काठमाडौं । नेपालमा पछिल्लो समय लोकप्रिय बन्दै गएको विद्युतीय सवारी साधन (ईभी) को आयात चालू आर्थिक वर्षमा घटेको छ। आर्थिक वर्ष २०८२/८३ को पहिलो नौ महिनामा विद्युतीय कारको आयात अघिल्लो वर्षको सोही अवधिको तुलनामा झन्डै १० प्रतिशतले कमी आएको हो।

भन्सार विभागको तथ्याङ्क अनुसार गत वर्षको चैत मसान्तसम्म ७ हजार ९६७ युनिट विद्युतीय कार आयात भएकोमा यस वर्ष घटेर ७ हजार १७३ युनिटमा सीमित भएको छ। सो अवधिमा कुल १६ अर्ब ६६ करोड रुपैयाँ बराबरका विद्युतीय कार नेपाल भित्रिएका छन् भने यसबाट सरकारले १० अर्ब ११ करोड रुपैयाँ राजस्व संकलन गरेको छ।

आयातित गाडीहरूमध्ये ५१ देखि १०० किलोवाट क्षमताका गाडी सबैभन्दा धेरै, ४ हजार ८३ युनिट रहेका छन्। त्यस्तै ५० किलोवाटसम्मका २ हजार ५०६ युनिट, १०१ देखि २०० किलोवाटसम्मका ५ सय ७४ युनिट र २०१ किलोवाटभन्दा माथिका ८ युनिट गाडी आयात भएका छन्।

यता, विद्युतीय गाडीको आयात घट्दै जाँदा पेट्रोलबाट चल्ने कारको आयातमा भने उल्लेख्य वृद्धि भएको छ। नौ महिनाको अवधिमा ४ हजार १४० युनिट पेट्रोल कार आयात भएको छ, जुन गत वर्षको सोही अवधिको तुलनामा ५०.९९ प्रतिशतले बढी हो।

गत वर्ष चैतसम्म २ हजार ७४२ युनिट मात्रै पेट्रोल कार आयात भएको थियो। बजारमा इन्धनबाट चल्ने गाडीको माग बढेसँगै आयातमा यस्तो उछाल आएको देखिन्छ।

विद्युतीय गाडीको प्रयोग बढाउनुपर्ने अवस्थामा पेट्रोल कारको आयात बढ्नुले भविष्यमा इन्धन खपत र अर्थतन्त्रमा थप दबाब सिर्जना हुने चिन्ता बढाएको छ।

म्याग्दी । नेपाल विद्युत् प्राधिकरणको सहायक कम्पनी रघुगङ्गा हाइड्रोपावर प्रवर्द्धक रहेको ४० मेगावाट क्षमताको राहुघाट जलविद्युत् आयोजना निर्माणको ९५ प्रतिशत भौतिक प्रगति भएको छ। सुरुङ, बाँध र विद्युतगृहका संरचना निर्माणसँगै उपकरण जडान अन्तिम चरणमा पुगेपछि आयोजना परीक्षण उत्पादनको तयारीमा जुटेको छ।

आगामी जेठभित्र परीक्षण उत्पादन गर्ने लक्ष्य राख्दै निर्माण सम्पन्न संरचनाको परीक्षणको तयारी भइरहेको रघुगङ्गा हाइड्रोपावरका प्रबन्ध सञ्चालक गणेश केसीले जानकारी दिए। उनका अनुसार सिभिल, हाइड्रो तथा इलेक्ट्रोमेकानिकल संरचनाको निर्माण र उपकरण जडान सकिएर हाल फिनिसिङको काम भइरहेको छ। सुरुङका चारवटै प्रवेशमार्ग बन्द गरी पानी भरेर परीक्षण गर्ने तयारी भइरहेको उनले बताए।

रघुगङ्गा गाउँपालिका–४ दग्नाम र वडा नं. ५ झिँको फेदीमा बाँध, ६ किलोमिटर २७० मिटर लामो मुख्य सुरुङ तथा दुईवटा पानी थिग्र्याउने पोखरी निर्माण सम्पन्न भइसकेका छन्। तिल्केनीचौरस्थित विद्युतगृह निर्माण सकिएर रङरोगनको काम भइरहेको छ। २० मेगावाट क्षमताको एक युनिट जडान भइसकेको छ भने अर्को युनिटको जडान अन्तिम चरणमा पुगेको छ।

