सुनसरी । अन्तर्राष्ट्रिय आमन्त्रण नवौँ भरौल गोल्ड कप फुटबल प्रतियोगिता–२०८२ सफलतापूर्वक सम्पन्न भएको छ। वराहक्षेत्र नगरपालिका–कालाबंजरमा आयोजित प्रतियोगिताको उपाधि आरटीएफसी मलेसियाले जितेको हो।

फाइनल खेलमा आरटीएफसी मलेसियाले पथरी–११ फुटबल क्लब, मोरङलाई ३–२ गोलको प्रतिस्पर्धात्मक नतिजामा पराजित गर्दै च्याम्पियन बन्न सफल भयो। निकै रोमाञ्चक बनेको खेलमा दुवै टोलीले उत्कृष्ट प्रदर्शन गरेका थिए, जसले दर्शकहरूलाई अन्तिम समयसम्म उत्साहित बनाएको थियो।

प्रतियोगिताको सफल आयोजनामा योगदान पु¥याउने आयोजक समिति, विभिन्न सहयोगी संस्था, प्रायोजक तथा व्यवस्थापन टोलीप्रति आयोजकले आभार व्यक्त गरेको छ। साथै, सहभागी सबै टोलीहरूले अनुशासित र खेलभावनाअनुसार प्रतिस्पर्धा प्रस्तुत गरेकोमा प्रशंसा गरिएको छ।

स्थानीय स्तरमा फुटबलको विकास र खेल संस्कृतिको प्रवर्द्धन गर्ने उद्देश्यले आयोजना गरिएको प्रतियोगिताले खेलप्रेमी दर्शकहरूको उल्लेखनीय साथ पाएको आयोजकले जनाएको छ। आगामी दिनहरूमा यस्ता प्रतियोगितालाई निरन्तरता दिँदै अझ व्यवस्थित र आकर्षक बनाउने प्रतिबद्धता आयोजक पक्षले व्यक्त गरेको छ।

बाजुरा । बाजुरा जिल्लाका चार वटा स्थानीय तहका विभिन्न स्थानमा सञ्चालन गरिएको ज्येष्ठ नागरिक स्वास्थ्य सेवा शिविरबाट ३७० भन्दा बढी व्यक्तिहरू लाभान्वित भएका छन्। जिल्ला अस्पताल बाजुरा, स्वास्थ्य कार्यालय बाजुरा तथा सम्बन्धित स्थानीय तहका स्वास्थ्य शाखाको पहलमा स्वास्थ्य कार्यालय बाजुराद्वारा शिविर आयोजना गरिएको हो।

उक्त शिविर त्रिवेणी, बुढीगंगा, खप्तड छेडेदह र गौमुल गाउँपालिकामा सञ्चालन गरिएको थियो। चैत्र २६ देखि २९ गतेसम्म चलेको शिविरमा मधुमेह, रक्तचाप तथा नाडी (पल्स) परीक्षण गरिएको थियो। साथै लक्षणका आधारमा अन्य रोगहरूको पहिचान गरी आवश्यक औषधि वितरण र परामर्श सेवा प्रदान गरिएको थियो।

जटिल रोग भएका बिरामीहरूलाई थप परीक्षण तथा उपचार व्यवस्थापनका लागि प्रेषणसमेत गरिएको स्वास्थ्य कार्यालय बाजुराका जनस्वास्थ्य अधिकृत कुमार न्यौपानेले जानकारी दिए। ज्येष्ठ नागरिकहरूको स्वास्थ्य परीक्षण तथा आवश्यक उपचार सेवा उपलब्ध गराउने उद्देश्यले सञ्चालन गरिएको शिविर प्रभावकारी बनेको उनले बताए।

ग्रामीण क्षेत्रमा रहेका ज्येष्ठ नागरिकलाई सहज रूपमा स्वास्थ्य सेवा पुर्‍याउने लक्ष्यसहित शिविर सञ्चालन गरिएको हो। गाउँमै निःशुल्क स्वास्थ्य सेवा पाउँदा स्थानीयवासीहरू खुसी भएका छन्। आगामी दिनमा अन्य पालिकाहरूमा पनि यस्ता शिविर सञ्चालन गरिने स्वास्थ्य कार्यालय बाजुराले जनाएको छ।

