काठमाडाैं । प्रधानमन्त्री केपी शर्मा ओलीले सरकारको प्रमुख कर्तव्य नागरिकको जीवन रक्षा गर्नुभएको बताउनुभएको छ । सिंहदरबारस्थित प्रधानमन्त्री तथा मन्त्रिपरिषद्को कार्यालयमा आज आयोजित विशेष समारोहमा प्रधानमन्त्री ओलीले देश तथा विदेशमा रहनुभएका सम्पूर्ण नेपालीहरूको सुख, शान्ति र समृद्धिको कामना गर्दै कोभिड–१९ को महामारीबाट सबैलाई सुरक्षित रहन आग्रह गर्नुभयो ।

“नागरिकको जीवन रक्षा गर्नु सरकारको पहिलो कर्तव्य हो, सरकारका लागि जनताको जीवन पहिलो हो”, प्रधानमन्त्री ओली भन्नुभयो, “जनताको जीवन बचाउन सकियो भने शिक्षालयहरू चल्ने छन्, अर्थतन्त्रभन्दा पनि जीवन पहिलो हो, उद्योग कलकारखाना चल्ने छन् तर नागरिकको जीवन रहेन भने कुनै पनि कुरा चल्न सक्दैन ।” उहाँले नागरिकहरू सुरक्षित रहेमा बाँकी विषय हुँदै जाने बताउनुभयो ।

प्रधानमन्त्री ओलीले नागरिक सुरक्षालाई प्राथमिक महत्वमा राखरे काम गरिरहेको र महामारीका कारण तुलनात्मक रूपमा असर परे पनि कम क्षति भएको बताउनुभयो । महामारीका बीचमा पनि कृषिलाई राम्रो र व्यापार घाटाको अन्तर कम गर्न सरकार सफल भएको उल्लेख गर्नुभयो ।

“हिंसाको बाटोमा हिँडेकालाई शान्तिपूर्ण धारमा ल्याउने काम गरियो, अब हिंसा गर्ने कुनै समूह छैन”, प्रधानमन्त्री ओलीले भन्नुभयो, “अब जनतामा सार्वभौमसत्ता छ, जनता र जनताको मन र अभिमत छ, त्यो नै राजनीतिको निर्धारक तत्व हो, यस अवधिमा ठूला सफलताहरू प्राप्त गरेका छौँ ।” विसं २०७७ मा देशका विभिन्न स्थानमा ठूला क्षमताका सभागृहहरू निर्माण गरिएको उल्लेख गर्दै प्रधानमन्त्री ओलीका अनुसार गतवर्ष लुम्बिनीमा पाँच हजार क्षमताको ध्यानकेन्द्र, गोदावरीमा तीन हजार क्षमताको सभाहल सम्पन्न भएको छ भने अन्य थुप्रै ठाउँमा सभागृहहरू निर्माण भइरहेको जानकारी दिनुभयो ।

काठमाडाैं । कर्णाली प्रदेशका मुख्यमन्त्री महेन्द्रबहादुर शाहीले राजनीतिक स्थायित्व र आर्थिक समृद्धि मुलुकको पहिलो आवश्यकता भएको बताउनुभएको छ । नववर्ष २०७८ को अवसरमा शुभकामना सन्देश जारी गर्दै मुख्यमन्त्री शाहीले स्वदेश तथा विदेशमा रहेका कर्णाली तथा समस्त नेपाली आमाबुबा, दाजुभाइ, दिदीबहिनीमा सुख, शान्ति, सुस्वास्थ्य, उत्तरोत्तर प्रगति एवं समृद्धिको कामना गर्नुभएको छ । साथै कर्णालीको तीव्र विकास र आर्थिक समृद्धि हासिल गर्नु प्रदेश सरकारको मुख्यचासो रहेको उहाँले बताउनुभएको छ ।

आज मुख्यमन्त्री शाहीद्वारा हस्ताक्षरित शुभकामना सन्देशमा भनिएको छ, “नेपाली जनताको सङ्घर्ष र बलिदानबाट प्राप्त सङ्घीय लोकतान्त्रिक गणतन्त्रको स्थापना भएसँगै हामी सबै नेपालको विकास र समृद्धिको महाअभियानमा छौँ । विकास र समृद्धिको यो महाअभियान पूरा गर्न सम्पूर्ण शक्तिका साथ प्रदेश सरकार लागी परेको छ । कर्णाली सरकारले भौतिक पूर्वाधार विकासलाई प्राथमिकतामा राखेर सरकार गठन भएपश्चात् हालसम्म एक हजार २५० किमी सडकको नयाँ ट्र्याक निर्माण, १६७ किमी सडक ग्राभेल, २८ किमी कालोपत्रे गरेको छ ।”