विद्युतगृह परिसरमा उत्पादन हुने विद्युत् केन्द्रीय प्रसारण लाइनमा जोड्न स्वीचयार्ड निर्माण भइसकेको छ। राहुघाटबाट उत्पादन हुने विद्युत् कालीगण्डकी करिडोरअन्तर्गत २२० केभी क्षमताको दाना–कुश्मा प्रसारण लाइनमार्फत राष्ट्रिय प्रसारण प्रणालीमा जोडिनेछ।

आयोजनाको निर्माणमा कोरोना महामारी, बाढी–पहिरोलगायत प्राकृतिक विपद् तथा नदीजन्य निर्माण सामग्री अभावका कारण ढिलाइ भएको निर्माण पक्षले जनाएको छ। भारतीय आयात–निर्यात (एक्जिम) बैंकको सहुलियतपूर्ण ऋण तथा नेपाल विद्युत् प्राधिकरण र नेपाल सरकारको संयुक्त लगानीमा आयोजना सञ्चालन भइरहेको हो।

यस आयोजनाले वार्षिक करिब २४ करोड ५ लाख युनिट विद्युत् उत्पादन गर्ने लक्ष्य राखेको छ।

काठमाडौँ । नेपाल राष्ट्र बैंकले आज (मंगलबार) का लागि विदेशी मुद्राको विनिमय दर निर्धारण गरेको छ। जसअनुसार अमेरिकी डलर एकको खरिददर १४८ रुपैयाँ ७१ पैसा र बिक्रीदर १४९ रुपैयाँ ३१ पैसा तोकिएको छ।

अष्ट्रेलियन डलर एकको खरिददर १०६ रुपैयाँ ४५ पैसा र बिक्रीदर १०६ रुपैयाँ ८८ पैसा कायम गरिएको छ भने क्यानेडियन डलर एकको खरिददर १०८ रुपैयाँ ६५ पैसा र बिक्रीदर १०९ रुपैयाँ ९ पैसा निर्धारण गरिएको छ।

त्यस्तै, युरोपियन युरो एकको खरिददर १७५ रुपैयाँ ८ पैसा र बिक्रीदर १७५ रुपैयाँ ७८ पैसा रहेको छ। युके पाउन्ड स्टर्लिङ एकको खरिददर २०१ रुपैयाँ ८ पैसा र बिक्रीदर २०१ रुपैयाँ ८९ पैसा तोकिएको छ।

नेपाल राष्ट्र बैंकले आवश्यकता अनुसार विनिमय दर जुनसुकै समयमा पनि संशोधन गर्न सकिने जनाएको छ। साथै, वाणिज्य बैंकहरूले तोक्ने दर फरक हुन सक्ने र अद्यावधिक जानकारी केन्द्रीय बैंकको आधिकारिक वेबसाइटमा उपलब्ध हुने जनाइएको छ।

काठमाडौँ । हाल नेपालमा पश्चिमी तथा स्थानीय वायुको आंशिक प्रभाव रहेको मौसम पूर्वानुमान महाशाखाले जनाएको छ। यसको प्रभावले देशको हिमाली भूभागमा सामान्यतया बादल लागेको छ भने कोशी, बागमती र गण्डकी प्रदेशका पहाडी भूभागमा आंशिक बदली देखिएको छ। बाँकी क्षेत्रमा मौसम मुख्यतया सफा रहेको छ।

आज दिउँसो हिमाली भूभागमा सामान्य बदली रहनेछ। कोशी प्रदेशका पहाडी तथा तराई क्षेत्रसहित अन्य पहाडी भूभागमा आंशिक बदली रहने सम्भावना छ भने बाँकी तराई क्षेत्रमा मौसम प्रायः सफा रहनेछ।

हिमाली क्षेत्रका एक–दुई स्थानमा चट्याङसहित मध्यम वर्षा तथा हिमपातको सम्भावना रहेको छ।

यसैबीच, मधेस प्रदेशसहित बागमती, गण्डकी, लुम्बिनी र सुदूरपश्चिम प्रदेशका तराई, उपत्यका तथा खोँच क्षेत्रमा तातो दिन हुने सम्भावना रहेको छ। लुम्बिनी र सुदूरपश्चिमका तराई क्षेत्रमा तातो लहर (हीटवेभ) को सम्भावना पनि देखिएको छ।

