोखरी–न्युरोड व्यापार सङ्घको पूर्वअध्यक्षसमेत हुनुहुन्छ ।

यस्तै, महासङ्घको वरिष्ठ उपाध्यक्षमा कमल अग्रवाल र हरिबहादुर गौतम, प्रथम उपाध्यक्षमा लक्ष्मी खड्का र हरिप्रसाद पाण्डे, १३ उपाध्यक्षमा गणेशकुमार न्यौपाने, गोरखबहादुर थापा, कुसुम महर्जन, दीपकचन्द्र प्रधान, रामप्रसाद अवाल, जयकृष्ण शर्मा, पार्वती पौडेल भट्ट, धिरेन्द्र रिजाल, मिलन श्रेष्ठ, शिवप्रसाद ढकाल, सागर शाक्य, रामकुमार तिमल्सिना र लेखनाथ पौडेल चयन हुनुभएको छ ।

यसैगरी, महासचिवमा नवीन लुइँटेल, उपमहासचिवमा रामकुमार पण्डित, नारायणप्रसाद न्यौपाने र लवराज भण्डारी, सात सचिवमा किशोरकुमार गौतम, केदारप्रसाद न्यौपाने, विजुरत्न बज्राचार्य, देवराज कार्की, सुरेन्द्रराज सुवेदी, गोपाल घिमिरे र पृथ्वीनारायण अधिकारी चयन हुनुभएको छ ।

सात सहसचिवमा प्रदीप घिमिरे, हरिप्रसाद पाण्डे, सुमित लामा, दीपककुमार श्रेष्ठ, जयराज बजगाईँ र मुलुकसिंह तामाङ, कोषाध्यक्षमा हिमलाल खराल र सहकोषाध्यक्षमा त्रिलोचन सुवेदी, यमुना श्रेष्ठ र राममणि भट्टराईलाई चयन गरिएको छ ।

साना तथा मझौला व्यवसायीको हकहित र अधिकारका लागि स्थापना भएको उक्त महासङ्घमा हाल देशभरका दुई दर्जनभन्दा बढी सङ्घ आबद्ध छन् । महासङ्घमा हाल २५ हजारभन्दा बढी व्यवसायी आबद्ध रहेको महासङ्घका निवर्तमान अध्यक्ष कुमार कार्कीले जानकारी दिनुभयो ।

भक्तपुर: सूर्यविनायक नगरपालिकाको नगरसभाको १७औँ नगर अधिवेशनले विभिन्न समितिले प्रस्तुत गरेको विभिन्न संशोधित विधेयक पारित गरेको छ । नगरप्रमुख वासुदेव थापाको अध्यक्षतामा प्रथम र दोस्रो गरी दुई चरणमा सम्पन्न नगर अधिवेशनले विभिन्न समितिको प्रतिवेदन एवं बजेट कार्यान्वयनको अवस्थाबारे प्रस्तुत प्रतिवेदनमाथि बृहत् छलफल गरी विधेयक पारित गरेको हो ।

नगरसभाका सभाध्यक्ष थापाले निर्णायार्थ प्रस्तुत गर्नुभएको नगरपालिकाको संस्था दर्ता (प्रथम संशोधन) विधेयक २०८१, आर्थिक कार्यविधि नियमित गर्ने विधेयक २०८१, आर्थिक ऐन २०८१ को प्रथम संशोधन विधेयक २०८१ र नगरपालिका तथा अन्तर्गतको सङ्गठन तथा व्यवस्थापन सर्वेक्षण प्रतिवेदन २०८१ पारित गरेको हो ।

नगरसभामा नगरप्रमुख एवं सभाअध्यक्ष थापाले चालु आर्थिक वर्ष २०८१÷८२ को ६ महिनाको अवधिमा कूल बजेटको १६ दशमलभ ०१ प्रतिशत बजेट खर्च भएको बताउनुभयो । उहाँले नगरपालिकाको चालु आर्थिक वर्षको कुल बजेट रु एक अर्ब ४० करोड ३७ लाख २२ हजार पारित गरेकामा छ महिनामा नगरको कुल बजेटको रु ३५ करोड ८६ लाख ५० हजारमात्र खर्च भएको
बताउनुभयो । नगरपालिकाको चालु खर्चतर्फ रु २३ करोड ४१ लाख ९१ हजार र पुँजीगततर्फ रु १२ करोड ४४ लाख ५९ हजार खर्च भएको उहाँले बताउनुभयो ।

