काठमाडौँ । नेपाल प्रेस युनियनले वर्तमान संसद् र संविधानकै परिधिमा रहेर राजनीतिक निकास निकाल्न माग गरेको छ। प्रेस विज्ञप्ति जारी गर्दै युनियनले संविधानकै दायरामा रहेर सरकार गठनलगायत प्रक्रिया अघि बढाउन, संविधानले प्रदत्त नागरिक अधिकार, प्रेस तथा अभिव्यक्ति स्वतन्त्रता र मानवअधिकारका विश्वव्यापी मान्यताहरूको अभ्यास गर्न सबै पक्षलाई आग्रह गरेको छ।
नेपाल प्रेस युनियनका केन्द्रीय अध्यक्ष शिव लम्सालले जारी गरेको विज्ञप्तिमा आन्दोलनका क्रममा भएको राज्यको दमन, २३ जनाभन्दा बढी निहत्था नागरिकको मृत्यु, प्रधानमन्त्रीको राजीनामा र सार्वजनिक तथा निजी सम्पत्तिको तोडफोडले देश संकटपूर्ण अवस्थामा पुगेको उल्लेख छ। यस्तो अवस्थामा सबै देशवासीलाई संयमित र संवेदनशील भई देशको रक्षा गर्न सक्रिय हुनुपर्नेमा जोड दिइएको छ।
नेपाली सेनाले सुरक्षा व्यवस्थाको जिम्मेवारी आफैंले लिने घोषणापछि सिर्जित नयाँ परिस्थितिलाई उचित ढंगले व्यवस्थापन गर्नु अपरिहार्य भएको युनियनले जनाएको छ। संक्रमणकाल लम्बिँदा र कुशल व्यवस्थापन गर्न नसकिँदा मुलुकले थप क्षति भोग्नुपर्ने जोखिमप्रति सबैलाई सचेत रहन आग्रह गरिएको छ।
लम्सालले लोकतान्त्रिक प्रक्रियालाई आत्मसात गर्दै संवादमार्फत तत्काल निकास निकाल्न र लोकतन्त्रको अभ्यास सुनिश्चित गर्न सबै पक्षलाई जिम्मेवार हुन अपिल गरेका छन्। ‘लोकतन्त्रको विकल्पमा अरू कुनै विकल्प हुन सक्दैन,’ विज्ञप्तिमा भनिएको छ।
यस्तो संवेदनशील अवस्थामा नागरिकको सत्य र तथ्यपूर्ण सूचना प्राप्त गर्ने अधिकारलाई जोड दिँदै, गलत सूचनाको अभावमा अफवाह फैलिने जोखिमप्रति सचेत रहन पत्रकारलाई आग्रह गरिएको छ। साथै सूचनाको सहज प्रवाहका लागि नेपाली सेना र राज्यका सबै संरचनालाई सहयोग गर्न पनि अनुरोध गरिएको छ।