आज राति हिमाली भूभागमा आंशिक बदली रहनेछ भने पहाडी र तराई क्षेत्रमा मौसम मुख्यतया सफा रहनेछ। कोशी र गण्डकी प्रदेशका हिमाली क्षेत्रका एक–दुई स्थानमा हल्का वर्षा तथा हिमपात हुन सक्ने महाशाखाले जनाएको छ।

इस्लामावाद — पाकिस्तानको राजधानी इस्लामावादस्थित नुर खान एयरबेसमा सोमबार अमेरिकी सैन्य विमानहरूको असामान्य चहलपहल देखिएको छ। एकै दिन ६ वटा अमेरिकी सैन्य विमानहरू अवतरण भएसँगै यसलाई कुनै उच्चस्तरीय अमेरिकी कूटनीतिक भ्रमणको पूर्वतयारीको रूपमा हेरिएको छ।

विमानहरूको गतिविधि र उद्देश्य उडान ट्र्याकिङ डेटाका अनुसार, अमेरिकी वायुसेनाका ठूला ‘सी-१७’ विमानहरूले विभिन्न समयमा नुर खान एयरबेसमा अवतरण गरेका हुन्। स्रोतका अनुसार, यी विमानहरूले सम्भावित उच्चस्तरीय भ्रमणका लागि आवश्यक सुरक्षा उपकरण, सञ्चार सामग्री र प्राविधिक सहयोगका सामानहरू ओसारेका छन्। अमेरिका र इरानबीच हुन गइरहेको वार्ताको दोस्रो चरणको चर्चा चलिरहेका बेला अमेरिकी सैन्य विमानहरूको यो बाक्लो उपस्थितिलाई कूटनीतिक वृत्तमा निकै अर्थपूर्ण मानिएको छ।

सुरक्षा व्यवस्थामा कडाइ अमेरिकी टोलीको भ्रमणको चर्चासँगै इस्लामावाद र रावलपिन्डीको सुरक्षा व्यवस्था अत्यन्तै कडा पारिएको छ। पाकिस्तानी प्रशासनले राजधानीको ‘रेड जोन’ क्षेत्रलाई पूर्ण रूपमा सिल गरेको छ भने सर्वसाधारणको आवागमन र सवारी साधनको परिचालनमा पनि कडाइ गरिएको छ। रावलपिन्डी प्रहरीले सुरक्षा संवेदनशीलतालाई मध्यनजर गर्दै ‘हाई अलर्ट’ जारी गरेको छ।

कूटनीतिक महत्त्व यस घटनाक्रमलाई अमेरिका र इरानबीचको तनाव न्यूनीकरणका लागि हुन लागेको कूटनीतिक संवादसँग जोडेर हेरिएको छ। अमेरिकी उपराष्ट्रपति वा अन्य शीर्ष अधिकारीहरूको भ्रमण हुन सक्ने चर्चाका बीच दुवै मुलुकका प्रतिनिधिहरूले पाकिस्तानमा आफ्नो उपस्थितिलाई बाक्लो बनाउँदै लगेका छन्। यद्यपि, अमेरिका वा पाकिस्तान सरकारले अहिलेसम्म भ्रमणको औपचारिक पुष्टि भने गरिसकेका छैनन्। विदेशी पाहुनाहरूको सुरक्षाका लागि अपनाइएको यो विशेष सतर्कताले क्षेत्रीय कूटनीतिमा पाकिस्तानको बढ्दो भूमिकालाई समेत संकेत गरेको छ।

काठमाडौँ — राष्ट्रिय स्वतन्त्र पार्टी (रास्वपा) ले आफ्ना सांसद र मन्त्रीहरूले पार्टीलाई बुझाउने ‘लेबी’ (शुल्क) को दर परिमार्जन गरेको छ। आइतबार बसेको सचिवालय बैठकले गरेको लेबी परिमार्जनसम्बन्धी निर्णयलाई सोमबार बसेको केन्द्रीय समिति बैठकले औपचारिक रूपमा अनुमोदन गरेको हो।

पार्टी प्रवक्ता मनिष झाका अनुसार, पार्टीको लेबी व्यवस्थापनलाई थप व्यवस्थित बनाउँदै नयाँ दररेट कायम गरिएको छ। यसअनुसार नयाँ शुल्क संरचना निम्नअनुसार छ:

• सांसदहरू: यसअघि मासिक १६ हजार ५०० रुपैयाँ रहेको लेबी दरलाई घटाएर अब १५ हजार रुपैयाँ कायम गरिएको छ।