काठमाडौं । हाल नेपालमा पश्चिमी वायु र स्थानीय वायुको आंशिक प्रभाव देखिएको छ। यसको प्रभावका कारण कोशी, बागमती र गण्डकी प्रदेशका हिमाली तथा पहाडी भूभागमा साधारणतया बदली रहेको छ भने अन्य हिमाली र पहाडी क्षेत्रहरूमा आंशिक बदली देखिएको छ। तराई भूभागमा भने मौसम मुख्यतया सफा रहेको छ।

आज दिउँसो देशका हिमाली क्षेत्रमा साधारण बदली रहनेछ भने पहाडी क्षेत्रमा आंशिक बदली रहनेछ। तराई क्षेत्रमा मौसम सामान्यतया सफा रहनेछ। कोशी प्रदेशका पहाडी र हिमाली क्षेत्रसँगै बागमती र गण्डकी प्रदेशका हिमाली भूभागका एक–दुई स्थानमा मेघगर्जन र चट्याङसहित हल्का वर्षा तथा हिमपातको सम्भावना रहेको छ।

आज राति हिमाली भूभागमा आंशिक बदली रहनेछ भने पहाडी र तराई क्षेत्रमा मौसम मुख्यतया सफा रहनेछ। कोशी र गण्डकी प्रदेशका हिमाली क्षेत्रमा एक–दुई स्थानमा मेघगर्जन, चट्याङसहित हल्का वर्षा र हिमपातको सम्भावना रहेको मौसम पूर्वानुमान महाशाखाले जनाएको छ।

काठमाडौं । बीबीसी फारसी सेवाका अनुसार इरान र अमेरिकाबीचको वार्ता केही महत्वपूर्ण विषयमा असहमति भएपछि निष्कर्षविहीन बनेको छ । इरानी विदेश मन्त्रालयका प्रवक्ता इस्माइल बकाईले ‘दुई–तीन महत्त्वपूर्ण बुँदाहरूमा मतभेद’का कारण सम्झौता हुन नसकेको बताएका छन् ।

उनका अनुसार पाकिस्तानको मध्यस्थतामा २४ देखि २५ चरणसम्म अप्रत्यक्ष वार्ता भए पनि अन्तिम सहमति जुट्न सकेन । “केही विषयमा हामी अमेरिकी प्रतिनिधिमण्डलसँग सहमतिमा पुगेका थियौँ, तर दुई वा तीन बुँदामा विचार फरक परेकाले सम्झौता हुन सकेन,” उनले इरान न्यूज नेटवर्कसँग भने ।

यद्यपि, कुन विषयमा असहमति भयो भन्नेबारे उनले स्पष्ट पारेनन् । बकाईका अनुसार क्षेत्रीय सुरक्षा र हर्मुज जलडमरूजस्ता नयाँ मुद्दा थपिँदा वार्ता अझ जटिल बनेको हो ।

बीबीसी फारसी सेवाले यसअघि उनको अर्को अभिव्यक्तिलाई उद्धृत गर्दै वार्ता “अविश्वास र शंकाको वातावरण”मा सुरु भएको जनाएको थियो । “४० दिनको युद्धपछि वार्ता सुरु भएकाले एउटै बैठकमा सम्झौता हुने अपेक्षा गर्नु स्वाभाविक थिएन,” उनले बताएका छन् ।

इरानले पाकिस्तानसहित क्षेत्रका अन्य मुलुकहरूसँग संवाद र कूटनीतिक सम्पर्कलाई निरन्तरता दिने जनाएको छ । बकाईले कूटनीतिलाई देशको हित संरक्षण गर्ने प्रमुख माध्यमका रूपमा व्याख्या गर्दै “कूटनीति कहिल्यै समाप्त हुँदैन” भन्ने धारणा व्यक्त गरेका छन् ।

काठमाडौं । प्रधानमन्त्री तथा मन्त्रीहरूको सम्पत्ति विवरण सार्वजनिक गरिएको छ । प्रधानमन्त्री तथा मन्त्रिपरिषद् कार्यालयले आइतबार साँझ प्रधानमन्त्री बालेन्द्र शाह (बालेन)सहित सबै मन्त्रीहरूको सम्पत्ति विवरण सार्वजनिक गरेको हो ।

सार्वजनिक विवरणअनुसार प्रधानमन्त्री बालेन्द्र शाहको बैंक मौज्दात १ करोड ४६ लाख रुपैयाँ रहेको छ । उक्त आम्दानीको स्रोतका रूपमा उनले फेसबुक, युट्युब, टिकटकलगायत सामाजिक सञ्जाल उल्लेख गरेका छन् ।