नगरप्रमुख थापाले चालु आवको दुई महिना वर्षालगत्तै चाडपर्व सुरु भएकाले अपेक्षाकृत रूपमा बजेट खर्च हुन नसकेको बताउँदै चालु आवको बाँकी छ महिना योजना कार्यान्वयनमा जाने चरणमा रहेको बताउनुभयो । उहाँले बाँकी छ महिनामा बजेट खर्चको अवस्था सुधार हुने र आवको अन्त्यसम्ममा ९० प्रतिशतभन्दा बढी बजेट खर्च गर्दै नगरपालिकाले लक्ष्य हासिल गर्ने बताउनभयो । नगरपालिकले सबैभन्दा बढी बजेट भौतिक पूर्वाधारमा छुट्याएको छ ।

यसैगरी, नगरपालिकाले चालु आवको छ महिनामा रु ११ करोड ८८ लाख पाँच हजार सात सय तीन राजस्व सङ्कलन गरेको नगर अधिवेशनमा उपप्रमख सरिता तिम्सिना भट्टराईले बताउनभयो । नगरपालिकाले गत आवको सोही अवधिको तुलनामा पाँच दशमलव ६० प्रतिशत रकम बढी राजस्व सङ्कलन गरेको बताउनुभयो ।

गत आवको छ महिनामा नगरपालिकाले रु ११ करोड २४ लाख ९० हजार राजस्व सङ्कलन गरेको उल्लेख गर्दै उहाँले नगरपालिकाले चालु आवमा रु ४३ करोड ६० लाख सात हजार पाँच सय राजस्व सङ्कलन गर्ने लक्ष्य राखेको बताउनुभयो । उपप्रमुख भट्टराईले चालु आव २०८१/८२ मा नगरसभाबाट स्वीकृत तीन सय तीन, नगर कार्यपालिकाबाट स्वीकृत ३५, सङ्घ–प्रदेशबाट अख्तियार प्राप्त ३१ र विपद् व्यवस्थापनका लागि नगर कार्यपालिकाबाट स्वीकृत २१ गरी जम्मा तीन सय ९० योजना रहेकामा हालसम्म एक सय २० योजना सम्झौता भई योजना अनुगमन गरी ३४ योजना फरफारक गरिएको बताउनुभयो ।

नगरसभामा विधायन समितिका संयोजक प्रदीप कार्कीले आचारसंहिता वाचन, नगरपालिकाको विधायन समितिको प्रतिवेदन, आर्थिक कार्यविधि नियमित गर्ने विधेयक २०८१ पेश गर्नुभएको थियो । नगरउपप्रमुख एवं राजस्व परार्श समिति संयोजक एवं न्यायिक समिति संयोजक सरिता तिम्सिना भट्टराईले नगरपालिकाको न्यायिक समितिको र नगरस्तरीय अनुगमन तथा सुपरीवेक्षण तिवेदन सभामा प्रस्तुत गर्नुभएको थियो ।

सभामा विभिन्न समितिका संयोजकमध्ये राजकुमार जोशीले सार्वजनिक लेखा समितिको प्रतिवेदन, रवीन्द्र सापकोटाले संस्था दर्ता प्रथम संशोधन विधयक २०८१ र सामाजिक विकास समितिको प्रतिवेदन पेश गर्नुभएको थियो । संयोजक पुष्पराज बस्नेतले आर्थिक विकास समितिको प्रतिवेदन, शिवराम राउतले पूर्वाधार विकास समितिको प्रतिवेदन, भगवाण खत्रीले वन वातावरण तथा विपद् व्यवस्थापन समितिको प्रतिवेदन र सानुकाजी कायस्थले सुशासन, सार्वजनिक सेवा प्रवाह तथा क्षमता विकास समितिको प्रतिवेदन र सार्वजनिक सम्पत्तिको विवरण सभामा प्रस्तुत गर्नुभएको थियो ।