• मन्त्रीहरू: मन्त्रीहरूको लेबी मासिक १८ हजार रुपैयाँ तोकिएको छ।

• स्वकीय सचिव: मन्त्रीहरूका स्वकीय सचिवका लागि भने मासिक २ हजार रुपैयाँ लेबी निर्धारण गरिएको छ।

पार्टीको आर्थिक व्यवस्थापनलाई चुस्त बनाउने उद्देश्यले यो परिमार्जन गरिएको रास्वपाले जनाएको छ।

काठमाडौँ — प्रधानमन्त्री बालेन्द्र शाहले विश्वविद्यालय र स्वास्थ्य शैक्षिक संस्थाहरूमा रहेका दलीय विद्यार्थी तथा कर्मचारी संगठनका संरचनाहरू तत्काल खारेज गर्न विश्वविद्यालयका उपकुलपतिहरूलाई कडा निर्देशन दिएका छन्।

प्रधानमन्त्री तथा मन्त्रिपरिषद्को कार्यालयमा आज देशभरका विश्वविद्यालय र प्रतिष्ठानका उपकुलपतिहरूसँग भएको साढे तीन घण्टा लामो छलफलमा प्रधानमन्त्री शाहले यस्तो निर्देशन दिएका हुन्। उनले शैक्षिक संस्थाहरूमा कुनै पनि बहानामा दलगत राजनीति गर्न नहुने अडान दोहोर्‍याएका छन्।

‘पवित्र थलोमा राजनीतिक प्रभाव हुनुहुँदैन’ प्रधानमन्त्री शाहले अस्पताल, क्याम्पस र विद्यालयहरू पवित्र शैक्षिक र सेवामूलक थलो भएको बताउँदै त्यहाँ कुनै पनि दलको झण्डा, प्रभाव वा संगठन राख्न नदिने स्पष्ट पारेका छन्। उनले भने, “राजनीति नै गर्ने हो भने पेसागत जिम्मेवारीबाट अलग भएर पूर्ण रूपमा राजनीतिमा लाग्नुहोस्, तर शैक्षिक संस्थालाई थलो बनाएर राजनीति गर्ने कार्य अब स्वीकार्य हुँदैन।” उनले दलीय संरचना हटाउन कुनै पनि ऐन बाधक नहुने जिकिर गर्दै तत्काल कार्यान्वयनमा लाग्न उपकुलपतिहरूलाई आग्रह गरे।

सुरक्षाको जिम्मा सरकारको छलफलका क्रममा नेपाल संस्कृत विश्वविद्यालयका उपकुलपति प्रा. डा. धनेश्वर नेपालले विद्यार्थी संगठनहरू हटाउन खोज्दा उल्टै धम्की र आक्रमणको सामना गर्नुपरेको गुनासो गरेका थिए।

यसको जवाफमा प्रधानमन्त्री शाहले सुरक्षा व्यवस्थाको पूर्ण जिम्मा सरकारले लिने स्पष्ट पारेका छन्। “संगठन हटाउँदा सुरक्षाको कुनै समस्या आएमा तुरुन्त सम्बन्धित मन्त्रालय वा मेरो सचिवालयमा खबर गर्नुस्,” प्रधानमन्त्रीले भने, “सुरक्षा संयन्त्रलगायत आवश्यक पर्ने सबै सहयोग सरकार उपलब्ध गराउँछ। प्रहरी प्रशासन आफ्नो कर्तव्य पालनामा प्रतिबद्ध छ, त्यसैले ढुक्क भएर जिम्मेवारी पूरा गर्नुहोस्।”

अन्य निर्देशन र अवस्था प्रधानमन्त्री शाहले शैक्षिक क्यालेन्डरको कडाइका साथ पालना गर्न र परीक्षाको नतिजा एक महिनाभित्रै प्रकाशन गर्नसमेत निर्देश गरेका छन्। छलफलमा शिक्षा, विज्ञान तथा प्रविधिमन्त्री सस्मित पोखरेलले पनि दलीय संगठन खारेज गर्ने सन्दर्भमा ऐनले कुनै अवरोध नगर्ने र मन्त्रालयले यसअघि नै निर्देशन दिइसकेको बताए।