सम्पत्ति विवरणमा उनकी पत्नी सविनाको नाममा १९० तोला सुन रहेको जनाइएको छ, जसको स्रोत पैतृक भएको उल्लेख गरिएको छ ।

त्यस्तै, शाहले आमा ध्रुवदेही शाहको नाममा काठमाडौंमा ५ आना र धनुषामा १.२ बिघा जग्गा रहेको विवरण दिएका छन् । साथै, पिता रामनारायण शाहको नाममा महोत्तरीमा ९ बिघा जग्गा रहेको उल्लेख गरेका छन् ।

काठमाडौँ । सर्वोच्च अदालतले सहकारी क्षेत्रमा देखिएको वर्तमान संकटलाई ‘प्रणालीगत विफलता’को संज्ञा दिँदै यसको समाधानका लागि व्यापक निर्देशनात्मक आदेश जारी गरेको छ ।

न्यायाधीशद्वय कुमार रेग्मी र मेघराज पोखरेलको इजलासले पीडितको बचत फिर्ता गराउन कसुरदार ठहर भएका सहकारी पदाधिकारी र ऋण अपचलनकर्ताको सम्पत्ति जफत गरी ‘सहकारी पीडित राहत कोष’ स्थापना गर्न आदेश दिएको छ । उक्त कोषबाट पीडितमध्ये महिला, एकल महिला, ६० वर्षभन्दा माथिका ज्येष्ठ नागरिक, दलित तथा अपाङ्गता भएका व्यक्तिलाई प्राथमिकता दिन भनिएको छ ।

अधिवक्ता रवीन्द्र प्रसाद शर्मासहितका निवेदकहरूले सहकारी संस्थाहरूले नेपाल राष्ट्र बैंकको अनुमति बिना बैंकिङ कारोबार गर्दै सर्वसाधारणको अर्बौं रुपैयाँ जोखिममा पारेको भन्दै रिट दायर गरेका थिए । सोही रिटको पूर्णपाठ हालै सार्वजनिक भएको हो ।

सर्वोच्चले सहकारी र बैंकको कारोबार फरक प्रकृतिको भएको ठहर गर्दै सबै सहकारीको दर्ता खारेज गर्ने माग अस्वीकार गरेको छ । तर सार्वजनिक हितलाई ध्यानमा राख्दै अदालतले संविधानका उपभोक्ता अधिकार र राज्यका निर्देशक सिद्धान्तलाई आधार बनाउँदै विभिन्न सुधारात्मक निर्देशन दिएको छ ।

अदालतले सहकारी क्षेत्रमा देखिएका प्रमुख कमजोरीहरू—लेखापरीक्षणमा पारदर्शिताको अभाव, ऋण प्रवाहमा अनुशासनको कमी र बचत बीमाको व्यवस्था नहुनु—लाई संरचनागत समस्या मानेको छ । साथै, सहकारीलाई बैंकजस्तो बनाउन नहुने तर बैंकसरह कडा नियमनको दायरामा ल्याउनुपर्ने स्पष्ट गरेको छ ।

अदालतले ८ बुँदे निर्देशनात्मक आदेश जारी गर्दै देशभरका समस्याग्रस्त सहकारीहरूको राष्ट्रिय डिजिटल सूची सार्वजनिक गर्न, शंकास्पद सञ्चालकहरूको सम्पत्ति रोक्का गर्न तथा ठूला कारोबार गर्ने सहकारीहरूमा विशेष लेखापरीक्षण गर्न आदेश दिएको छ ।

त्यसैगरी, संघ, प्रदेश र स्थानीय तहबीच सहकारी नियमनको स्पष्ट कार्यविभाजन गर्न, सबै सहकारीहरूको वित्तीय विवरण अनलाइन प्रणालीमा अनिवार्य रूपमा राख्न तथा सदस्यहरूले मोबाइल वा सन्देशमार्फत आफ्नो खाताको विवरण प्राप्त गर्न सक्ने व्यवस्था गर्न निर्देशन दिएको छ ।

शासन सुधारअन्तर्गत ठूला सहकारीका पदाधिकारीका लागि वित्तीय साक्षरता अनिवार्य गर्न, एउटै परिवारका सदस्यहरूको नियन्त्रण सीमित गर्न तथा कार्यकाल सम्बन्धी स्पष्ट व्यवस्था लागू गर्न पनि आदेश दिइएको छ ।

