काठमाडौँ: ठमेलमा प्रहरीमाथि आक्रमण तथा अभद्र व्यवहार गरेको आरोपमा प्रहरीले दुई जनालाई पक्राउ गरेको छ। दरबारमार्ग प्रहरी वृत्तबाट खटिएको टोलीमाथि माघ २४ गते सार्वजनिक सडकमा हो-हल्ला गर्दै हिँडिरहेका ५/६ जनाको समूहले आक्रमण गरेको थियो।

घटनापछि फरार भएकाहरूको खोजीमा रहेका प्रहरी अधिकारीहरूले काठमाडौँ महानगरपालिका-९ स्थित एयरपोर्ट नजिकैबाट दुई जनालाई पक्राउ गरेका छन्।

पक्राउ परेका व्यक्तिहरूमा ताप्लेजुङ फुङलिङ नगरपालिका-१ स्थायी घर भई हाल काठमाडौँको लैनचौरमा बस्दै आएका २५ वर्षीय दिनेश सिग्देल र डडेल्धुरा गन्यापधुरा गाउँपालिका-५ स्थायी घर भई हाल लैनचौरमा बस्दै आएका रमेश फुलारा छन्। दिनेश सिग्देल अनेरास्ववियु अमृत साइन्स क्याम्पस कमिटीका उपाध्यक्ष हुन्।

जिल्ला प्रहरी परिसर काठमाडौँका सूचना अधिकारी प्रहरी उपरीक्षक अपिलराज बोहराका अनुसार पक्राउ परेका दुवै जनामाथि अभद्र व्यवहार मुद्दामा अनुसन्धान भइरहेको छ। जिल्ला प्रशासन कार्यालय बबरमहलबाट पाँच दिनको म्याद थप अनुमति लिएर अनुसन्धान जारी राखिएको प्रहरीले जनाएको छ।

काठमाडौँ । बेलायती राजकुमार एडवार्ड नेपाल आइपुगेका छन्। आज बिहान उनकी श्रीमती राजकुमारी सोफिया पनि नेपाल आएकी थिइन्।

त्रिभुवन अन्तर्राष्ट्रिय विमानस्थलमा राजकुमारको आगमनको क्रममा परराष्ट्र मन्त्रालयका अधिकारीहरू र नेपालस्थित बेलायती दूतावासका प्रतिनिधिहरूले स्वागत गरेका थिए।

जानकारीअनुसार, राजकुमार दिल्ली हुँदै र राजकुमारी लन्डन हुँदै फरक–फरक उडानमार्फत नेपाल आइपुगेका हुन्।

काठमाडौं: ताप्लेजुङको पाथीभरा (मुक्कुम्लुङ) क्षेत्रमा निर्माण गर्न लागिएको केबलकार परियोजनासम्बन्धी विवाद समाधान गर्न सोमबार राति भएको वार्ता सकारात्मक रूपमा टुंगिएको छ।

सरकारद्वारा गठित वार्ता टोली र आन्दोलनरत पक्षबीच ललितपुरमा भएको छलफल सकारात्मक भए पनि ठोस निष्कर्षमा पुग्न सकेन।

सरकारी वार्ता टोलीका संयोजक सहसचिव प्रेमप्रसाद भट्टराईले वार्ता सकारात्मक भए पनि सहमति हुन बाँकी रहेको जानकारी दिए। “वार्ता सकारात्मक भयो तर कुनै निष्कर्षमा पुग्न सकेनौं। आज बिहान ११ बजे पुनः वार्ता बस्ने सहमति भएको छ,” उनले भने।

प्रमुख मागहरू
वार्ताका क्रममा आन्दोलनरत पक्षले केबलकार निर्माण स्थगित गर्नुपर्ने र पक्राउ परेका व्यक्तिहरूलाई रिहा गर्नुपर्ने माग राखेका छन्।

अर्को चरणको वार्ता
वार्ता टोलीहरूबीच आज बिहान ११ बजे पुनः वार्ता बस्ने सहमति भएको छ।