छलफलमा सहभागी उपकुलपतिहरूले आआफ्नो संस्थाको वस्तुस्थितिबारे जानकारी गराएका थिए। त्रिभुवन विश्वविद्यालयका उपकुलपति प्रा. डा. दीपक अर्यालले ‘जेन्जी’ आन्दोलन र निर्वाचनपछि विद्यार्थी तथा कर्मचारी संगठनहरू क्रमशः निष्क्रिय बन्दै गएको जानकारी दिए।

यता, मध्यपश्चिम विश्वविद्यालयका उपकुलपति प्रा. डा. ध्रुवकुमार गौतम, पूर्वाञ्चल विश्वविद्यालयका उपकुलपति प्रा. डा. विजुकुमार थपलिया र सुदूरपश्चिम विश्वविद्यालयका उपकुलपति प्रा. डा. हेमराज पन्तले केही आंगिक क्याम्पसहरूमा अझै पनि विद्यार्थी राजनीतिको तनाव कायमै रहेको बताए। अन्य विश्वविद्यालयका उपकुलपतिहरूले भने प्रशासनले कडा नीति लिएमा शैक्षिक क्षेत्रमा राजनीति अन्त्य गर्न सकिने विश्वास व्यक्त गरे।

काठमाडौं । नेपाल वायु सेवा निगमले निकट भविष्यमै काठमाडौं–ढाका सिधा उडान सुरु गर्ने तयारी थालेको छ। निगमले यसका लागि सम्भाव्यता अध्ययन गर्न उपसमिति गठन गरी आवश्यक प्रक्रिया अघि बढाएको जनाएको छ।

निगमका अपरेसन विभाग निर्देशक एवं वरिष्ठ क्याप्टेन सुवास रिजालका अनुसार छिमेकी देश बंगलादेशको राजधानी ढाकामा राष्ट्रिय ध्वजावाहकबाट हालसम्म उडान हुन नसकेको अवस्थामा अब त्यसलाई प्राथमिकतामा राखेर काम भइरहेको छ।

हाल बंगलादेशबाट काठमाडौंमा नियमित उडान भइरहेको छ भने नेपालको निजी क्षेत्रको हिमालयन एयरलाइन्सले पनि ढाकामा उडान गर्दै आएको छ। तर, नेपाल वायु सेवा निगमको सिधा उडान भने सुरु हुन सकेको छैन। अध्ययन समितिको प्रतिवेदनका आधारमा उडानको अन्तिम निर्णय गरिने जनाइएको छ।

यसैबीच, निगमले काठमाडौं–दिल्ली–काठमाडौं रुटमा उडान संख्या विस्तार गरेको छ। गत चैत १७ गतेदेखि सातामा थप तीन उडान थपिएसँगै अब उक्त रुटमा साप्ताहिक १० उडान सञ्चालनमा आएका छन्।

कार्गो सेवातर्फ पनि सुधार गर्न निगमले कार्गो म्यानेजमेन्ट सिस्टम अध्ययनका लागि टास्कफोर्स गठन गरेको जनाएको छ।

काठमाडौँ । अमेरिकी राष्ट्रपति डोनाल्ड ट्रम्पले इरानसँग दोस्रो चरणको वार्ताका लागि आफ्नो प्रतिनिधिमण्डल सोमबार बेलुकीसम्म इस्लामावाद पुग्ने घोषणा गरेका छन्।

आइतबार सामाजिक सञ्जालमार्फत ट्रम्पले आफ्नो टोली वार्ताका लागि इस्लामावादतर्फ प्रस्थान गरिसकेको र सोमबार साँझसम्म त्यहाँ पुग्ने बताएका हुन्। उनले यसपटक इरानलाई ‘उचित र निष्पक्ष’ प्रस्ताव दिइने उल्लेख गर्दै उक्त प्रस्ताव स्वीकार हुने विश्वास व्यक्त गरेका छन्।

यद्यपि प्रस्ताव अस्वीकार भएमा इरानका ऊर्जा संरचना र पुलहरू ध्वस्त पार्ने चेतावनी पनि ट्रम्पले दिएका छन्। उनले हर्मुज क्षेत्रमा जहाजमाथि गोलाबारी गरेर इरानले युद्धविराम उल्लङ्घन गरेको आरोपसमेत लगाएका छन्।