गण्डकी: नेपाली कांग्रेसका महामन्त्री गगनकुुमार थापाले २०८४ को निर्वाचनमा उपलब्धिपत्र लिएर जनतामाझ जानुपर्ने आवश्यकता औँल्याएका छन्। नेपाली कांग्रेस गण्डकी प्रदेश समितिद्वारा पोखरामा आयोजित ‘प्रजातान्त्रिक व्यवस्थामा पार्टी र जनप्रतिनिधि’ विषयक प्रदेशस्तरीय गोष्ठी उद्घाटन गर्दै उहाँले निर्वाचनमा जाँदा उपलब्धिपत्रका साथ प्रस्तुत हुन निर्वाचित जनप्रतिनिधिहरूलाई परिणाममुखी काम गर्न आग्रह गरे।

महामन्त्री थापाले निराश हुने अवस्था नरहेको भन्दै आगामी तीन वर्षभित्र जनताले स्पष्ट अनुभव गर्नेगरी क्रियाशील हुनुपर्ने धारणा व्यक्त गरे। “कांग्रेसको नेतृत्वमा देशले धेरै उपलब्धि हासिल गरेको छ, तर ती कामको प्रचार हुन सकेको छैन। अब थप उपलब्धिका लागि सरकारको जिम्मेवारीमा रहेका सबैले परिणाममुखी काम गर्नुपर्छ। त्यही कामको विवरण लिएर आगामी चुनावमा जनतामाझ जान तयारी गरौँ,” उनले भने।

पार्टी संगठन र निर्वाचित जनप्रतिनिधिबीच संवाद आवश्यक भएको उल्लेख गर्दै थापाले संवादले जनअपेक्षा सम्बोधन गर्न सहयोग पुग्ने बताए। समस्या मात्र सुन्ने होइन, समाधान दिन सक्ने अवस्था सिर्जना गर्न संवादलाई प्राथमिकता दिनुपर्ने उनको भनाइ थियो।

महामन्त्री थापाले पार्टीको काँधमा धेरै जिम्मेवारी रहेकाले आगामी १५औँ महाधिवेशनले पार्टी संगठन सम्हाल्न सक्ने नेतृत्व चयन गर्नुपर्ने बताए। उनले कार्यकर्ताहरूलाई आगामी चैतभित्र क्रियाशील सदस्यता नवीकरण गर्न निर्देशन दिँदै यसमा ढिलाइ भएमा सदस्यता स्वतः रद्द हुने चेतावनी पनि दिए। “चैतसम्म नवीकरण नगर्ने क्रियाशील सदस्यता त्यसपछि नवीकरण हुँदैन। समयभित्र फारम नपठाउने जिल्लाहरूको क्रियाशील सदस्यता फारम फ्रिज हुनेछ,” उनले स्पष्ट पारे।

पार्टी विधान संशोधनका लागि करिब पाँच महिना लाग्ने र त्यसपछि विधान महाधिवेशनबाट पारित गरी महाधिवेशनको प्रक्रिया अघि बढाइने जानकारी पनि थापाले दिए।

कार्यक्रममा गण्डकी प्रदेशका मुख्यमन्त्री सुरेन्द्रराज पाण्डेले पार्टी नेतृत्वको सरकारले गरेका कामको प्रचार हुन नसकेको भन्दै पार्टीले त्यसमा ध्यान दिनुपर्ने बताए। नेपाली कांग्रेसका केन्द्रीय सदस्य गोविन्द भट्टराईले सामाजिक सञ्जाललाई संगठन निर्माण र राम्रो कामको प्रचारका लागि उपयोग गर्नुपर्नेमा जोड दिए।

कार्यक्रममा प्रस्तुत कार्यपत्रहरूमा डा. रघुराज वाग्ले र डा. हेमराज लामिछानेले निर्वाचित जनप्रतिनिधिहरू जनताप्रति उत्तरदायी हुनुपर्ने औँल्याए।

नेपाली कांग्रेस गण्डकी प्रदेशका सभापति शुक्रराज शर्माको सभापत्विमा सम्पन्न उक्त कार्यक्रममा नेपाली कांग्रेस लुम्बिनी प्रदेश सभापति अमरसिंह पुन, केन्द्रीय सदस्य मधु आचार्य, कृष्णचन्द्र नेपाली, र गण्डकी प्रदेशका प्रवक्ता माधवप्रसाद बास्तोला (मधु)लगायतले सम्बोधन गरे।