काठमाडौँ: नेपाल राष्ट्र बैंकले आजको लागि विदेशी मुद्राको विनिमय दर सार्वजनिक गरेको छ। अमेरिकी डलर एकको खरिद दर १ सय ३९ रूपैयाँ २० पैसा र बिक्री दर १ सय ३९ रूपैयाँ ८० पैसा कायम भएको छ। अघिल्लो दिनको तुलनामा डलरको मूल्य आज पुनः बढेको हो।

युरोपियन युरो एकको खरिद दर १ सय ४२ रूपैयाँ ५२ पैसा र बिक्री दर १ सय ४३ रूपैयाँ १३ पैसा रहेको छ भने युके पाउन्ड स्ट्रलिङको खरिद दर १ सय ७१ रूपैयाँ २६ पैसा र बिक्री दर १ सय ७२ रूपैयाँ रहेको छ।

स्वीस फ्र्याङ्क एकको खरिद दर १ सय ५१ रूपैयाँ ७७ पैसा र बिक्री दर १ सय ५२ रूपैयाँ ४३ पैसा कायम गरिएको छ।

त्यस्तै, अष्ट्रेलियन डलरको खरिद दर ८५ रूपैयाँ ४५ पैसा र बिक्री दर ८६ रूपैयाँ ८२ पैसा, क्यानेडियन डलरको खरिद दर ९४ रूपैयाँ ७२ पैसा र बिक्री दर ९५ रूपैयाँ १२ पैसा रहेको छ।

सिङ्गापुर डलरको खरिद दर १ सय १ रूपैयाँ ७४ पैसा र बिक्री दर १ सय २ रूपैयाँ १८ पैसा कायम गरिएको छ।

जापानी येन १० को खरिद दर ९ रूपैयाँ र बिक्री दर ९ रूपैयाँ ४ पैसा रहेको छ भने चिनियाँ युआन एकको खरिद दर १९ रूपैयाँ २० पैसा र बिक्री दर १९ रूपैयाँ २८ पैसा रहेको छ।

साउदी रियालको खरिद दर ३७ रूपैयाँ ११ पैसा र बिक्री दर ३७ रूपैयाँ २७ पैसा, कतारी रियालको खरिद दर ३८ रूपैयाँ १८ पैसा र बिक्री दर ३८ रूपैयाँ ३५ पैसा कायम भएको छ।

थाई भाटको खरिद दर ४ रूपैयाँ ९ पैसा र बिक्री दर ४ रूपैयाँ ११ पैसा, युएई दिरामको खरिद दर ३७ रूपैयाँ ९० पैसा र बिक्री दर ३८ रूपैयाँ ६ पैसा तोकिएको छ।

केन्द्रीय बैंकका अनुसार मलेसियन रिङ्गेटको खरिद दर ३१ रूपैयाँ ११ पैसा र बिक्री दर ३१ रूपैयाँ २४ पैसा रहेको छ भने साउथ कोरियन वन १०० को खरिद दर ९ रूपैयाँ ४९ पैसा र बिक्री दर ९ रूपैयाँ ५३ पैसा रहेको छ।

स्वीडिस क्रोनरको खरिद दर १२ रूपैयाँ ३९ पैसा र बिक्री दर १२ रूपैयाँ ४५ पैसा, डेनिस क्रोनरको खरिद दर १९ रूपैयाँ १० पैसा र बिक्री दर १९ रूपैयाँ १८ पैसा तोकिएको छ।

हङकङ डलरको खरिद दर १७ रूपैयाँ ८६ पैसा र बिक्री दर १७ रूपैयाँ ९४ पैसा कायम गरिएको छ भने कुवेती दिनारको खरिद दर ४५० रूपैयाँ ४६ पैसा र बिक्री दर ४५२ रूपैयाँ ४० पैसा तोकिएको छ।

त्यस्तै, बहराइन दिनारको खरिद दर ३६९ रूपैयाँ २२ पैसा र बिक्री दर ३७० रूपैयाँ ८१ पैसा, ओमानी रियालको खरिद दर ३६१ रूपैयाँ ५७ पैसा र बिक्री दर ३६३ रूपैयाँ १३ पैसा रहेको छ।