हर्मुज जलडमरु पुनः बन्द गर्ने इरानको घोषणालाई ‘हास्यास्पद’ भन्दै ट्रम्पले त्यसबाट इरानलाई नै ठूलो आर्थिक नोक्सानी भइरहेको दाबी गरेका छन्। उनका अनुसार दैनिक करिब ५० करोड डलर बराबरको क्षति इरानले बेहोर्नुपरेको छ।

अमेरिकी सञ्चारमाध्यमका अनुसार यसअघि पहिलो चरणको वार्तामा सहभागी भएको टोलीलाई नै पुनः इस्लामावाद पठाउने तयारी गरिएको छ। पहिलो वार्तामा अमेरिकी उपराष्ट्रपति जेडी भान्स, मध्यपूर्व दूत स्टिभ विटकोफ तथा ट्रम्पका ज्वाइँ ज्यारेड कुश्नर सहभागी भएका थिए।

तर, अमेरिकी पक्षको घोषणापछि पनि इरान र पाकिस्तानले भने वार्ताबारे औपचारिक पुष्टि गरेका छैनन्। ट्रम्पको भनाइ सार्वजनिक भएपछि पाकिस्तानी प्रधानमन्त्री शहबाज शरीफले इरानी राष्ट्रपति मसुद पेजेस्कियनसँग टेलिफोन संवाद गरेका थिए भने दुवै देशका परराष्ट्रमन्त्रीबीच पनि छलफल भएको जनाइएको छ।

यद्यपि इरानी पक्षबाट वार्तामा सहभागी हुने स्पष्ट प्रतिबद्धता भने अहिलेसम्म सार्वजनिक भएको छैन।

काठमाडौँ । अमेरिका र इरानबीच बढ्दो तनावका कारण विश्वकै प्रमुख तेल आपूर्ति मार्ग स्ट्रेट अफ हर्मुज पुनः बन्द भएपछि सोमबार कच्चा तेलको मूल्यमा ६ प्रतिशतभन्दा बढी वृद्धि भएको छ। अघिल्लो शुक्रबार झण्डै ९ प्रतिशतले घटेको मूल्य युद्धविराम उल्लङ्घन र आक्रमणका खबरसँगै फेरि उकालो लागेको हो।

अन्तर्राष्ट्रिय बजारमा ब्रेन्ट क्रुडको मूल्य प्रतिब्यारेल ६.११ डलर (६.७६%) ले बढेर ९६.४९ डलर पुगेको छ। यस्तै, अमेरिकी वेस्ट टेक्सास इन्टरमिडिएट (WTI) पनि ६.५३ डलर (७.७९%) ले वृद्धि भई प्रतिब्यारेल ९०.३८ डलर पुगेको छ।

दुवै देशले एकअर्कामाथि युद्धविराम सम्झौता तोडेको र जहाजहरूमाथि आक्रमण गरेको आरोप लगाएका छन्, जसका कारण ऊर्जा बजारमा अनिश्चितता बढेको छ।

अमेरिकी राष्ट्रपति डोनाल्ड ट्रम्पले आइतबार इरानको एक मालवाहक जहाजलाई आफ्नो नौसेनाले नियन्त्रणमा लिएको बताएका थिए। त्यसको प्रतिउत्तरमा इरानले अमेरिकी नाकाबन्दी कायम रहुञ्जेल शान्ति वार्तामा सहभागी नहुने अडान लिएको छ।

विश्वको कुल तेल आपूर्तिको करिब २० प्रतिशत हिस्सा ओगट्ने यो जलमार्ग बन्द हुँदा विश्व अर्थतन्त्रमा गम्भीर असर पर्ने देखिएको छ। केही समयअघि मात्र खुला गरिएको मार्ग पुनः बन्द गरिएपछि तेल ढुवानीकर्ताहरू थप सतर्क बनेका छन्।

बजार विश्लेषकहरूका अनुसार अहिले तेल बजार भौतिक अवस्थाभन्दा पनि दुवै देशका नेताहरूका अभिव्यक्तिका आधारमा तीव्र रूपमा उतारचढाव भइरहेको छ। सुरक्षित आवागमनको सुनिश्चितता नभएसम्म जहाज सञ्चालकहरू यो क्षेत्रमा प्रवेश गर्न हच्किने देखिन्छ।

अमेरिकाबाट थप सैन्य कारबाहीको चेतावनी र इरानबाट अवरोध कायमै राख्ने संकेतका बीच आगामी दिनमा इन्धनको मूल्य अझै बढ्न सक्ने अनुमान गरिएको छ।