सर्वोच्चले स्वतन्त्र सहकारी छानबिन आयोग गठन गर्न, विगत १० वर्षका हिनामिना घटनाहरूको छानबिन गर्न तथा सहकारी अपराधसम्बन्धी मुद्दाको छिटो टुंगो लगाउन विशेष इजलास स्थापना गर्न अध्ययन गर्न पनि सरकारलाई निर्देशन दिएको छ ।

न्यायमा पहुँच सुनिश्चित गर्न पीडितलाई निःशुल्क कानुनी सहायता, प्रत्येक जिल्लामा एकद्वार उजुरी प्रणाली, अनलाइन दर्ता र टोलफ्री सेवा सञ्चालन गर्न भनिएको छ । दुर्गम क्षेत्रका लागि मोबाइल कानुनी सहायता टोली परिचालन गर्न पनि सुझाव दिइएको छ ।

कानुनी सुधारअन्तर्गत सहकारी ऐन, २०७४ संशोधन गरी निक्षेप बीमा अनिवार्य बनाउने, पदाधिकारीको व्यक्तिगत दायित्व स्पष्ट गर्ने तथा नियमन प्रणालीलाई स्तरीकृत बनाउने प्रस्ताव संसदमा पेस गर्न भनिएको छ ।

यसैगरी, ५० करोड रुपैयाँभन्दा बढी कारोबार गर्ने सहकारीहरूको निरीक्षणका लागि नेपाल राष्ट्र बैंकलाई स्पष्ट मापदण्ड तयार गर्न निर्देशन दिइएको छ ।

अन्ततः अदालतले सहकारी सदस्यहरूको वित्तीय साक्षरता अभिवृद्धि गर्न वार्षिक कार्यक्रम सञ्चालन गर्न तथा विद्यालय पाठ्यक्रममा सहकारी र वित्तीय साक्षरता समावेश गर्न पनि सम्बन्धित निकायलाई निर्देशन दिएको छ ।

काठमाडौं । प्रधानमन्त्री बालेन्द्र शाहको पहिलो औपचारिक वैदेशिक भ्रमणका रूपमा हुने भारत भ्रमणको तयारी सरकारले तीव्र बनाएको छ । भारतीय प्रधानमन्त्री नरेन्द्र मोदीले शाह प्रधानमन्त्री निर्वाचित भएपछि दिएको बधाई सन्देशसँगै भारत भ्रमणको निम्तो दिएका थिए ।

उक्त निमन्त्रणालाई स्वीकार गर्दै प्रधानमन्त्री शाहले उपयुक्त समयमा भारत भ्रमण गर्ने जनाएका थिए । सोहीअनुसार परराष्ट्र मन्त्रालयले भ्रमणको तयारीलाई गति दिएको हो ।

परराष्ट्रमन्त्री शिशिर खनालका अनुसार भ्रमणलाई केवल शिष्टाचारमा सीमित नराखी ‘नतिजामुखी’ बनाउने सरकारको योजना छ । भ्रमणका क्रममा नेपालको जलविद्युत् भारतीय बजारमा सहज पहुँच दिलाउने तथा बंगलादेशसँगको त्रिदेशीय विद्युत् व्यापारका लागि ठोस खाका तयार पार्ने विषयलाई उच्च प्राथमिकतामा राखिएको छ ।

यसैगरी, भैरहवा र पोखरा अन्तर्राष्ट्रिय विमानस्थलका लागि नयाँ हवाई प्रवेश मार्ग उपलब्ध गराउने विषयमा भारतसँग निर्णायक वार्ता गर्ने तयारी गरिएको छ ।

सन् १९५० को सन्धि र ईपीजी प्रतिवेदनबारे नेपालको स्पष्ट अडान राख्दै दुई देशबीचको कूटनीतिक सम्बन्धलाई ‘रिसेट’ गर्ने प्रधानमन्त्री शाहको मुख्य एजेन्डा रहेको बताइएको छ ।

भ्रमणको मिति तय गर्नुअघि दुवै देशका सचिवस्तरीय संयन्त्रहरूबीच एजेन्डामा सहमति जुटाइनेछ । परराष्ट्र मन्त्रालयका अनुसार आगामी महिनाभित्रै भ्रमण सम्पन्न गर्ने तयारी भइरहेको छ ।