भारतीय रूपैयाँ १०० को खरिद दर १ सय ६० रूपैयाँ र बिक्री दर १ सय ६० रूपैयाँ १५ पैसा कायम गरिएको छ।

राष्ट्र बैंकले यो विनिमय दर आवश्यकतानुसार कुनै पनि समय परिवर्तन गर्न सकिने जनाएको छ। वाणिज्य बैंकहरूले निर्धारण गर्ने दर फरक हुन सक्ने र अद्यावधिक विनिमय दर राष्ट्र बैंकको वेबसाइटमा उपलब्ध हुने जनाइएको छ।

काठमाडौँ: कालिमाटी फलफूल तरकारी विकास समितिले आजका लागि विभिन्न कृषि उपजहरूको थोक मूल्य निर्धारण गरेको छ। समितिका अनुसार प्रस्तुत फलफूल र तरकारीको अधिकतम थोक मूल्य सूची निम्नानुसार रहेको छ।

तरकारीको मूल्य सूची

गोलभेँडा (भारतीय) प्रतिकेजी रु ३० देखि ७०
आलु (भारतीय) प्रतिकेजी रु ३४
प्याज (भारतीय) प्रतिकेजी रु ६५
बन्दा (लोकल) प्रतिकेजी रु २०, तराई प्रतिकेजी रु १५
काउली (लोकल) प्रतिकेजी रु १२, ज्यापु काउली रु १८
रायो साग प्रतिकेजी रु १२
पालुङ्गो साग प्रतिकेजी रु ४५
मेथीको साग प्रतिकेजी रु ४५
विशेष तरकारीको मूल्य
तिते करेला प्रतिकेजी रु ११०
सलगम प्रतिकेजी रु १००
स्कूस प्रतिकेजी रु ४०
भिण्डी प्रतिकेजी रु १००
पिँडालु प्रतिकेजी रु ९०
फलफूलको मूल्य सूची
स्याउ (फूजी) प्रतिकेजी रु ३००
केरा (दर्जन) रु १५०
सुन्तला (नेपाली) प्रतिकेजी रु १४०
अङ्गुर (हरियो) प्रतिकेजी रु २५०
स्ट्रबेरी प्रतिकेजी रु ५००
किबी प्रतिकेजी रु २५०
अन्य उपजको मूल्य
अदुवा प्रतिकेजी रु १२०
खुर्सानी (अकबरे) प्रतिकेजी रु ३००
लसुन (नेपाली र चाइनिज) प्रतिकेजी रु ३००
हरियो धनिया प्रतिकेजी रु ५०
ताजा माछा (रहु) प्रतिकेजी रु ३५०
समितिका अनुसार मूल्य निर्धारण आपूर्ति र मागलाई ध्यानमा राखी गरिएको हो।

गण्डकी: गण्डकी प्रदेशका मुख्यमन्त्री सुरेन्द्रराज पाण्डेले संघीयताको कार्यान्वयनसँगै प्रदेश सरकार सुशासन, समुन्नति, र सामाजिक न्यायलाई आत्मसात् गर्दै दिगो विकासतर्फ अघि बढेको बताउनुभएको छ।

प्रदेश स्थापनाको आठौँ वर्ष प्रवेशको अवसरमा प्रदेशवासीलाई शुभकामना दिँदै मुख्यमन्त्री पाण्डेले समन्वय, सहअस्तित्व, र सहकारिताको सिद्धान्तमा आधारित लोकतन्त्र र सुशासन स्थापित गर्न प्रदेश सरकार प्रतिबद्ध रहेको उल्लेख गर्नुभयो।

“संवैधानिक मूल्य र कानुनको पालना गर्दै प्रदेश सरकार नीतिगत, कानुनी, र संस्थागत पक्षलाई बलियो बनाउन परिपक्व बन्दै गएको छ,” उहाँले भन्नुभयो। सरकार आत्मनिर्भर र समुन्नत प्रदेश निर्माणको संकल्प पूरा गर्न कटिबद्ध रहेको उहाँको भनाइ छ।

