काठमाडौँ: सङ्घीय संसद्को हिउँदे अधिवेशन आज अपराह्न १ बजे बस्दैछ। विधेयक अधिवेशनका रूपमा लिइने यो अधिवेशनमा विभिन्न महत्त्वपूर्ण विधेयक र अध्यादेशमाथि छलफल हुने अपेक्षा गरिएको छ।
प्रतिनिधिसभाको बैठकमा सभामुख देवराज घिमिरेले नियमअनुसार बैठकको अध्यक्षता गर्न सदस्यहरू मनोनयन गर्नुहुनेछ। बैठकमा प्रधानमन्त्री केपी शर्मा ओलीले ‘सुशासन प्रवद्र्धन तथा सार्वजनिक सेवाप्रवाहसम्बन्धी केही नेपाल ऐनलाई संशोधन गर्ने अध्यादेश, २०८१’ पेस गर्नुहुने छ।
त्यसैगरी, उपप्रधानमन्त्री तथा अर्थमन्त्री विष्णुप्रसाद पौडेलले ‘आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, २०८१’, ‘निजीकरण (पहिलो संशोधन) अध्यादेश, २०८१’ र ‘आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्ने अध्यादेश, २०८१’ पेस गर्नुहुने छ।
भूमि व्यवस्था, सहकारी तथा गरिबी निवारणमन्त्री बलराम अधिकारीले ‘सहकारीसम्बन्धी केही नेपाल ऐनलाई संशोधन गर्ने अध्यादेश, २०८१’ र ‘भूमिसम्बन्धी केही नेपाल ऐनलाई संशोधन गर्ने अध्यादेश, २०८१’ प्रस्तुत गर्नुहुनेछ।
राष्ट्रियसभामा पनि यी अध्यादेशहरू पेस हुने कार्यसूची रहेको छ। साथै, विधायन व्यवस्थापन समितिका सभापति तुलसाकुमारी दाहालले ‘मिडिया काउन्सिल विधेयक, २०८०’ र ‘नवीकरणीय ऊर्जा तथा ऊर्जा दक्षतासम्बन्धी विधेयक, २०८१’ सम्बन्धी प्रतिवेदन पेस गर्नुहुनेछ।