त्यस्तै प्रदेश राजधानी सुर्खेतमा चक्रपथ निर्माण र सुर्खेत उपत्यका खानेपानी योजनाको विस्तृत सम्भाव्यता अध्ययन, सुर्खेत विमानस्थलको स्तरोन्नति, कर्णाली प्रदेश विद्युतीकरणका लागि नेपाल सरकारसँगको समन्वयमा आवश्यक बजेट व्यवस्था गरी राष्ट्रिय प्रसारण लाइन सबै जिल्ला सदरमुकामका साथै ग्रामीण क्षेत्रसम्म विस्तारको कार्य अघि बढाइएको र प्रसारण लाइन पहुँचविहीन क्षेत्रमा सौर्य विद्युत् प्रणालीको विकास गरी विद्युतीकरणको प्रयास थालनी गरिएको उहाँले बताउनुभएको छ ।

काठमाडाैं । नेपाल क्रिकेट सङ्घ (क्यान) ले त्रिकोणात्मक टी–ट्वान्टी क्रिकेट सिरिजका लागि ज्ञानेन्द्र मल्लको कप्तानीमा १४ सदस्यीय नेपाली राष्ट्रिय टोलीको घोषणा गरेको छ । बन्द प्रशिक्षणमा रहेका २० खेलाडीबाट क्यानले १४ सदस्यीय नेपाली टोलीको घोषणा गरेको क्यानका महासचिव अशोकनाथ प्याकुरेलले जानकारी दिनुभयो ।

छनोट टोलीमा कप्तान मल्लसहित उपकप्तान दीपेन्द्र सिंह ऐरी, पारस खड्का, विनोद भण्डारी, सोमपाल कामी, करण केसी र सन्दीप लामिछाने छन् । त्यसैगरी अविनाश बोहरा, आरिफ शेख, आशिफ शेख, कुशल भुर्तेल, कुशल मल्ल, कमलसिंह ऐरी, सुशन भारी र शाहब आलम छनोट भएका छन् ।

नेपालले घरेलु मैदानमा नेदरल्यान्ड्स र मलेशियासँग त्रिकोणात्मक टी–ट्वान्टी सिरिज खेल्नेछ । सिरिज कीर्तिपुरस्थित त्रिवि क्रिकेट मैदानमा यही वैशाख ४ देखि ११ गतेसम्म हुनेछ । डबल राउण्ड रोबिनको आधारमा हुने सिरिजको शीर्ष दुई टोलीले उपाधिका लागि भिड्ने छन् ।

नगरस्तरीय राष्ट्रपति रनिङ शिल्ड भोलिदेखि

कागेश्वरी मनोहरा नगर खेलकुद विकास समितिको आयोजनामा कागेश्वरी मनोहरा नगरपालिकास्तरीय राष्ट्रपति रनिङ शिल्ड खेलकुद प्रतियोगिता भोलिदेखि हुने भएको छ । प्रतियोगितामा तेक्वान्दो र एथलेटिक्समा प्रतिस्पर्धा हुने प्रतियोगिता संयोजक एवं तेक्वान्दोका अन्तर्राष्ट्रिय निर्णायक अशोक खड्काले जानकारी दिनुभयो ।

तेक्वान्दो भोलि बिहीबार डाँछीस्थित नेप्लिज तेक्वान्दो एकेडेमी ९एनटीए० को हलमा खेलाइने छ । छात्र÷छात्रामा तीन÷तीन गरी छ स्पर्धामा प्रतिस्पर्धा हुनेछ । छात्रमा ४५ केजी, ४८ केजी र ५१ केजी तौल समूहमा खेल हुनेछ । त्यस्तै छात्रामा ४२ केजी, ४४ केजी र ४६ केजीमा भिडन्त हुनेछ । विभिन्न २० विद्यालयका १२० खेलाडीको सहभागिता रहने छ ।

त्यसैगरी एथलेटिक्स शुक्रबार मूलपानीमा हुनेछ । छात्र÷छात्रा गरी १२ स्पर्धामा प्रतिस्पर्धा हुनेछ । छात्र÷छात्रा दुवैमा एक सय, दुई सय, चार सय, आठ सय र एक हजार पाँच सय मिटर दौड तथा चार गुणा १०० मिटर रिलेमा प्रतिस्पर्धा हुनेछ । उक्त स्पर्धामा विभिन्न २० विद्यालयका १५० खेलाडीको सहभागिता रहने छ ।