मुख्यमन्त्री पाण्डेले समावेशी र दिगो विकासलाई अघि बढाउन सामूहिक प्रयास आवश्यक रहेको बताउँदै नागरिकलाई चुस्त सेवा र सुशासनको अनुभूति दिलाउने सरकारको प्राथमिकता रहेको स्पष्ट गर्नुभयो।

“भौतिक पूर्वाधार, शिक्षा, स्वास्थ्य, रोजगारी, कृषि, पर्यटन, र उद्यमशीलताको प्रवर्द्धन गर्दै दिगो विकासका लक्ष्य पूरा गर्ने दिशामा सरकारको नीति तथा कार्यक्रम सञ्चालन भइरहेको छ,” शुभकामना सन्देशमा उल्लेख गरिएको छ।

पर्वत: फलेवास नगरपालिका–११ पाङ्राङका कृषकले यस वर्ष काँक्रोको बीउ बिक्रीबाट रु ६ करोड ३० लाख आम्दानी गरेका छन्। विगत २५ वर्षदेखि व्यावसायिक रूपमा बीउ उत्पादन गर्दै आएका यहाँका कृषकले ६३ क्विन्टल काँक्रोको बीउ उत्पादन गरेका हुन्।

स्थानीय कृषक सूर्यबहादुर कुँवरको नेतृत्वमा विसं २०५७ मा गठन भएको नारायणस्थान बीउ उत्पादन समूहले व्यावसायिक बीउ उत्पादन सुरु गरेको थियो। कृषक बाबुराम भुसालका अनुसार प्रतिकिलो रु १० हजारका दरले बीउ बिक्री गरिएको हो।

गत वर्ष ७० क्विन्टल बीउ उत्पादन भएकोमा यो वर्ष उत्पादन घटेर ६३ क्विन्टल मात्र भएको छ। गत वर्ष रु ७ करोड आम्दानी भएको थियो। भक्तपुरे लोकल जातको काँक्रोको बीउ यहाँका कृषकले उत्पादन गर्दै आएका छन्।

शुरुवातमा चार किलो काँक्राको बीउ र ६५ किलो मूलाको बीउ उत्पादन भएको भुसालले बताउनुभयो। “पहिले रु ८ सयमा बिक्री हुने बीउ अहिले रु १० हजार प्रति किलोका दरले बिक्री हुन्छ,” उहाँले भन्नुभयो।

अहिले यहाँका ७२ परिवार व्यावसायिक काँक्रो खेतीमा संलग्न छन्। अर्का कृषक टुकप्रसाद पौडेलले यस वर्ष एक क्विन्टल बीउ बिक्री गरी रु १२ लाख आम्दानी गरेको जानकारी दिनुभयो। “काँक्राको बीउ नगदेँ बाली हो। गाउँबाटै बिक्री गर्न पाइने भएकाले यसको उत्पादन फाइदाजनक बनेको छ,” पौडेलले खुसी व्यक्त गर्नुभयो।

पौडेलका अनुसार कृषकले फागुनको पहिलो साता रोपेको काँक्रा जेठमा तयार हुन्छ। असारसम्म बीउ बिक्री गरिन्छ।

जिल्लास्थित कृषि ज्ञान केन्द्रका प्रमुख पर्शुराम अधिकारीले फलेवास नगरपालिका–११ पाङ्राङ र जलजला गाउँपालिका–७ धाइरिङमा व्यावसायिक काँक्रो बीउ उत्पादन भइरहेको बताउनुभयो। “उत्पादित बीउ कृषि अनुसन्धान केन्द्र र नार्कमार्फत सिफारिस गरिन्छ। व्यावसायिक कृषकलाई केन्द्रबाट अनुदान र प्राविधिक सहयोग प्रदान गरिन्छ,” उहाँले भन्नुभयो।

धाइरिङका कृषकले यो वर्ष मात्र बीउ बिक्रीबाट रु ४ करोड आम्दानी गरेका छन्।