परम्परागत राजनीतिक पृष्ठभूमिभन्दा फरक छवि बनाएका प्रधानमन्त्री शाहका लागि यो भ्रमण औपचारिक भेटघाटमा सीमित नरही नेपालको राष्ट्रिय हितलाई नयाँ ढङ्गले प्रस्तुत गर्ने महत्वपूर्ण अवसरका रूपमा हेरिएको छ । साथै, भ्रमणका क्रममा विश्वासको वातावरण निर्माणलाई पहिलो प्राथमिकता दिइने बताइएको छ ।

विगतमा देखिएका कूटनीतिक चिसोपन र आपसी आशंकालाई चिर्दै नेपाललाई एक भरपर्दो र गतिशील छिमेकीका रूपमा प्रस्तुत गर्नु प्रधानमन्त्री शाहको प्रमुख जिम्मेवारी रहनेछ ।

काठमाडौं । विश्वप्रसिद्ध गायिका आशा भोसलेको ९२ वर्षको उमेरमा निधन भएको छ। लामो समयदेखि भारतीय संगीत क्षेत्रमा सक्रिय रहँदै आएकी भोसलेको मुम्बईस्थित ब्रीच क्यान्डी अस्पतालमा उपचारका क्रममा आइतबार निधन भएको हो।

नेपाली सुगम संगीत र चलचित्र क्षेत्रमा समेत अमिट छाप छोड्न सफल भोसलेको निधनले नेपालको कला क्षेत्रसमेत शोकाकुल बनेको छ।

सन् १९६६ मा प्रदर्शनमा आएको पहिलो नेपाली ऐतिहासिक चलचित्र ‘माइतीघर’ मार्फत उनले नेपाली संगीतमा प्रवेश गरेकी थिइन्। उक्त चलचित्रका “यो हो मेरो प्राणभन्दा प्यारो माइतीघर” र “गैरी खेतको शिरै हान्यो” जस्ता गीतहरू आज पनि नेपाली दर्शक–श्रोतामाझ उत्तिकै लोकप्रिय छन्। उनले नेपाली भाषामा करिब सयभन्दा बढी गीतमा स्वर दिएकी छिन्।

उनका चर्चित नेपाली गीतहरूमा “मोहनी लाग्ला है” (नारायण गोपालसँगको युगल), “साउने झरीमा”, “झझल्को लिएर आएछ सावन”, “किन किन तिम्रो तस्बिर” लगायत पर्दछन्।

भोसलेले हिन्दी मात्र नभई नेपाली, मराठी, बङ्गालीलगायत विभिन्न भाषामा गरी १२ हजारभन्दा बढी गीत गाएकी छिन् । सन् २०११ मा गिनिज बुक अफ वर्ल्ड रेकर्ड्सले उनलाई इतिहासकै सबैभन्दा धेरै गीत रेकर्ड गर्ने कलाकारका रूपमा मान्यता दिएको थियो।

संगीतका क्रममा उनी पटक–पटक नेपाल आएकी थिइन्। नेपाली संगीतकार अम्बर गुरुङ, जयदेव तथा गायक नारायण गोपालसँगको सहकार्यलाई उनले सधैं गर्वका साथ स्मरण गर्ने गर्थिन्। नेपाली उच्चारणलाई स्वाभाविक रूपमा प्रस्तुत गर्न सक्ने उनको क्षमताका कारण धेरैले उनलाई ‘नेपाली नै हुन् कि’ भन्ने समेत ठान्थे।

उनको निधनप्रति भारतीय प्रधानमन्त्री नरेन्द्र मोदी, नेपालका विभिन्न राजनीतिक व्यक्तित्व तथा विश्वभरका कलाकारहरूले गहिरो दुःख व्यक्त गरेका छन्। उनको पार्थिव शरीरलाई अन्तिम श्रद्धाञ्जलीका लागि मुम्बईस्थित निवासमा राखिने र सोमबार राजकीय सम्मानका साथ अन्त्येष्टि गरिने बताइएको छ।

काठमाडौँ । राष्ट्रपति रामचन्द्र पौडेल र राष्ट्रियसभाका अध्यक्ष नारायणप्रसाद दाहालबीच भेटवार्ता भएको छ । आइतबार राष्ट्रपति भवन शीतल निवासमा भएको उक्त भेटघाटबारे राष्ट्रपतिको सचिवालयले जानकारी दिएको छ ।

भेटका क्रममा अध्यक्ष दाहालले टर्कीमा हुने अन्तर व्यवस्थापिका सङ्घको साधारण सभामा आफू सहभागी हुन जाने विषयमा राष्ट्रपति पौडेललाई जानकारी गराएको राष्ट्रपतिको स्वकीय सचिवालयले जनाएको छ ।