तेक्वान्दो र एथलेटिक्सको हरेक स्पर्धामा शीर्ष तीन स्थान हात पार्नेले क्रमशः रु दुई हजार, रु एक हजार र रु ५०० पुरस्कार प्राप्त गर्नेछन् । सो प्रतियोगिता काठमाडौँ जिल्लास्तरीय राष्ट्रपति रनिङ शिल्डको छनोटका रुपमा समेत रहेको छ । स्पर्धामा शीर्ष स्थान हात पार्ने खेलाडी जिल्लास्तरीय प्रतियोगितालाई छनोट हुनेछन् ।

पछिल्लो २४ घण्टामा देशभर ५०० बढी कोरोना संक्रमित थपिएका छन् । स्वास्थ्य तथा जनसंख्या मन्त्रालयका अनुसार थप ५१७ जनामा कोरोना संक्रमण पुष्टि भएको हो । यस्तै २४ घण्टामा रिपोर्ट प्राप्त भएका मृतकको संख्या ५ जना रहेको पनि मन्त्रालयले जनाएको छ ।

यसअघि सोमबार देशभर ५५९ जनामा कोरोना संक्रमण पुष्टि भएको थियो भने १३ जनाको मृत्यु भएको थियो ।

मन्त्रालयका अनुसार हालसम्म कोरोना संक्रमितको कुल संख्या २ लाख ८० हजार  ९८४ पुगेको छ । जसमध्ये निको हुनेको संख्या २ लाख ७४ हजार ३१८ पुगेको छ ।
यस्तै हालसम्म मृतकको कुल संख्या ३ हजार ५८ पुगेको छ भने आइसोलेशनमा रहनेको संख्या ३ हजार ६०८ पुगेको छ । यसैबीच पछिल्लो २४ घण्टामा काठमाडौंमा सबैभन्दा बढी कोरोना संक्रमित पुष्टि भएका छन् । स्वास्थ्य मन्त्रालयका अनुसार काठमाडौंमा १६१ जनामा संक्रमण पुष्टि भएको छ भने ललितपुरमा २६ र भक्तपुरमा १२ जनामा संक्रमण पुष्टि भएको छ ।

रातोपातीबाट साभार

पश्चिम बंगालको चुनाव सधैं नयाँ लहर र उत्साह लिएर आउँछ । अहिले यहाँ,२ सय ९४ सिटका लागि आठ चरणमा निर्वाचन भइरहेको छ । २७ मार्च,१ अप्रिल,६ अप्रिल र १० अप्रिलमा गरी चार चरणमा अहिलेसम्म १ सय ३५ सिटमा मतदान भइसकेको छ । बाँकी १ सय ५९ सिटमा १७ अप्रिल,२२ अप्रिल,२६ अप्रिल र २९ अप्रिलमा मतदान हुनेछ ।

चुनावमा व्यस्त कोलकातामा यसपटक केसर (भाजपाको झन्डाको रंग) पनि बिस्तारै टल्कँदै छ । पहिले पुरै शहरमा ममता बेनर्जी ‘दिदी’का ठूला–ठूला होर्डिङ र पोस्टर थिए । अहिले प्रधानमन्त्री नरेन्द्र मोदीले हात जोडेका केही होर्डिङ र भाजपाको चुनाव चिन्ह कमल पनि देखिन्छ । तृणमुलको फूल चुनाव चिन्हबीच मोदीको कमल फक्रनु पनि एक ठूलो परिवर्तन हो । नत्र त,पुरै दिदीमय बनेको कोलकाताको नगर निगममा  भाजपाको होर्डिङ वा झण्डा गाड्ने कसको हिम्मत ?

भाजपाको चाणक्य नीति

बंगाल भाजपाका पूर्व अध्यक्ष र हाबन्डाबाट भाजपाका उम्मेदवार रहेका राहुल सिन्हा टिएसमीका लागि यसपटक बाटो सहज नरहेको बताउँछन् । भाजपाले आफ्नो रणनीति चाणक्यको जसरी तयार गरेको छ । भाजपाले लामो समयदेखि बंगालमा सक्रियता देखाइरहेको थियो । ममता बेनर्जीका दायाँ हात मानिने मुकुल रायलाई भाजपामा ल्याउनु अमित शाहको एउटा ठूलो सफलता हो । बंगालको राजनीतिलाई राम्रोसँग बुझ्नेहरु मुकुल रायलाई तृणमूल कांग्रेसको ‘यशोदा’मान्छन् । भलै,बेनर्जीले यसलाई जन्म दिइन् यशोदा मैय्याले जसरी हुर्काउने काम मुकुलले गरेका हुन् ।

