काठमाडौँ: आज विश्वभर विविध चेतनामूलक कार्यक्रम गरी विश्व रेडियो दिवस मनाइँदैछ। संयुक्त राष्ट्रसंघीय शैक्षिक, वैज्ञानिक एवं सांस्कृतिक सङ्गठन (युनेस्को) को आह्वानमा जलवायु परिवर्तनका कारण उत्पन्न चुनौती र अनुकूलनबारे सचेतना फैलाउने रेडियो कार्यक्रम प्रसारण गरी यो दिवस मनाउने तयारी गरिएको छ।
रेडियो दिवसको इतिहास
सन् २०११ मा युनेस्काका सदस्य राष्ट्रहरूले फेब्रुअरी १३ लाई अन्तर्राष्ट्रिय रेडियो दिवस का रूपमा मनाउने प्रस्ताव गरेका थिए। राष्ट्रसंघीय महासभाले २०१२ मा अनुमोदन गरेपछि औपचारिक रूपमा यो दिवस मनाउन थालिएको हो।
लोकतन्त्र र सामाजिक परिवर्तनमा रेडियोको भूमिका
रेडियोलाई लोकतान्त्रिक बहसको सशक्त माध्यम मानिन्छ। यो आमसञ्चारको सबैभन्दा पहुँचयुक्त साधन हो, जसले विश्वव्यापी रूपमा धेरैभन्दा धेरै श्रोतासम्म सूचना प्रवाह गर्छ। विविध समुदायका आवाज बोल्ने, प्रतिनिधित्व गर्ने र समाजलाई एकताबद्ध गर्ने रेडियोको भूमिका अतुलनीय छ।
विशेष गरी विपत्का बेला तथा दुर्गम ग्रामीण भेगमा रेडियो सूचना, मनोरञ्जन र शिक्षा को भरपर्दो स्रोत बनेको छ। सामाजिक परिवर्तनमा यसको योगदान महत्वपूर्ण मानिन्छ। सकारात्मक संवादलाई प्रवर्द्धन गर्दै आएको रेडियोले निष्पक्ष समाचार, बहस र जनचेतनाका कार्यक्रमहरू मार्फत नागरिक सशक्तिकरणमा उल्लेखनीय भूमिका निर्वाह गरिरहेको छ।