जमिनमा ठूलो संख्याका कार्यकर्ता नभएपनि दिनेश त्रिवेदीको छविपनि बंगालको भद्रलोकमा राम्रो छ,उनी पनि बेनर्जीलाई छाडेर भाजपामा आइसकेका छन् ।

भलै,सौरभ गाङ्गुलीलाई भाजपा ल्याउने नेताहरुको प्रयास सफल हुन सकेन । यद्यपि,भारतीय क्रिकेट बोर्डको अध्यक्ष नियुक्त गरेर भाजपाले उनलाई नरम बनाउने चाल चलेको छ ।

यद्यपी,पश्चिम बंगालमा भाजपाको टिकट वितरण विवादरहित बन्न सकेन । पुराना कार्यकर्ताहरु अहिलेको भाजपाले अटल बिहारी बाजपेयी र लालकृष्ण आडवाणीको आर्दश नबोक्ने बताउँछन् ।

 ‘यो अर्कै भाजपना हो,’उनीहरु भन्छन् । टिकट वितरणमा पुराना स्थानीय नेताहरु मारमा परेका छन् । टिकट उसैलाई दिइएको छ,जसले तृणमुल कांग्रेसका उम्मेदवारलाई कडा चुनौती दिनसक्ने अनुमान छ । विगत १० वर्षदेखि तृणमुल कांग्रेस सत्तामा छ र बांग्ला फिल्मका कलाकार तथा टेलिभिजन सेलेब्रिटीहरु ममता दिदी निकट छन् ।

भाजपाले यसलाई काउन्टर दिनका लागि बांग्ला भाषाकै अनेक सेलिब्रेटीहरुलाई पार्टीमा समावेश गराएर टिकट दिएको छ । बुद्धिजीविहरु उठेका ठाउँमा बुद्धिजीवी र शक्तिशालीहरु उठेका ठाउँमा शक्तिशालीहरुलाई नै चुनावमा उठाएको छ । त्यसकारण आफ्नो इलाकामा निकै खराब छवि भएकाहरु पनि यसपटक भाजपाबाट उम्मेदवार बनेका छन् । त्रिणमुल कांग्रेस पनि कम छैन,२४ परगनाको कुलतोली सिटमा तृणमुलले निकै शक्तिशाली मानिएका गणेश मन्डललाई टिक दिएको छ,उनी तृणमुल युवा कांग्रेसका अध्यक्ष हुन् । यी व्यक्तिमाथि बलात्कार,हत्या,धम्कीलगायत मुद्दा लागेको छ ।

कमजोर वामपन्थी र कांग्रेस

निकै छोटो समयमै भाजपा बंगालमा एक ठूलो शक्ति बनेर उदाएको हो । अहिले तृणमुल कांग्रेसलाई चुनौती दिने ऊमात्रै छ । भारतको सबैभन्दा पुरानो पार्टी कांग्रेस आईको केन्द्रीय नेतृत्वलाई बंगालको चुनावमा खासै चासो लागेको देखिन्न । कांग्रेसका उम्मेदवार यहाँ बेहाल र हैरान छन् । कोही पनि ठूलो नेता चुनाव प्रचारका लागि बंगाल आएनन् भन्ने उनीहरुको गु्नासो छ ।

राहुल गान्धीले आफूलाई केवल केरलासम्मकै सिमित गरेका छन् । पार्टीलाई आर्थिक सहयोग पनि कसैले गरेको छैन । कम्तिमा,कोलकाता शहरमा कांग्रेसको चुनाव प्रचार छैन भनेपनि हुन्छ । उता,झन्डै चार दशकसम्म बंगालमा राज गर्ने कम्युनिष्ट पार्टी अफ इन्डिया (सिपिएम) पनि कमजोर देखिएको छ । यो पार्टी भाजपाप्रति नरम र तृणमुलविरुद्ध कडा देखिएको छ । सिपिएमका नेताहरुले तृणमुल कांग्रेस नै आफ्नो पहिलो दुश्मन रहेको खुलेयाम बताइरहेका छन् । पहिले तृणमुललाई हराएपछि भाजपालाई हराउन सकिने उनीहरु बताउँछन् ।

१९८० देखि २०११ सम्म सिपिएमलगातार बंगालको सत्तामा थियो । २०११ मा यो पार्टीलाई ४० सिटमै खुम्चाएर १ सय ८४ सिट जितेको तृणमुलले २०१६ मा २ सय ११ सिट जितेको थियो ।

तर यसपटक दिदी चारैतर्फबाट घेरिएकी छिन् । यद्यपी,क्षेत्रीय मुद्दा उठाउने गरेकाले बंगालमा उनको भोट बैंक बलियो छ ।

रातोपातीबाट साभार